LAINU SUNG TIN PAR NIH A KUT ASAMH CANG UAR A UM TUK

Thawngpang ttha taktak asi. Laimi lawng hmanh siloin Kawlram pumpi ah minthang a simi hlasakthiam Sung Tin Par thiltuah cu a sunglawi in zohchun atlak tuk hring hran. Pathian nih thluachuah pe chin ko seh. Kawlram minthang Lainu Sung Tin Par thiltuah cu a tanglei bantuk in hin asi.

Hlasakthiam minthang Lainu Sung Tin Par nih Chinram kulh asimi Paletwa i Pinawtapin khuami hngakchia thla sarih te lawng asi rihmi Yeyin Aung timi cu a lung athat lo caah operation tuah ahau. Cu operation tuahnak dingah Lainu minthang Sung Tin Par nih tingkul bak te bawmhchanhnak apek tiah mmnewsshwe thawngzamhnak nih alanghter. Man U Sawma.

Relchih:Laimi nih kan i bochan taktak mi JP Biak Tin Sang nih Salai Lungthli Tum kong a chimmi cu uar a um khotuk. Ahman zong a hmantuk hringhran. Salai Lung Thli Tum hi cu Laimi mino chungah cun pasalttha taktak pakhat cu a si ko. Hi konghe pehtlaiin Laimi nih kan i bochanmi kanpa nih atanglei bangin a ttialmi a si.Salai Lungthli Tum.Kan CHIN mino faanau hna lak ah bochan awk, cawihler awk le bomhchanh awk tlaak hrim taktak in ka ruahmi ah Salai Lungthli Tum hi aa tel.

Hi pa hi mino te a si rih a ruahnak tete hi a thuk i a kau in ka hmuh. A ca ttial hi a cancan ah ninghngal bantuk in mi a tthua pah tiah ruah awk tete a um na in a lungthin a thiang in ka hmuh.Hlanlio a sican ning le fimnaak a kawl ning, ningzahnaak le harnak phun zakip a ton ning te hna zong ningzak bak lo in ai chim tik ah upat awktlaak, bochan awktlaak pasal ttha hrimhrim ah aa chuah te lai ka ti. Lung re theih a tongmi kan Chinmi hna a bomh tawn ning hna leChin mino hna an i lomhnaak ah lentecelh lei a tuah piak mi tete hna zoh tik ah duh a nung tuk.

A bik in a tu lio mihar a bomh ning hna ruah tik ah lomhpi lo awk a ttha lo. Western in tangka kuat khawhnaak ah khua te tiang in a tuahmi hna hi a ttha tuk hringhran. A mah tangka hmuh khawhnaak pei a si cu ti hrimhrim hlah u sih. Salai Lungthli Tum a dam i, mi lianngan le mirum taktak ah aa chuah i CHIN miphun chung in miropui taktak a simi pakhat ah aa chuah khawhnaak hnga thlacamnaak in bomh tlaak hrimhrim a si , bawm cio ko hna usih.JP Biak Tin Sang.

Na Tuah Manh Lai Maw?Hmun khat i an in hrem hna tikah hmun dang ah va zam u. Biatak kan chimh hna, Mi Fapa a rat hlanah cun Israel khuapi vialte hna cu nan cul dih kho lai lo.’ (Matt 10:23 NIV),Jesuh nih pumsa in vawlei i a nun lioah aa tinhmi cu a Pa nih a fialmi kha tling tein tuah a si. Pathian prokrem tlamtling tein tuah lo hi a duh lo bikmi a si.A zultu hna sinah, ‘Mi Fapa a rat hlanah cun Israel khuapi vialte hna cu nan cul dih kho lai lo’ a ti. Israel khuapi vialte i thawngthabia chim dih ding hi aa tinhmi a si. Cucaah a zultu hna kha khua pakhat ah saupi caam ding kha a duhpiak hna lo, khua vialte ah thawngtha chim dih hna seh ti a duh.

‘Mi Fapa a rat hlanah’ timi hi mitampi nih ‘Jesuh voihnihnak a ratthannak’ a si tiah an ruah tawn, hihi biafangrual nih a chim duhmi si dawh a si lo. ‘Mi Fapa a rat hlanah’ timi nih a sawh duhmi cu thawhthannak, vankai le Thiang Thlarau toihnak in Jesuh sunparnak tu a si deuh. Jesuh Khrih vawlei i a ratthannak kong si loin Jesuh Khrih nih a pennak va lak awk i a Pa sinah a ratnak tu a si deuh (Daniel 7:13-14 zoh chih).

Jesuh nih a Pa sin i a rat hlanah a tuah hnga dingmi rian vialte lim dih a duh. Cuticun zultu hna zong nih an Bawipa Jesuh Khrih sin i an kal hlanah Khrih nih a pekmi hna rian kha lim dih an duh ve.Nangmah le keimah tah? Kan Bawipa Jesuh sinah kan kal hlanah asiloah kan rat hlanah amah nih a kan pekmi rian hi kan tuan dih manh lai maw? Bawipa riantuan mi lawngte kan si, zeitluk khan khi dah kan tuan cang. Bawipa rian hi duhsak in tuan loin rianrang in a tuan dingmi kan si. Credit: Tukhal Cazual.