LAITLANG AH NLD NIH AN TEINAK ARUANG THEIH A SI CANG

Chinram thimnak ah NLD nih teinak an hmuhnak aruang bik hi tampi chim ding a um lo, Afawinak cun thilsining zeihmanh nupa hna nih an theih lo ruangah asi. Ralkap uknak nih kan ram Chinram cu faktuk in aden i, khuanu khuapa vialte hna cu lungmit in kan um dih hna. Asinain caan a vun i thleng i, NLD nih chan ahcun ralkap pennak cu avun lo.

Ralkap uknak kan vun ti tikah azeidang siloin khuakip ah ralkap an tlung tilo, ralkap kuli phurh a um ti lo, ralkap ruangah thongthlak le tleih khih cun hrem le velh a um tilo. Cutikah khuanu khuapa hna cu lawmhnak in an khat i, NLD ah an thinlung an ruahnak vialte an bungh dih cikcek, tulio lailei kan nu le kanpa tthenkhat cu NLD vun ti ahcun alam bak in an lam.

Azeidang an ruahmi a um lo, ralkap hrem le kuli phurh kan luat ahcun azako timi khi an tuak khawhmi asi. Chinram NLD nih zeidah an tuah khawhmi aum timi an thei kho ti lo. Chin miphun nih zeidah kan harh timi zong an thei kho tilo. Lam le sul zong hi NLD thawngin an ti dih. Chinram budget vialte zong NLD thawngin an ti dih. Cozah lei bawmhnak vialte zong NLD an ti dih.

Khuanu khuapa pi le pu afawinak in kum 40 cunglei minung vun zoh tikah Chinram chungah cun zakhat ah minung 80 hi cu NLD adirkamh mi lawngte an si. Atangmi 20 hmanh hi thilsining atheimi khuapi ah a ummi cathiam, nifatin ca arel lengmang mi khi an si. Abik in khuate hrimhrim ahcun zakhat ah sawmkua le pakua hi NLD adirkamh mi lawngte an si hna.

Aruang cu khuate lei ahcun nifatin zeihmanh thawngpang an theih mi le an relmi a um lo tikah ralkap kuli phorh in akan luattertu cu NLD an si tiah an au dih. Kannu kanpa hna nih an dirkamhmi NLD cu cunglei lutlai NLD khi an si. Sihmanhsehlaw cunglei le Chinram NLD khi an thleidang kho lo. CHinram NLD nih zeidah kan miphun le ram caah timhtuahnak an ngeih timi khi an ruat kho tilo.

Cubantuk thinglung apu cangmi kan pi le kanpu abik in khuate lei a ummi hna cu an i fiang khawhnak dingah biatak tein zuamcawhtu party hna nih an i zuam ahau. Cu lo ahcun NLD ti peng an si ko lai. Tutan thimnak zong thatein vuntuak tikah NLD asimi paoh cu an dingfel maw timi zong ruat loin NLD ah vote an thlak dih ko. An lung an i thlen hlan lo paoh cu CHinram chungah NLD nih teinak an hmuh peng ko lai.

Tutan thimnak zongah a cung kan chim cang bangin an thinlung ah NLD ti lawngte asi caah, zakhat ah zakhat in vote an pek dih. NLD ah vote athla tammi hi kumkhua in vuntuak ahcun mino an umtuk lo, kum a upa deuh cangmi khi an si. Abik in khuate lei ahcun kum aupa deuh cangmi hna nih cun NLD lawngte ah vote an pek tiah theih asi. Cucaah NLD nih teinak an hmuhnak aruang bik cu thilsining zapi nih kan i fian lo caah asi ko. Pumpak ka hmuhning asi. Credit: VTT

Be the first to comment

Leave a Reply

Your email address will not be published.


*