MAH BIBLE CAANG HI ASSK CAAH KA TARPIAK: SAYA VAN TUM

Daw Aung San Suh Kyi caah mah Bible caang (Salm 109:1-21) hi ka tar piak. Maw ka thangṭhatmi Pathian, dai tein um hlah. Miṭhalo le milihchim pawl nih an ka tlakphuat i lih in ka thang an ka chiat. An ka congoih, thil dawhcah lo ka tuahmi zeihmanh a um lo nain sual an ka puh. Ka daw ko hna na le an caah thla ka cam ko nain an ka doh. Ṭhatnak kha chiatnak in an ka lehrulh i dawtnak kha huatnak in an ka cham.

Ka ral cu a bia a ceihpiaktu dingah mihrokhrawl kha thimpiak, cun amah ral lila pakhatkhat nih sual puh hna seh.Biaceihnak kha ing seh law, ‘Na sual,’ ti hna seh. A thlacam hmanh kha sual ah relpiak hna seh. A nunnak kha dong zau seh law, midang nih a rian kha co hna seh! A fale cu ngakṭah si hna seh law, a nupi cu nuhmei si seh. A fale cu inn ngei loin a vak lengmangmi rawlhal si hna seh; thilchia hlonhnak ah khan um hna seh law, cu an umnak hmun hmanh cun ṭhawl si rih hna seh.

Tangka a rak cawihtu hna nih khan a ngeihmi thil vialte cu, lakpiak dih hna seh law, a rianṭuanmi vialte cu khual nih chut dih hna seh. Ahohmanh nih a cungah zaangfahnak ngei hna hlah seh, ngakṭah a fale kha aho zohkhenh hmanh tong hna hlah seh. A tefa vialte cu thi dih hna seh law hmai chan ah cun a min cu philh dipdep si seh. Bawipa nih a pupa hna sualnak kha philh hlah seh law a nu sualnak kha ngaithiam hlah seh.

Bawipa nih an sualnak cu hngal zungzal ko seh, anmah belte philh dipdep si ko hna seh. Cu pa nih cun mi zaangfah ruam hi a ruah in a ruat bal lo; sifak, rethei le santlailo mi kha a hrem hna i a thah hna. Mi chiatserh kha a duhmi thil a si -amah cu chiatserh si ve seh. Angki hruk a fawi tluk hin a caah chiatserh cu a fawi, a chiatserhnak bia nih cun amah kha ti bantukin ciah seh law a ruh kha chiti bantukin ciah hna seh.

A chiatserhnak bia nih cun amah kha puan bangin men seh law taisawm bangin khimh peng seh. Bawipa nih ka ral cu hitihin dantat hna seh, ka thang a ka chiattu ka ral hna cu hitihin tat hna seh. Sihmanhsehlaw Maw Bawipa ka Pathian, bia na ka kamh bang khan ka bawm ko, na dawtnak a ṭhat ruangah ka chuahter ko. Credit: Van Tum.

Min Aung Hlaing Kong attialmi: An thisen le an nunnak a liammi a lak a si hrimhrim lai lo.Ralkap nih uknak an lak ni in nihin tiangah ralkap le palik kut in a thimi hi pa 5 hrawng an si cang. A thimi hna thisen le nunnak hi a lak a si hrimhrim lai lo. Din lonak in chuahmi an thisen nih dinnak in biaceih piak an sinak lai vawlei mipi vialte le Pathian sinah bawmh an hal cuahmah lio a si ve.Din lonak in lakmi an nunnak thisen cu dai tein a um ve lo. An thisen nih vawlei in Pathian le Kawlram minung vialte le vawlei cung minung vialte nih bawmh ding in an kan auh ve.

Atu hi vawlei cung ram tampi le Kawlram mipi vialte nih kan I zuam cuahmah liomi democracy uknak cu Pathian nih a kan theihpiak cang I Myint Aung Hlaing le a hawile pawl cungah dantatnak fakpi a tuah ve hrimhrim lai.Din lonak in chuahmi thisen nih vawlei in Pathian cu bawmhnak a hei halnak kong kan Bible chungah fiang tein kan hmuh. Genesis cauk chungah Kain le Abel tuanbia ah fiang tein kan hmuh khawh.Genesis 4:8-12 chungah, “Cun Kain nih a nau Abel kha a thawh i, ‘I chawk tuah u sih,’ a ti. Lo an va phak tikah khan Kain nih a nau cu a thah. Bawipa nih Kain cu, ‘Na nau Abel tah, khuazei ah dah a um?’ tiah a hal.

Kain nih cun, ‘Ka hngal lo. Ka nau cawngtu maw ka si awk a si?’ tiah a leh. Cun Bawipa nih cun, ‘Zeicahdah hi thil ṭhalo hi na tuah? Ngai hmanh! Nangmah nih na chuahmi na nau thisen nih khan vawlei in a ka auh lengmang ko. Nangmah cu chiatserh na si cang i hi hmun hin ṭhawl na si lai. Hi hmun vawlei hi na nau thisen na chuahmi dolh awkah a kaa a rak angmi kha a si. Lo na thlawh tikah vawlei nih rawl zeihmanh an chuahpiak lai lo.Vawlei cungah inn ngei loin a vak lengmangmi na si lai,’ a ti.” Kain nih din lonak in a naupa, Abel cu a thah tikah a thi cangmi a naupa thisen nih vawlei in Pathian cu a hei auh I Pathian nih phuba a hlampiak.

Pathian nih Kain cu chiat a serh I a umnak hmun in a tthawl. Rawl eikhim a hmu tilo I vawlei cungah inn nei loin a vak lengmang. Thi deng in rian a ttuan ko nan eikhim a hmu tilo.Pathian nih mi a thattu hna palik le ralkap le MAH zong a phun2 in dan a tat hrimhrim hna lai. Thil tthalo an tuahmi cungah Pathian nih phuba a hlam ve lai. A thimi hna caah phuba a hlampiak ve hna lai. Laimi nih kan chim tawn lengmang mi cu “thi a ri” timi biafang hi a si. A kaptu hna palik pawl zong a thimi hna thi an ri ve lai I an nunchung vialte an I nuam lai tilo, an um thiam lai lo, midang hmaiah Kain bang in ningzak in an um cang lai I an tuahmi kip ah hlawhtlingnak an hmu lai lo, thluachuah an hmu ti lai lo, an lam a tluang ti lai lo.A phun2 le a lamkip in harnak an tuar ve cang lai. An thisen le an nunnak a liammi a lakka a si hrimhrim lai lo. A rauh hlanah Pathian hrimhrim nih phuba a hlam piak hna lai, Abel phuba a hlampiak bantuk in. Myint Aung Hlaing cung hrimhrim ah Pathian nih phuba hlamnak le dantatnak a phunphun a tuah ve lai. Pathian nih Kawlram thluachuah pe ko seh! Respect you all! R.I.P.

Be the first to comment

Leave a Reply

Your email address will not be published.


*