LAIMI US AH KAL AA TIM MI VIALTE NIH TUAH LE THEIH AHARH TAKTAK MI

US Tlawng Dingmi Nih Covid-19 Test Tuah Ding. Tuchun ah White House Press Secretary Jen Psaki nih White House ah Press Conference a tuah I, thaizing thawk in US ah a rak lut dingmi paoh nih Covid-19 negative test tuahmi result nan I ken dih lai tiah a chim. US kalnak vanlawng chung luh hlan nithum a duh ah negative test nak tuahmi result a si lai ti a si.US ah covid-19 zawtnak a zual chin caah atu bantuk in khen khamnak le visa renghnak an tuahmi a si.

UK, Europe le Brazil ram ah khual tlawn le luhchuah zong kham rih a si lai. South Africa zong a thar in President Biden nih khualtlawn luchuh kham dingah a timhmi chungah a tel. South Africa ah hin Coronavirus in a sem chinmi, Coronavirus zawtnak phundang an hmuh chap caah atu bantuk visa le luhchuahnak rengh an timhnak cu a si.

Brazil, Ireland, UK, European ram cheukhat le South Africa in US Citizen a si lomi poah luh khawh a si rih lai lo. Cucaah Kawlram in US a luh dingmi paoh nih vanlawng nan I cit hlan nithum lawng a duhmi Covid-19 negative test result nan I khen hrimhrim lai. Nan I ken lo ahcun vanlawng ah luhter nan si lai lo.

Relchih:Senate Nih Donald Trump Tazacuai Hram An Thawk. President Donald Trump cu Senate ah tazacuai ding in House Democrats nih impeachment an tuahnak The Article of Impeachment for Incitement of Insurrection cu impeachment a tuahtu, House democrats hna aiawhtu, Managers hna nih tu zanlei ah Senate ah an rak chuahpi.US phunghrampi ning ahcun Senate nih President taza an cuai ahcun US Supreme Court Chief Justice hruainak in tuah phung a si.

Asinain President Donald Trump cu a term zong a dih cang I, President sinak in a ngol cang caah Supreme Court Chief justice John Robert hruainak si loin Senate President Pro Tempore Senator Patrick Leahy hruainak in tuah a si lai.Tazacuaitu Democrats aiawhtu hna nih President Trump nih Capitol Hill ah buainak chuakpi nak kong tette an ngeihmi vialte cu Senate ah an phuan lai.

Mah hnu ah Trump sihni hna nih an a sual lonak an chim ve lai. Mah hnu ah Senate ah debate an tuah te lai I, Senate minung 100 nih President Trump a sual le sual lo cu bia an chah lai. Senator minung 100 chungah cheu thum cheu hnih vote nak lawng in a sual tiah dantatnak pek khawh a si.Senate ah Democrat le Republican cu vote 50 veve an ngei.

Senate i cheu thum cheu hnih vote lawng in Trump cu sual dantatnak pek khawh a si. Republican minung 17 nih democrats lei I an ttan lawngah President Donald Trump cu sual dantatnak an pek kawh lai. Thong thlak cu a um lai lo, asinain President hlun hna nih an co dingmi benefit vialte cu chuh dih a si lai. Cun hmailei President thimnak ah cuhnak nawl an pe ti lai lo. Asinain Democrats tazacuai mi hi an hlawhtlin lai zumh a um lo. Credit: Salai Lairamthang

Be the first to comment

Leave a Reply

Your email address will not be published.


*