KHAH NLD PAWL CU CNLD NIH FIANG TAKTAK IN LEHNAK AN TUAH CANG HNA HIH

NLD Sin Bialehnak Part 1: 2020 October 20 ah NLD nih NLD Tiluan timi cazual an chuah. Cu chung ah Pu Tial Ling nih ‘Hakha NLD Response” tiin tlangtar cabia a tial i CNLD nih kan chim mi chung in a si kho lotiah a ruah mi le kan chim lomi chung in purhdah bia tete lehnak a kan tuah. Atang No. 1, 2 le 4 hi a kan lehnak chung in a si i a dang cu NLD nih Campaign an kalnak ah an kan timi chung in a si. A hnu ah atang mi lehnak kan tuah than te lai.

Pakhatnak. Pohmah 261 hi kan remh ahcun ralkap nih CM a ṭuan lai caah remh kan duh lonak a si?  Pakhatnak ah NLD nih kanmanh lawnglawng nih cozah kan ser lai an ti zungzal ko bu ah ralkap cu zeitindah Chief Minister (CM) cu an pek hna lai. Phunghram ah President nih Chief Minister cu ramkulh hluttaw kuzale chung in a thim lai, ti a si. Tlangcung Party nih kanmah le ramkulh cio ah teinak kan co bu ah, hal awk um mi cu ralkap 25% chung in maw NLD nih CM cu a thim lai.

Kawlrawn ah cun Democracy a ṭanhtu phu (NLD, UBP, PP, PPP tbk) party nih an tei ko lai. USDP nih a tei in ralkap he cozah an sernak lam a um lo. A ruang cu mizapi nih USDP cu ralkap he kan hmuh chih hna caah cozah an ser khawh tiang in MP an tling lai lo ti a fiang. NLD an lung a thian ko ahcun ralkap chung in CM an thim hna lai lo. Tlangcung mi zong nih ralkap CM ṭuan cu kan cohlang kho hrimhrim lo.

Cucaah, NLD nih 261 Phunghram an remh duh lo nak Policy phen ah aa thup mi tlaihtleng (Unwritten Policy), a fawinak in tlangcung mi kut ah nawlngeihnak phakter an ṭihnak, a ruang dang zong a um kho. NLD hruaitu lu bik pawl lawng nih an hngalh lai. Chin NLD hi an chimh hna lai ti kan zum lo. MP an i cuh le cuh lo hmanh i fiang lo in cabawm an hngah lio ah a chung bia cu an chim hna lai zumh a um lo. Anmah ruahnak sawhsawh in mizapi lung luhnak caah chim sawh mi a si.

Daw Aung San Suu Kyi zong nih ralkap nih CM an ṭuan lai caah kan remh lonak a si, tiah a chim bal lo. NLD nih an thanhmi le an ṭial mi policy chung zong ah kan hmuh bal fawn lo. Tlangcung mi, mizapi nih duh mi CM chuaher an duh tak ahcun “Chief Minister cu Mizapi nih thim mi Ramkulh hluttaw kuzale chung in thim a si lai,” tiin remh khawh mi pohmah a si. Ralkap cu mizapi thim mi an si lo caah CM an si khawhnak lam a um lo. Cucaah, Pu Tial Ling nih bialehnak a kan tuah mi “Federal lei panhpi loin hnukirnak a si kho,’ a ti mi hi “Federal phung kaltak in hnu ah a kan kirpi” tu a si deuh.

Pahnihnak. CNLD nih Chin Cozah a tlaih ahcun budget a zor lai tiah a kan ti? NLD le USDP nih mizapi ṭhihphaihnak ah an hman mi a si. 2010 thimnak lio ah Hakha, Thantlang le Falam ah Miphun party nih teinak kan rak hmuh dih. Asinain budget a rak zor hlei lo. Peng dang nakin a tam deuh kan rak hmuh lehlam. Kan thim mi hna MP nih an rak chimrel khawh caah a si. Kanmah thawng in budget a let in aa chap, an ti.

NLD tuah mi a tampi ve lai nain 2010-2015 kar MP le rianṭuantu hna kutneh le anmah nih hram an rak domh i, nihin tiang pehzulh in ṭuan mi a tampi ve. Tahchunhnak ah, Kaladan Project (Kaladan Multi-Modal Transit Transport Project), Matupi – Palewa lam, Tidem- Ṭio lam, Hakha – Thantlang – Saisichuak lam, Thantlang – Tlanglo – Ṭio lam, Tinam – Ruan – Khanhran lam, Timit dinti (kha phanh tiang) Ma-ha-dat-Aa Electric (Khuapi in khan 10 a hlatnak khua kip ah mei pek ding in timhtuah cia a rak si.

NLD nih nihin tiang a pehzulh kho lo), Hakha pengkomh (District) kan ngah caah pengkomh he aa tlak in ṭhanchonak, inn le zung vialte aa chap, Hakha College kan hmuh caah College nih a ngeih ding mi tahfung (Criteria) he aa tlak in zung le innlo tampi a hun i chap. Hi chung ah hin USDP cozah chan ah Miphun Party MP nih tampi an chimrel / tuah mi aa tel. CNF le Cozah hnatlaknak zong an si. Cucu NLD cozah nih pehzulh ding tluk in a pehzulh kho lo. Cucaah aho party an kai zong ah ramkulh budget a zor hlei lai lo.

USDP chan 2011 – 2015 le NLD chan 2016 – 2020 kar Budget a kai ning cuan usih. USDP chan in NLD chan – Kachin ah billion 552 in billion 1057, Arakan (Rakhine) ah billion 552 in billion 1031, Mandalay ah billion 702 in billion 1872 ah, Chin ah billion 350 in billion 864 (Pu Tial Ling nih hi zawn cazin a langhter mi a tlawm deuh), Rangoon ah billion 1433 in billion 3679 tiin a kai cio.

Budget a karh ning zoh tikah khoika ramkulh paoh ah a kai dih. Miphun Party teinak an hmuhnak Shan le Rakhine hmanh ah kanmah Chin ramkulh nakin a kai. Zei ruang ah, cozah a rian cu sifak le hartonnak le herh deuhnak ah rianṭuan awk a si. Cozah tangka a kainak a ruang cu USDP chan ah ramdang cozah sin ah phaisa a cawi mi dihlak hi USD in 8 billion lawng a si i NLD nih let thum in USD billion 24 a cawi. Kawlram tangka in billion 34,800 Ks a si.

Pumpak ngunkhuai, Company pek mi ngunkhuai le Kawlram chuak thil mansung in rampi Budget zeizat liangluang dah a si rih lai. Mah hi kum 5 chung ah Chin ramkulh caah billion 800 fai cu a tlawm tuk rih. Ramdang tangka cawih mi hmanh ramkulh le ramthen 14 then in billion 2500 tluk kan tinco ding a si hnga. NLD chan ah US cozah nih sipuazi phihkharnak a tuah tikah ramleng chawlut a karh. Daw Aung San Suu Kyi hruainak in ramleng vuanci zung nih Development Assistant Coordination (DACU) an dirh i ramdang NGOs bawmhnak cu cozah sin in tampi a kalter.

Cozah in tangka a lut tik ah Chin ramkulh ah NGOs riantuannak a zor deuh nan theih cio mi a si. Cucu ramdang NOGs bawmhnak cu cozah nih a lak hi a ṭuan deuh caah a si. Cu lawng a si lo. AUSAID le Europe cozah zong nih NGOs he rianṭuannak an i timhmi DACU he an i ceihmai i amah duh ning in tuan khawh a si lo ruang ah AUSAID nih duh loin USD million 79 an kirpi. EU nih USD 300 million an kirpi (cheukhat nih ICJ ah Kawlram nih ralkap a dirpi caah EU a kirnak cu aa tel, a ti mi an um).

Hi bantuk in Kawlram chung chuak tangka lut pin ah, NGOs bawmhnak cozah sin in a rat ruang ah le ramdang tangka cawimi a tam deuh caah Budget a karh hi a si. Hi vialte a cham ding hi ram mizapi lila kan si lai. Chin ramkulh cu thleidan kan ton ruang ah ralkap chan i University le Airport an kan tuahpiak duh lo hlei ah ngandamnak le fimcawnnak ah zeihmanh tling in kan ngei lo. UNDP nih Kawlram ah sifak bik ah a kan chiah mi a si. Atu bantuk in Budget a karhnak hi kan tinvo le kan covo a si. Hi nak tam deuh in Budget a kan chiahpiak awk hrim a si.

Pathumnak: Tivate cu tivapi ah aa fonh ko. CNLD thimfung pek cu NLD le USDP thimfung pek he aa khat ko. CNLD nih anmah te in cozah an ser kho lai lo i a ni le caan a phak tik ah NLD asiloah USDP ah an i fonh te lai an ti duhnak a si. Ramkomh Kawlram sernak ah tiva pi le tiva te ti in ser a si lo. Hihi Kawlram ramkhel tuanbia an hngalh lo caah a si. Chin le Kawl nih anmah le tiva sining in luang ve ko hna sehlaw, Kachin nih luang ve ko seh.

Ramkomh Kawlram sernak muru ah tiva te le tiva pi tiin kan ser lo i mah le miphun hrambunh in tlukruang tein kan ser mi a si. Tlangcung mi nih NLD le USDP tha kan pek hna caah tiva pi bantuk ah kan canter hna, a si deuh. Cucaah Tlangcung mi hi tiva te kan si naisai lo i Kawl hi tiva pi an si hlei ve lo. Kanmah le miphun sinak in aa thawk i ramkomh Kawlram (Union of Burma) ah rilipi bantuk in a ṭhawng mi ramkomh kan ser lai, tinak a si.

Cucaah tutan thimnak ah Chin nih Chin a thim, Kawl nih Kawl an thim, Kachin le Shan nih anmah miphun le a dang tlangcung miphun nih anmah le miphun Party cio an thim ahcun aho Party hmanh tiva pi a si kho lai lo. Ramkomh Cozah serṭinak ah Panglong biahrennak bantuk in I fonh in Union of Burma timi rili pi a serṭi ding tu kan si. Cucaah tlangcung mi le Chin miphun nih kanmah le kan ram le kan tiva tu hi tithiang in luanter hmasa usi law miphun dang tiva van puanter hlah usih. NLD le USDP cu ram pumpi Party an si kan ti mi kanmah tlangcung mi nih kan telpi hna caah kan nganter hna i tiva ngan (nawi) ah kan canter bia tu a si.

Palinak. Coalition Government (tangti cozah) cu Kawlram phunghram pi ah a um lo caah Kawlram ah coalition cozah a chuak kho lo. MP 664 chung ah MP 333 hmuh theng a herh lo. Tam bik a hmu mi nih President a thim lai i cozah a ser ko lai? Vawlei cung khoika ram nih ṭangṭi cozah tiin phunghram a ser mi an um lo. Cozah sernak ding ah MP tlingte in a ngah lo mi nih Party dang he i komh in ṭangṭi kha ser cio a si ko. Tahchunhnak ah Federal ram kan ti mi hna Germany, Canada, Australia le Malaysia hna khi ṭangṭi cozah in an ram an hruai lio a si. Hi ram pawl an phunghram ah ṭangṭi cozah ser ding tiah ṭial mi pakhat hmanh an um lo.

2015 bantuk in NLD nih MP ṭhutdan 664 chung ah MP zatceo nak tam (333) a hmuh loin cozah a ser kho lai maw? 2015 lio ah KNU le KIA tel in Tlangcung hriamtlai Phu tampi nih NLD an ṭanpi bantuk in Rakhine le Shan dah ti lo ti lo, Chin mi tel in Tlangcung mi nih NLD ah kan thimfung kan rak bungh dih cio. Tutan cu tlangcung mi nih mah le miphun party thimfung pek cio ding in timhcia an si cang. Rawn i MP ṭhutdan 291 a um chung ah NLD, PPP, 88 siangakchia hruaimi PP Party, SDP le Thura U Shwe Maan hruai mi UBP tbk Party tampi an i cuh ve.

Kawlram in ramkhel lei thiamsang U Kyaw Win le Ko Mya Aye a dang dang tibantuk nih cun NLD nih ṭhutdan 200 hmuh ding an i harh cang lai, an ti cio. NLD in U Win Htein zong nih rawn ah ṭhutdan 200 hmuh hi kan i harh lai, tiah RFA ah a rak chim bal ko kha mu. Cucaah NLD nih tutan thimnak ah cozah ser khawhnak caah zatceo nak tam a hmu kho lai lo i, duh zong, duh lo zong ah ṭangṭi cozah a chuak hrimhrim lai.

Panganak. Party zoh in maw, a minung zoh in dah kan thim lai. Techin fapar chan tiang a minung cu rohtak awk a ṭha lo. Techin fapar nih an zulh ding mi phunglam ṭha le zulhphung dik an ngeih khawh nakhnga lam sialpiak thiam a herh. Zeitluk hmanh in fim ko sehlaw, ralkap ah a um ahcun Chin miphun caah policy hram a thla kho lai lo. NLD le USDP ah a ummi Chin MP zong nih Chin miphun hmailei kan ram, kan vawlei le miphun himnak caah a hram a fek mi pawlisi an thla kho lai lo.

Zei ruang ah anmah te in Chin ram le Chin miphun kan humhimnak, kan limhang, kan ramri le vawlei kong ah pawlisi sernak nawl an ngei lo. Khrihfa biaknak cu a hram fek tein kan dirh khawh cang. Nain, a hram thlaknak ah kum caan saupi kan rau. Rianṭuantu a minung pumpak ah kan buai ti lo. Kan i hruainak phunglam a hram a feh caah a si. Phunglam nih lai a rel cang. Cucu kan pupa hna, Khrih lamkaltu ṭha hna nih an kan rohtak mi rosung a si.

Chin miphun kan ramkhel, kan miphun sinak, kan ram, kan vawlei a himnak caah aminung pumpak nih lai a rel lo. Phunglam le zulhphung ṭha tu kan ngeih khawh a herh. Cucaah pumpak ah buai rih loin Chin ram le Chin miphun caah ṭha tein a ser mi bu kha a thazaang kan ṭhawnter hmasa a herh. Techin fapar ca ah a ṭha mi phungphai kan roh hna ding a biapi tuk. Cucu CNLD le CNF tibantuk lawng nih kan tuah khawh ding mi a si. Cucaah aminung nakin Party a biapit deuhnak cu a si. Credit: CNLD Hakha-Thantlang

Be the first to comment

Leave a Reply

Your email address will not be published.


*