LAIMI KANPA REV. M THAWNGKAM NIH CDM ATUAH LOMI A PHOMH CANG HNA

Tu Caan I Daite na um ahcun! Persia pennak tang ah Judahmi hna hrawhdih ding in rawiphiar an rak tong. Siangpahrang nupi Esther nih a theilo. A pu nih a chimh. A pasal, siangpahrang sin va chim kha Esther nih a ngamhlo. Cu caah a pu nih ‘hi bantuk lio can I daite I na um ko ahcun nangmah le na pa ciruang hna cu nan thi lai.. ‘ a rak ti.

Tulio Kawlram chung buainak hi Esther chan Judahmi hna tuarnak he aa khatbak ko. Hi lio caan I daite um cu himnak silo in thihnak ding tu a si. Esther thluak chung ah a lang colhmi cu mah nawl in siangpahrang va ton cu ka thi kho tiah a ruah. Cu caah a tih. Tulio mizeimaw nih CDM ka tuah ahcun zeitindah kan nun lai tiah nan phang. Nain kha nan phanmi kha nan hmailei chan tiang thihnak ding lehlam a si.

Hakha CDM Hruaitu Nih Hriamnam Ttha Bik Nan Philh – Chin World News Evening

Pakhatnak. Tanhmi ka ngeilo ti I daite i-umter hi ralkap tanh a si. Ralbawi Zaw Min Tun nih pei a au lengmang mi hna tham cu ram mipi I 15% lawng an si a ti kha. A aulo mi kha anmah lei tang ah an I ruah I thazaang ah an I lak. Na au a hau, na tum a hau, na chuah a hau. Pahnihnak. Cozah riantuan pawl CDM tuahlo hi ralkap dirpi a si. Keimah rian thingte ka tuan ko tiah I chim ter hlah.

Na rak rianhmi cozah a um tilo. Uknak chuttu ralkap thawnnak na tuah a si. Khakha zir a si. Pathumnak. Mi tampi nih nunnak an hloh, ningcanglo tuk thahnawn an ton lio le ralkap puarhrang uknak duhlo I an au an chuah lio ah zung na kai rihmi nak in miphun rawiphiar a um tilo. Kha thahnawnnak a tuahtu hna leikap na tan a si. Thisen nai neh ve kha philh hlah.

Hakha ah CDM tuahmi cozah riantuan cu zatuak ah 92% an phan cang – Chin  Channel News

Palinak. Miphun ralkap hna an thawn a herhbik lio can a si. An derthawmnak lawng chim peng can a silo. Dirkamh I a thawnter tuding si can a si. Hriamtlai hna hi mithah le minawn an duh ruang ah hriam an tlaihmi a silo. Miphun covo hlamthan nak caah nun thapmi tu an si. Hi lio can ah I theihter duhlo I daite na um ahcun thihnak thiamthiam na zunding a si ko.

Panganak. Zumhnak ruang ah CNF/A ca pek duhlo I um kha zumtu fel sinak a silo. Ralhrang Kawl ralkap nih duhpaoh in thahnawnnak tuah ko rih hna seh ti lam onh a si. Paruknak. Tulio buainak ah mipi le ralkap kar ah itluk (draw) sian ding a silo. Itluk cu mipi caah sungh (thih) a si. Tei hrimhrim a herh. Teinak ding caah daite nai um ter ahcun teinak lam a hla chin lengmang.

Pasarihnak. Tlangcungmi hna caah federal ti lengmangmi hlamnak can, canrembik a si. Hi caan kan tlolh ah cun sungh cikcek a si lai. Tulio caan, miphun nih rawiphiar a tuar lio caan ah, miphun le ram ca aw le thazaang chuahlo in mah him duh ah daite um hi himnak a silo. Mipi nih teinak a hmuh ko lai. Teinak hmuh tikah cun CDM ah aa telduhlo mi le daite aa um termi hna nih nun nan ngamh te lailo. Tuanbia ah na tlau lan lai.Credit: M Thawng Kam

Be the first to comment

Leave a Reply

Your email address will not be published.


*