KHAH A FIANG TAKTAK CANG HIH THATEIN THEI CIO HRIMHRIM UH

Vice President Henry Van Thio nih Chin miphun caah a ttuanmi le ttuan ding aa tinhmi cheu khat. A luan ciami May thla ni 12 ni chun ah Chin miphun kan Pu Vice President Henry Van Thio nih phone in a van ka chonh i suimilam pakhat chung deng phone in bia kan i ruah. Bia a ka chimhmi hna hi ka ruah tik ah ka khuaruah a har tuk.

Kan Pu Henry Van Thio hi tluk awk a rak ttha bak lo a ruahmi zong hi a rak thuk tuk. Chinmi tthancho nak ca ah tluk awk ttha lo in rian tamtuk a ttuan ti hi fiang tuk in ka hmuh.2015 kum lio thimnak tuah lio ah Amyotha hluatdaw in MP kan rak i cuh tti. A nih hi NLD in aa cuh i kei hi CNDP in ka rak i cuh. A nih hi NLD a si tak le si tak lo cu kaa fiang lemlo. NLD nih an fial ca zong ah a si kho men.

Keimah zong CNDP lutmi cu ka rak si lemlo. Anmah nih an ka fial tuk ca ah CNDP in ka rak i cuhnak a si ve. Ka tei hrim lai ka ti i kaa zum ngai. TBC zingpumh dih ah bia an rak kan chim ter. Keimah bang biachim thiam cu a si lemlo hih tiah ka lungthli te in ka ti colh. Chin ram in zei dang chuak lo in zuthawl lawng te Kawl lei ah an zuanpi, kan tthangcho lo tuk i khua ruah har kan si tiah a chimmi cu ka hnatlakpi tuk.

MP nan ka peek a si ahcun kan Chin miphun fim thiamnak ah kan tthancho khawhnak hnga le kan i pehtlaih nak lam le sul vialte hi papeek in ttuan ka duhmi a si tiah fiang tein a chim. Kei zong nih ka si khawh tawk cun Chinmi ca ah ttuan ka duhmi cu ka chim ve. Mah ah cun biakamnak ka rak sermi cu aa teimi paoh paoh i bomh ding tiah a rak si.

Thim lai thlakhat duh tiang i mipi awaan ngaih tik ah ka rak tei ngai. Mipi ruahnaak kha media cheukhat nih an rak laaknak zong ah percent tamnawn in ka rak tei deuh.Thimnak van tuah lai te ah cun a minung zoh lo in a party zoh uh thlen can a cu cang ti kha NLD party nih an vun au tik ah Chin ram lawng si lo in ram pumpi ah NLD nih van tei cikcek a si i mithi ciami hmanh kha NLD party cun MP a rak tling.

Cu ti cun Pu Henry Van Thio nih cun a mah he MP aa cuhmi vialte cu laak awk tlaaklo in a rak kan tei dih cikcek. Me an van thanh ni ah thim hlan i ka biakamnak bang lung nuam te le kut tlai in hman kan i thla tti.Vice President a hung chuah tik ah Naypyidaw khualipi Hotel pakhat ah kan chungkhar te in thlacamnak kan rak tuah piak.Cu ni cun ni hin ni tiang a ca ah hin thlacam tu kan si ve.

A tu a rian ttuan khawh ning le a rianttuanmi tete ka hmuh tik ah ka upat tuk i tluk awk a rak ttha hrimhrim lo ti hi ka hmuh.A rian ttuanmi hna cheukhat-1. Halkha ah tikhor a cawh ( mah hi ka khuaruah a har taktakmi a si. Ka ruahnaak zong nih a phan lo. Halkha nih kan herh bikmi ti hmuh khawhnak ah ti Khor tampi a cawh ter cang hna. A ho val nih an ruat kho cio lailo ka timi bak a si ).

Pahnihnak: Yangon ah Chin miphun vialte i fonhnak All Chin Society caah hmun ttha tukmi Ekah 4 deng hmuh khawhnak a kan tawlrel piak. A ting in cun ting tamtuk man a si. 3. Chin State khua tampi ah Myo a kan peek piak khawh. Kan Phe tthan te lai. JP Biak Tin Thang