Laimi MP Le Vuancii Caah Mizoram Mp Le Vanci Thiltuah Le Nunzia Dawh Cawn AwkTlak

Lairam MP le vuanci caah Mizoram MP le vuanci pawl i thiltuah le nunzia dawh cawn awktlakOctober thla ni 9, 2020 ah khan Assam state i Kala pawl (vai pawl) nih Mamit district chung i a ummi Thinghlun dai ah Mizo pa 2/3 nih lo an tuahmi cu an hrawhpiak dih hnu hnaah an lothlam zong an khanghpiak dih hna/an duahpiak hna. An kuva kung le an thlaicin mi pawl zong Assam pawl nih an hrawhpiak dih hna. Mah kongah Mizoram cozah le mizo mipi an thinhar tuk i an tikhawh tawk cio in an ttang/an cawl tti hna. Mizo lo an hrawhmi hi pa 2/3 hrawng a si.

Assam state le Mizoram state hi ramri kongah an buainak a sau ve cang. Mizoram state i milu zat cu 1.116 million (2014) an si i Assam state i milu tamzat cu 30.94 million (2012) an si. Milu tamlei ah an i thlauning khi zoh ko hna uh law. Asinan Mizo nih an ttih bak hna lo. Assam pawl nih Mizo lo an hrawhpiakmi hna cu Mamit district nawi neitu upa nih an va zohpiak colh hna i bawmhnak zong an pek hna.

An hrawhpiakmi hna an thlam zong mipi nih an sakpiak tthan hna. Mah buainak kongah Mizo pawl nih an timi cu kan ram le kan miphun caah cun thih le luhloh zong kan ngamh/kan ttihloh an ti. Chinmi teh miphun dang nih kan cungah nehsawhnak le zei rel lonak in thil ttha lo an tuahmi cungah thih le luhloh kan ngamh taktak ve maw? Annih cu an MP pathum bak nih lo tiang an va kal i Assam pawl hrawhmi vialte cu an va zoh dih hnu ah bawmhnak zong anpek hna i hnemhnak bia zong an va chim. Mah kongah Mizo cu an za tein an ttangtti hna. An sikhawh chung in MP le nawi neitu dang le mipi nih an dirkamh hna i an aupi hna.

Assam pawl nih an hrawhmi cungah cawihliamhnak le ngaihthiam halnak tuah hna seh an ti, ca zong an ttial.Chin state MP le vuanci nih teh Sui Hlei Tial te chungkhar si hna seh, Tlanglo nu a aithing an hrawhpiakmi le nizan tihni i Hakha innkaangmi chungkhar si hna seh, an va leng hna in an va hnem ve hna maw? Bawmhnak teh tlawmpal tal an pe ve hna maw? An tuah rih lo ahcun Mizoram state MP le vuanci le hruaitu dang pawl thil tuahmi khi hei theihter ve hna uh law i cawn ve hna seh law tuah ve hna seh ti ka duh. Kan Khrihfa cawnpiaknak he a tlakmi zong a si fawn. Thantlang khua nih MP caah le vuanci caah vote nan pekmi hna aho dah an si? Mipi nih sunghnak fak kan ton caan ah zeiah mi a relpiak lomi MP le vuanci cu mee pek ti hna lo ding an si ko.

Kan CM, kan vuanci le kan MP pawl nihhin Mizoram CM, MP le vuanci te pawl nih an mipi cungah thilttha an tuahmi le an nunzia dawh khi i cawn ve hna seh ti ka duh. (Exodus 2:11-12) “Moses cu a hung upat tikah khan, a phunhawi mi cu a va leng hna i zeitluk in dah rianhrang áš­uan an hnek hna ti kha a va hmuh. A miphun hawi pakhat Izipt mipa i a thah zong kha a va hmuh fawn. A pawngkam kha a zoh i ahohmanh a hmuh hna lo tikah, Izipt mipa cu a thah i a ruak cu vawlei chungah a thuh.”

Moses bantuk paral ttha le a miphun a dawmi Chin miphun nih kan MP, kan hruaitu, le kan vuanci caah kan herh ve ko hna. Moses bantuk in kan va thah ve hna lai ka ti duhnak a silo. Nan ral ttha ngai in kan miphun caah kan chimngam, kan ttial ngam le kan rel ngam a hau ve. Kan unau Mizo pawl nih ralttha ngai in an tuahmi cu kan tuah ngam ve a hau.

Crd: Van Tum

Be the first to comment

Leave a Reply

Your email address will not be published.


*