MIDANG VA CAWNPIAK TTUNG I KEIMAH KA SUNGH TUNG AHCUN: REV DR G ZA THIO

Midang Va Cawnpiak Tung I Keimah Ka Sungh Tung Ahcun: 1Kor 9:27, Midang kha phung kai chimh sek tung hna i keimahtu hlawtmi (asungmi) ka si sual lai ti phan ah ka pum kha ka hrem i ka sal ( ka uk). ( NASB chung in ka leh). Acunglei Paul cakuatmi rel tikah mi a cheu nih cun khamh a tlau tinak cacang ah an ruah.

Asi lo. Achim duhmi cu midang heh tiah va cawnpiak riangmang in keimah lehlam laksawng pek ding ah hlawt ka si lai ti a phannak a chimmi asi. Phun dang i chim le, ka rian in hlawt ka si lai ti a phan caah a pum kha thaten a khonthawl i a uk. Tunai i US Tennis Open ah Jokovid cu a herh lo tuk in tennis ball a huai i minu pakhat a hromah a khen i a tlu. Cucaah lente i celh kho lo in an chuah, asi lo le an hlawt.

Mipi nih a hmuh theu la an timi pakhatnak laksawng zong a sung. Kannih pastor le evangelist le zumtu tampi zong mi kan va cawnpiak len tung hna i kan chimmi kanmah lila nih kan zulh lo, kan pum hi duh paoh in, Satan duhning in kan hman ahcun a rian thiang in hlawt kan si pinah, van zongah laksawng kan sung lai. Baibal in tawite kan lak ahcun Saul kha siangpahrang sinak in Pathian nih a hlawt khah.

Atu kan chan zongah Pathian nih a rian in a hlawt i mipi zong nih an hlawtmi an um len. Jim Baker hna kha thong tiang a tla i a tu hi a chuak than na in Bawipa rianah hman asi ti lo. A pam tuk. Kan Lairam zongah reng lawng tan i Pathian nih a hman ti lo mi an um len ko hih. Khuapi pakhat i an khua chungah tlanglawng le motor an i tonnak zawn a um.

Mah hmunah cun tlanglawng le motor kha an i khawng i an i taih tawn. Cucaah palik bawi pawl le khua upa hna meeting an tuah i khua an khang. An dihlakten SIGN BOARD lainpi tar ding in an hna a tla. Cu catar ding i a bia kha tawi tung, tha tung in tial ding an ceih tikah aphi an chuah kho lo. Cucaah zuamnak kan tuah lai an ti. Catar ding cu an chuahpi lulh cio. Pakhatpa tialmi nih an lung a ton dih hna caah cu catar ding cun an hna a tla. Mah pa zong cu laksawng an chuah.

Acatar mi biafang cu DIR, ZOH, KAL..ti asi. Atha reng. Cu catar cu lamtonnak ahcun tung sang nawn ah an khenh le an taar. Atha hnem ngai. Amahbel nikhat cu zurit bu in motor a mawngtu nih, palik nih a khammi zong zul loin motor cu a mawngh i tlanglawng kal lio ava taih ai. A hmunbakah hmakhatte ah a thi cawlh. An van hlat hnik cu catar ding a rak chuahpitu asi ko hme cu.

Amah nih DIR, ZOH, KAL ti i a tialmi kha a dir lo, a zoh lo i a kal lo caah a nunnak a liam. Amah lehlam a sungmi ah a cang. Atulio le bang cu on line in phungchim an tam hringhran. Facebook in catial kan tam hringhran. Ahman he hman lo he rel cawk lo in an chuak. Achue cu kan chim len nain kanmah nih kan zul lo. Lailei pastor pakhat le bang cu kum 16 chungah cheuhra cheu khat vawikhat te hmanh ape bal lo.

An khrihfa upa nih a ka chimh. Pakhat pa cu an buu ah rammui lei lutlai asi.Mipi kha tho ding in cawnpiak le fawrh cu a thiam tuk. Asina in amah nih rammui caah vawikhat hmanh ape bal lo. Pastor pakhat nih an buu ah fir a tha lo tiah zarhpi zingah phung ai chim sek. Zanriah ah an nu nih mai kio a hunh. “Zarhteni zaan i ar ka firmi teh?” ati le an nu nih tuzingah fir a tha loh na ti le heih kan pa hi zinglei ah ai chir ko hih ti ka ruah le ka thlah cu ati.

Lih asi lo a hmanmi lawngte ka tial hih.Ahopaoh kan si ah pulpit in siseh, innah siseh, zapi sinah siseh, midang kha a cawnpiaktu kan si hna. Aherh tukmi cu kan cawnpiak ning in nun hi asi. Paul hmanh sungh le hlawtmi si lai a
phan ahcun kannih zong kan i ralrin a hau ko. Tukum le bang cu thim lai asi caah mee pek tik zongah mipi sin i a chimning in a nung te hnga maw ti zoh lo ah un kan i chuah sual te lai. Nalung a tlin ahcun hawidang share kha philh hlah mu. Credit:Rev Dr G Za Thio

Be the first to comment

Leave a Reply

Your email address will not be published.


*