LAI MINO THIHNAK KONG RALHRANG BIACHIM CU LUNG A FAK KO

Ralhrang Kawlralkap nih Laimi or Chin Mino pali an thahmi hna ruak cu an phum dih hna. Sagaing Region Tamu peng Thonkatin oauhsuh Naung kat khua ah ralhrang kawlralkap hna nih Laimi or Chinmi mino pali hna cu an kah thah hnu ah an ruak an phum hna tiah theih a si. Naung Kat khuathar Zalenphai khua ah tleirawl minung paruk hna cu July ni 10 zan suimilam pahra hrawngah khualei panh in an tlung.

Khualei panh an tlun cuahmah lio Chunpinta le Mintakhyi karlak ah a ummi hlei pawngah ralhrang kawlralkap hna nih an kah hna i, a hmuncia ah minung pahnih an nunnak a liam. Midang pathum hna cu an tlaih hna,Mino paruk chungah minung pakhat cu a zaam manh tiah khuami pakhat nih thawng zamh nak ah a chim.

Ralhrang kawlralkap hna nih an tlaihmi minung pathum hna cu Minta palek sakhan ah an kalpi hna i, July ni 12 ah minung pakhat cu an thlah tthan. Asinain minung pahnih hna cu an ruak an phum hna hnu ah ralhrang hna nih chungkhar hna cu thawng an thanh hna. Azammi pakhat zong hi a ke ah an kah i hliamhma a tuar tiah an chim. Cun an cycle pahnih zong an kah rih.

Minung pali ruak hna cu chungkhar hna nih ralhrang kawlralkap hna sin ah an hal hna i, rak kan hal hlah uh nizan ah khan kan phum cang hna tiah an leh hna. An ruak an phumnak hmun le hma zong chungkhar hna nih an thei lo. Zei bia hmanh aa kan lehmi a um ti lo caah an phumnak hmun le hma zong kan thei kho lo tiah Naungkat khuami minung pakhat nih a chim.

Ralhrang kawlralkap hna nih an kahmi hna Laimi or Chinmi mino pali hna hi Ngan Ci Pau le Man Co, Do Khu Let le Pau Gin Man hna an si. A nungdam mi minung pahnih hna cu Maung Sat Min Lun le Maung Ta Pu hna an si i, an mah hi khuachung ah an um cang tiah theih a si. Hi konghe pehtlaiin aliamcia July ni 9 zongah Chinmi pali zong Tamu, Kyun Pinta ah an tlaih cang hna i, tutiang chungkhar zong an hmuhter hna lo tiah an langhter chih.

No photo description available.

Thawngpang dang: Ramchung Remdaihnak Tuah Dingin UN Nih Ralhrangbu A Forh, UNHRC nih Kawlram tlangcungmi le Rohingya hna cungah ralhrangbu nih minung covo a buar mi cungah sual a phawt pinah ramchung i rem daihnak rian hmaithlak in tuah dingin July 11 ah biakhiahnak a tuah. Hi agenda hi Islamic pawl i funtomnak phu OIC aiawh in Pakistan nih a luhpi mi a si i, chungtel ram 47 umnak HRC nih a fehter mi a si.

Taluk belte cu a karlak ah a um. Pakistan UN palai Khalil Hashmi nih Kawlram chung Muslim pawl dirhmun le an covo cu a chia ngai rih, ralhrangbu nih mipi covo a buarnak cungah human rights council nih a kham dingin a nawl. UN nih Kawlram minung covo kongah a papek deuh in rian a pek mi Thomas Andrews zong nih ralhrangbu nih rampi uknak a chuh hnu timhcia tein minung covo a buar mi cungah vawlei cung ram vialte nih kham dingin a luancia thla 5 chung kan rak tlolh tiah a chim.

UN high commissioner of human rights Michelle Bachelet Jeria zong nih Kawlram ramkhel kong cu minung covo phunphun buainak ah a cangcang.Ramchung hmunkip ah ralhrang cawlcanghnak le rethei sifahnak ruangah ram thanchonak zong hna beisei ngam a si ti lo. Hi nih a chuahpi mi cu fail state a si lo ah a thuk le a kau ngai mi rampi dohthlennak ram ah a cang te lai tiah a chim.Atu lio kan ram ah Covid-19 zawtnak a karh, oxygen i daih lo ruangah mi tampi an nunnak a liam lio ah ralhrangbu cawlcangh ning zoh tikah mi tampi nih ralhrangbu cu covid-19 rai hman in mipi a thattu a si tiah ruah a si. TCP.

Be the first to comment

Leave a Reply

Your email address will not be published.


*