LUNGRAWK BAK SI, SITHA KHUAMI LUNGRETHEITUK IN AN UM CANG

Nan khua kan khangh lai tiah ralhrang kawlralkap nih an hro hna pin ah inn an bauh i, tangka an fir. Cheuhra cheukhat tiangin an fir. Kalaymyo Sitha khua ah ralhrang kawlralkap hna cu umhmun an khuar hna. Khua chung chuahluhnak vialte an phih dih. Tuni ah inn an bauh i tangka an fir, cheuhra cheukhat zong an fir pin ah khuami hna cu nan khua kan khangh lai tiah an hrocer rih hna.

Nizan tihni Natchaung i kahdohnak an tuah hnu ah ralhrang kawlralkap hna cu Sitha khua ah an kal i khuami hna cu an hrocer hna. Khuami hna cu PDF pawl bomb an hmanhmi nan hmuh ko nain nan thlauh hna lo tiah an ti hna i, khuami hna cu lengchuak lo dingin an phih kham hna. Mizeihmanh lengah chuah an sianh hna lo. Chuah a duhmi nih an hmatpungtin apta dingin an ti hna.

Hi konghe pehtlaiin lamkam ah a ummi inn 40 hrawnghrang cu an zam hna. Inn ah a um lomi an inn hna cu ralhrang kawlralkap nih an bauh piak hna i, thawhlawm siseh cheuhra cheukhat tiangin an fir rih. Zeizat dah an lak timi fiang in theih a si lo. Khuachung ah a rak lutmi nu pahnih zong an tlaih hna nain an thlah colh hna. Nuva khuahkhat zong an tlaih hna i, an nu an thlah nain an pa cu an hren rih.

Cun lampawng ah a ummi chungkhar pakhat zong an auh i, an tlaih beh. Hi kongah khuami nih thlah dingin nawlnak an tuah ko hna nain an thlah duh lo. A hnupi zan suimilam pahra renglo ah an thlah tthan dih hna tiah khuami pakhat nih a chim. Ralhrang hna nih khuami pawl cu PDF he pehtlaiihnak nan ngeihmi voithum tiang kan in ngeihthiam hna.

Hi hnu pehtlaihnak nan ngeih tthan a si ahcun nan khua kan khangh dih cang lai tiah an hrocer hna. Asinain ralhrang kawlralkap hna nih mipi le PDF karlakah pehtlaihnak an ngei timi ah zeihmanh tehte an hmuhmi a um lo. An ruahnak in an puhmi hna asi tiah a chim chih rih. Tutan ah ralhrang kawlralkap hna nih an hrocermi khua Sitha khua hi inn 150 hrawng an si i, ralhrang an um ruangah siseh an hrocer hna ruangah thinphang in an um i, khuachung ah a um ngam lomi tampi an um tiah theih asi.

Thawngpang dang: Ralhrang kawlralkap meithal kahnak in pafa hna hliam an tuar. Kanpalet peng Kanhtazung khuapawng ah ralhrang kawlralkap hna nih tuzing suimilam hleikhat hrawngah meithal an puah. Ralhrang kawlralkap meithal kuanfang nih pafa hna cu a khen hna i, hliam an tuar. Hliam a tuarmi pafa hna ah hringtu a pa cu a dirhmun a ttha lo ngai tiah an langhter.

Ralhrang kawlralkap hna cu uniform hrut loin an rak phan i, meithal zun nga hrawng an puah. Cu meithal an puahnak ah kum 30 hrawng a simi hringtu pa le a fapa kumli a si mi hna cu an khen hna. An kah hramhram mi hna cu asi lonain an kahnak hi aa neihte tiah an chim. Hringtu a pa dirhmun cu a ttha lo ngaingai tiah Kanpalet i mipi lei uktu chungin minung pakhat nih a chim.

A fapa kumli te lawng asimi hi meithal kuan nih a hnawng tang deuh ah meithal kuan nih a khen i, hringtu a pa tuhi a kut le a ke, a paw ah hmunthum in kuan nih a khenh. An pafa hi Magway sizung ah kalpi an si tiah an langhter. Tulio cu i kahdohnak a um lo nain uniform hrut loin abubu in ralhrang kawlralkap hna nih meithal an puah lengmang tiah an langhter chih.

Be the first to comment

Leave a Reply

Your email address will not be published.


*