Laimi Lakah Caantling Fulltime Pastor Ttuan Mi Hmuh Awk An Um Lo Tlawm Tuk

Laimi lakah caantling (full-time) pastor a ttuanmi hmuh awk an tlawm ko Laimi (Chinmi) kan pastor te lakah caantling (full-time) in rian a ttuanmi hmuh awk an tlawm ngaingai. A bik in ramdang ummi kan pastor te lakah. Khrihfa buu nih cun caantling ttuan ding in an lak ko hna I lahkhah zong caantling ca in an pek ko hna nan. Ramdang I a um lakah full-time in kan lakmi hna pastor te rianttuan ninghi zohtik ah part-time (caancheu) I rian a ttuanmi tluk hmanh in Khrihfa caah rian an ttuan lo ti khawh a si, pastor tamdeuh cu.

US ah part-time (caancheu) rian a ttuanmi nih nazi 20 an ttuan zarhkhat ah. Full-time (caantling) rian a ttuanmi nih cun nazi 40 an ttuan. Nazi 40 leng a ttuanmi zong an um len ve. Cusi ahcun ziah caantling in lakmi pastor nih mah tluk pastor rian a tammi cu caancheu riantluk lawng in an ttuan kun ne? Ruah awk a tam ngai cang. An thathut bia maw si siloah an Khrihfa bu nih dah kan dawt tuk ruang hnaah dah a si siloah rianttuan awk an theih lo ruangah dah a si siloah an daithlaang tuk ruangah dah asi? Biahalnak tampi tuah khawh a si ko lai.

Laimi pastor te lakah caancheu rian bantuk in pastor a ttuanmi tampi hmuh khawh an si cang. Mah chinchap ah lahkhah kan kaih uh tiah an Khrihfa buu cu atu le atu an hal lengmang fawn hna. Ningzak ngai a si. Cawnnak sang zong a nei lomi an tam I zarhpi ni zingah ttha tein le hmual a ngei ngaimi thawngttha hmanh an chim kho fawn hna lo. Kan pastor te lakah a tamdeuh cu zarhte ni chun lawngah tlawmpal te Bible van kau luklak I thawngttha a chimmi pastor an tampi fawn.

Pastor pakhat nih cun a si khawh ahcun thawngttha (sermon) chimding a timhtuahnak ah caan saupi can la seh law thlacam bu tein, a ngaitu ca zongah santlaihnak, tthathnemnak, thlarau thazaang, fimnak tampi a pek hna lai. Laimi pastor pawl an rianttuanmi lakah an chambau ngaimi pakhat cu pastoral counseling hi a si. Mahkong zong chim ding cu a tam ngai ko.

Pastor pakhat cu caantling (full-time) in rian pek a si ahcun cawn nikhat ni in ninga ni tiang a Khrihfa buu le a member caah rian a ttuan awk a si ve. Ramdang le bang ahcun member te rian bawmh ding a tamtuk. Appointment zul ding lawng hmanh a tamtuk. Scot McKnight nih a chim bang in cawn nikhat ni in ninga ni tiang khrihfa bu le member caah rian a ttuan lo I zarhpi ni zing lawng I pulpit I phung a chimmi pastor cu pastor an si lo ati. A hman tuk ka ti.

Za ah za a hman. Mahti ka chim tikah pastor na hnahchuah hna I si nan ka ti men lai. Pastor zei ah na rel hna lo a si ti zong nan ka ti men ko lai. Mi soisel na tthawngtuk ti zong nan ka si men ko lai. Nan ka ttialmi vialte khi Bible thiamsang pawl nih an chimmi he a khat ko. A hman maw hman lo ti cu tuak ve ko thluak na neih ahcun. Pastor a rian hi a tamtuk. A kau tuk. Caantling in rian pek an si I cuve bantuk in lahkhah zong pek an si fawn

caah khrihfa bu le member caah caantling (full-time) in ttuan ve hna seh law khrihfa bu le member caah santlaihnak le tthathnemnak tampi a chuahpi lai. Lahkhah lawng caantling bantuk in ei ttung I caancheu (part-time) bantuk in rianttuan cu Pathian hna zong a tla lai lo. Laimi an kan dawt lo zong a si pin ah Pathian an dawt lo zong a si fawn ka ti. Cheukhat kan pastor te le bang cu Khrihfa bu ah company CEO, boss, manager, le lawbaan bantuk in nawlneih an duh tuk.

Pastor cu Pathian sal an si bantuk in khrihfa bu caah sal bantuk in rian an ttuan ding a si ko. Toidornak an neih awk a si. Laimi kan pastor pawl Laimi khrihfa bu le Pathian nan kan dawt taktak ahcun caantling (full-time) bantuk in nan rian kan ttuanpiak uh tiah kan nawl hna.Kan pastor tamdeuh cu an caantling rianttuanmi hi tuak tik le zohtik ah thlakhat ah nazi 10/15 hrawng lawng an ttuan ti khawh a si. Caantling pastor kan herh ko hna.

Crd: Van Tum

Be the first to comment

Leave a Reply

Your email address will not be published.


*