Khun Tun Oo SNLD Rian In A Dinh Mi CuTlang Cung Mi Kan Ca Ko Ah A Poi Khun Nak A Ruang

Khun Tun Oo Cu SNLD Chairman Rian In Aa Din Cang Timi Thawng Nih Khua Zaza A Ka Ruahter.Khun Tun Oo cu SNLD Chairman sinak in aa din cang timi thawng nih Kawlram democracy lamthluan le a bik in Tlangcungmi kan covo le Federal system ngah khawhnak ca ko ah thazaang tampi a zorter lai timi ka lung ah a chuak riangmang. Khun Tun Oo hi kum saupi ka rak uar tukmi Kawlram minthang politician le Shan mi lawng hmanh nih si loin Tlangcung miphun vialte nih bochanmi mi roling pakhat a si.

1990 election ah NLD chang in MP hmunhma a tam bik a teitu SNLD founder le Chairman a si. Khun Tun Oo hi a hnu bik Hsipaw Saopha a simi Sao Kya Seng a tupa a si.1990 election hnu in Ralkap cozah (SLORC= State Law and Order Restoration Council or NAH WAH TAH) nih declaration 11/92 in 24 April 1992 ah AMYOTA NGILAKHAN (National Conference) (အမျိုးသားညီလာခံ) kan tuah lai i cu National Conference nih Constitution a ṭial lai. Constitution ṭial dih hnu in a cozah thar sinah nawlngeihnak cu kan ap ṭhan lai tiah an thanh. 28 May 1992 ah Lt. Gen Myo Nyunt (Rangoon Military Commander) hruaimi Steering Committee cu Ralbawi 14, ramkhel party pa 7 aiawhtu minung 28 he an dirh.

Lt. Myo Nyunt hruaimi Steering committee nih National Conference tuahnak kong in 23 June 1992 ah 1990 election lio i teinak a hmumi Ramkhel party hna cu meeting a sawm hna. Meeting a kaimi hna cu ramkhel party pa 7 (NLD-15, SNLD -6, NUP -3, Tlangcung miphun party -4) le independent -1 (Dr. Hmuh Thang) hna an kai i teinak a hmuh mi party pa 2 cu an kai duh lo.
Meeting a hramthok ah Lt. Gen Myo Nyunt nih Constitution ṭial ding in National Conference kan tuah lai. National Conference tuahnak caah ṭuanvo pek ka si. Nihin a rak kaimi hi 1990 election lio ah a teitu nan si caah nanmah (vial) nan duhning in kaan tuahpiak hna lai.

National Conference a kai dingmi zong nan duhning in kaan sawmpiak hna lai. Zeihmanh thinphannak le ṭihnak um loin nan chimrel khawh tiah a hramthok ah a chim.NLD Chairman U Aung Shwe (former Maj. Gen) nih National Conference a kai dingmi hna cu a tanglei bantukin an si lai tiah a chim.SLORC cozah nih National conference tuahpiak ding le Constitution suai le ṭial ding nan kan timhpiak caah kan i lawm. Constitution a thar ṭial ding ah National Conference kai ding in sawm ding mi hna cu a tanglei bantukin an si lai:

1990 election lio thimmi MP aiawhtu (Elected Representatives) 2. Ramkhel party aiawhtu pawl (Political parties Representatives) 3. Lothlo pawl aiawhtu (Peasants 0r TAWNGTU Kosale) 4. Rianṭuanmi pawl aiawhtu (ALOHTAMA or Workers KOSALE) 5. Fimthiamnak a ngeimi pawl aiawhtu (Intelligentsia and Technocrats = TATTIH PYINNGIASIN MIA) 6. Cozah rianṭuan pawl aiawhtu (Government officials) 7. Miphun hme pawl aiawhtu (Ethnic minority Representatives) 8. Sawm vemi hna ဖိတ္ျကား သင့္သူမ်ား) (Invited guests).

SNLD Chairman Khun Tun Oo nih Conference kai dingmi kong a chimmi cu: A ra laimi National Conference ah a kai dingmi cu: 1. 1990 lio i teinak a hmumi MP vialte an kai lai. 2. Ramkhel party pawl (teinak a hmu lomi party pawl) aiawhtu an kai ve lai. 3. Tlangcungmiphun aiawhtu (Ethnic minorities) 4. Sawm vemi (Invited guests).U Khun Tun Oo nih “1990 election cu nanmah SLORC (Ralkap a cozah) nih free and fair tein nan kan tuahpiakmi a si. HLUTTAW KOSALE pawl i kan rian cu upadi ser ding hi a biapi bikmi kan rian a si. HLUTTAW KOSALE timi cu mipi nih anmah aiawhtu in thlahmi kan si.

1990 election lio ah Kawlram ummi mee pe kho mi mipi dihlak nih mee pek in aiawhtu ah MP hna cu thim a si. Cozah rianṭuan pawl, Lothlo pawl, Fimthiamnak a ngeimi pawl, Rianṭuanmi pawl hna zong nih mee an pek ve caah anmah aiawhtu an thlah ve cang caah an mah thengtheng an kai ve a herh ti lo. U Aung Shwe a chim bantukin cu hna pawl kai ve hna seh tiah kan ti ahcun an aiawhtu cu zeitindah an i thim lai, aho nih dah a thim lai. Cu ruangah an nih pawl cu National Conference ah kai ve ding an si lo tiah fiangput in a chim.

NLD Chairman U Aung Shwe nih anmah NLD nih landslide a teimi le Kawlram pi Democracy lamthluan ah tluang tein a kalpi kho dingmi lam cu a phih diam. Cu zan cu ka lung a rawk tuk i ka saya pa Prof. Dr. Saw Tin sinah ka va kal. RIT i Profesor pa (a min ka philh, Architect department ah Professor asi, Japan ram in PhD ngahmi a si) zong a rak leng ve i kan pa 3 in kan lung a rawhning le NLD nih mipi nih zumhmi le Kawl rampi democracy lam thlen khawhnak opportunity an hloh diam cang timi kong sau lakte kan ceih.

Nihin ni tiang zei ruang ah dah NLD Chairman U Aung Shwe nih mah tiin biatung a dirh hnga timi hi ka lung a tap peng rih.National Conference tuah hlan 2 October 1992 ah SLORC nih six objectives of the National Conference timi statement an chuah. Pakhatnak. Non-disintegration of the Union;Pahnihnak. Non-disintegration of national unity;Pathumnak. Perpetuation of national sovereignty;Palinak. Promotion of a genuine multiparty democracy;Panganak. Promotion of the universal principles of justice, liberty and equality; and,
Paruk nak. Participation by the Defence Services in a national political leadership role in the future state.

A 6nk hi Kawlram ramkhel ah ralkap nih hruaitu dirhmun in i tel ding timi aa tel.
1990 election ah NLD nih ṭhutdanh 492 chung ah 392 in a tei. 80.82% a teitu a si caah NLD Chairman U (Bochoke or Maj. Gen) Aung Shwe a chimning tein steering committee nih a tanglei bantukin KOSALE 702 a sawm hna i, 9 January 1993 ni ah National Conference pi cu an tuah thok. NGIAUNG HNAPIN NGILAKHAN (ညောင်နှစ်ပြင်ညီလာခံ) tiah auh a si.

Conference a kaimi hna cu:- 1. Election ah thimmi (MP) aiawhtu: 107 (86 NLD), 2. Political parties aiawhtu 49, 3. Lothlo pawl aiawhtu (Peasants): 93, 4. Fimthiam pawl (Intelligentsia and Technocrats ): 41, 5. Cozah rianṭuantu pawl aiawhtu Government officials): 92, 6. Rianṭuantu pawl aiawhtu (ALOHTAMA or Workers): 48, 7. Miphun hme pawl aiawhtu (Ethnic minority Representatives): 215, 8. Sawm vemi hna (Invited guests): 57Mipi nih zumh in mee pekmi NLD aiawhtu cu Conference a kaimi i 15% lawng an hung si. (NLD in Hluttaw Palai a tling mi dihlak conference ah kai ti loin anmah chung lila ah aiawh chintu an i thim i cu hna lawng cu an kai kho cang.

Cucu anmah NLD biatung dirhmi ning tein a nungmi a si. Cun, NLD in Hluttaw Palai a tling nain conference kai kho lo ding in ralkap nih thong an thlakmi hna hi conference lamthluan ah a rak um rih lo).Ruah cia bantukin Lt. Gen Myo Nyunt nih U Ne Win a cozah (MAHSAHLAH) lio i party council member pawl, Myone le Pyine (Township and state officials) hna cu Lothlo le Rianṭuantu (Workers) aiawhtu ah an sawm dih hna.

Fimthiamnak ngei pawl le Cozah rianṭuan pawl aiawhtu pawl zong ralkap le ralkap minung pawl kha an sawm hna (cozah rian department kip i lu bik or Director General [DG or MD] cu ralbawi deuh ngawt an si). Miphun hme pawl aiawhtu ah anmah ralkap minung pawl an sawm hna. Invited guests timi zong ah ralkap minung pawl an sawm ṭhiamṭhiam hna.Conference lio zong ah HLUTTAW chung ah ralkap 25% telh lo ding in biatak tein a chimtu cu Khun Tun Oo a rak si. Khun Tun Oo nih a chimmi cu “HLUTTAW KOSALE timi cu keimah aiawh in va chim va rel tiah mipi nih thlahmi a si. Cu caah thim lomi ralkap pawl nih HLUTTAW ah an ṭhut ve hrimhrim ding a si lo. Thim lomi cu HLUTTAW KOSALE an si kho lo.

Ralkap zong cozah lakhah a eimi cozah rianṭuantu (government servant) nan si ve. A cozah department a dangdang vialte i rianṭuanmi hna cu HLUTTAW KOSALE an si duh ahcun, rian in i phuah hnu ah election luh ve ding a si bantukin ralkap le ralbawi pawl zong nih KOLSALE nan si duh ve ahcun nan ralbawi rian in i phuak ulaw election ah i cuh ve ko uh. Ram le miphun caah rian a ṭuantu nan si caah mipi zong nih mee an in pek ko hna lai, election ah nan tei ahcun HLUTTAW KOSALE (MP) nan si ve ko lai, election ah i cuh ve ding zong nan tihawh a si lo” tiah ralṭha ngai in a rak chim. Amah lawnglawng hi ralṭha ngai in 25% a doh ngamtu a rak si.

NLD palai pawl nih an duhning in thil a kal ti lo caah boycott an tuah thulh, a hnu 29 November 1995 ah steering committee nih NLD palai pawl cu Conference in a chuah (expelled) hna. NLD party nih 1990 elcetion ah mipi nih zumh in mee pekmi (mandate) an sinak kha hman in, an mah NLD palai pawl nih National Conference (AMYOTA NGILAKHAN) ah mi tam u (majority) kai ding le National Conference pi a hruaitu le an mah NLD lungtling pinak um loin zei bantuk upadi hmanh serkho lo ding drihmun kha NLD nih an serding a si.Anmah NLD nih mi tampi (phu tampi) sawm ding biatung an dirh caah,

NLD palai cu Conference kaimi ih 15% lawng an si i, a donghnak ah cun anmah tel lo zong in quorum a tling ṭhiamṭhiam i Conference cu an rak peh thluahmah ko cang. A ngaingai ti ahcun Lothlo pawl, Cozah riantuan pawl, ALOHTAMA pawl le Fimthiam pawl kha sawm ve ding hrimhrim a si lo. Fimthiam pawl kha Sawm ve mi pawl (PHEIH KYA TINHTU MYA)ah telhding a si. Palai 700 chung ah NLD palai 392 + party palai he 400 + an kai kho ahcun NLD biatung ning in upadi cu serding a si ko hnga.

A tawinak in chim ah cun 1993 National Convention cu mipi nih thim lomi (ralkap nih handpick mi) hna he tuahmi a si i cu Conference nih nihin kan ngeihmi 2008 Phunhrampi cu a chuahpi. U Aung Shwe le NLD party ruangah 2008 phunhrampi kan ngeihmi a si ti ahcun a zapi cu kan palh lem lai lo dah. Main culprit cu Ralkap an si ko.Khun Tun Oo zong Kawlram mipi caah ralṭha ngai in bia a chim ruangah 7 February 2005 ni ah ralkap cozah nih an tlaih i kum 93 chung thong thlak ding bia an chahpiak.

Khua a sih tuknak Kachin ram Putao thonginn ah an rak chiah behbeh. Vawleicung ram tampi nih Khun Tun Oo le a dang Kawl ram political activist minthang pawl luatnak caah an zuampiaknak thawng in 13 January 2012 kum ah Min Ko Naing, Ko Jimmy te pawl he luatnak an hmuh (LUATNGIN CHAINTHA KHUNH). Khun Tun Oo hi Europe ram tam nawn nihminṭhatnak roca an pekmi mi roling a si.

Amnesty International nih Khun Tun Oo cu ‘Prisoner of conscience’ (a zumhmi a dirhpi ruangah thong tlami) tiah min pek a si.
Note: Hi kong hi kan pa Dr. Hmuh Thang nih tlamtling tein aa cinken ko lai. Mara Peoples Party in Pu Ro Uk (tleicia) zong a rak kai ve. Pu Ro Uk hi keimah he aa kawm tukmi ka hawi ṭha le University kai ṭimi kan si. CNF Secretary Pu Htet Ni i a upa a si.

Crd Pahmun

Be the first to comment

Leave a Reply

Your email address will not be published.


*