Khah Falam Mino Hmanh An Um Kho Tilo Thantlang Ah Choi An I Tim Cang

Falam khawpi ih Falam Mino pawlkom cun Mai Sui Hlei Tial ih sungte pawl cu Thantlang ah feh in topinak an neih ding thu an than ih topinak ah sumpai ih tel ve duh hrang caan an ong hrih. Tui zarh zarhpi ni October 11 tiang topitnak ih tel duh hrang caan on a si ih ramsung ramleng Falam Mino zokhal tel theih a si thu an tarlan.

Falam Mino Pawlkom ih thuthanmi cu “Insungsang nuntu khawsaknak hrang ruat in Malaysia ih hna va tuantu kan Chin fala Mai Sui Hlei Tial in a duhdawtmi le a seherh zetmi innsungsang,sungkhat unau le thianrual tha pawl tanta in mual a liamnak parah a tantakmi innsungsang pawl thawn kan lai nunphung ten thlanmual lamih thlahawknak nei thei lohli loin lamzin kap ah mitthli thawn caan an rak hmanmi parah Falam Mino Pawlkom, Falam cun’ kan thinlung takin kan tuarpi ve a si.

“Kan naunu le a innsang ih an tuarmi mangbang vansangnak le mitthli tlaknak hnem ve dingin Falam Mino Pawlkom, Falam cun Laimi pawl in “Khuahar innsang thlakung zawnnak kan neih theu vekin” tuarpinak langternak hrang sumpai te thawn va lengin va hnem ve kan tum. Falam tesinfa zaten Mai Sui Hlei Tial le a innsang ih tuarnak hi kan topi duh ve cio ding ti ih ruahnak kan neih ruangah Falam Mino Pawlkom, Falam (FMP,Falam) cun thaisun ihsin tui’zarh zarhpi ni tiang Mai Sui Hlei Tial le a seherh zetmi a innsang pawl ih tuarnak parah hnemnak a pek duhtu pawl hnen ihsin tuarpinak sumpai cohlang in

Thantlang lamah tuarpinak pek dingin ruahmannak kan nei, Cui’ a si ruangah Falam khua sung le hmun dangdang ih a ummi Falam tesinfa pawl lak ihsin tuarpinak pek a duhtu pawl cun hi capi ih tarlangmi FMP, Falam Office Board pawl hnenah pehtlaih in mah le ti theitawk cio suah ih tuarpinak rak pek ve cio dingah Falam Mino Pawlkom, Falam in kan lo sawm.Hminsin: Thuhla fiangfai thei duhtu cun FMP,Falam Office Board pawl hnenah pehtlaih ding a si. Sumpai pekhlannak nei kan duh asile FMP, Falam Sumkil Mai Fibi Ni Nuam Thluai hnenah pehtlaih in pekhlannak nei ding a si.

Mai Sui Hlei Tial tuarpinak hrangih tuahmi fund hawltu pawl hnenah pehtlaih in pekhlannak nei ding kan si,” tiah an tarlang. Falam Mino Pawlkom cun Mai Sui Hlei Tial ruak thu ah dinak umseh tiin ca an rak suah zo ih pawlkom dang bangin diknak hrang tanla rero khal an si.

Pehtlaih duh hrang Hotu Salai Biak Lian Sang ( Ph:09400305427 ), Hotu sang Salai C.Dik Thang ( ph:09440945101 ),Sungtuan Salai Lal Than Pui ( ph:09265941424 ) le Sumkil Fibi Ni Nua Thluai ( ph:09257438944 ) pawl cu biak theih an si.

Crd:

Be the first to comment

Leave a Reply

Your email address will not be published.


*