KHAH A FIANG CIKCEK KO HIH PARTY FONH COZAH A UM KHO MAW TIMI CU

Fonhkomh Cozah (coalition government) A Um Kho Maw? Myanmar ram kan hmanmi 2008 Constitution he pehtlai in thiamsang ka si lo tikha chim hmasa ka duh. Amahbel 2008 Constitution le President/Vice President thimnak upadi zoh chih in rak t’ial kaa zuam lai. Cheukhat nih Myanmar Constitution ning in Fonhkomh cozah a um kho lo, Pyidawungsuh Hlutdaw ah palai 333 tlin lo zong ah thimfung a zatawk (300) hrawng a ngahtu party nih cozah ser khawh a si ko a ti mi an um pah.

Kan zoh tuah lai. 2008 phunghrampi ning in President nih Ministers le Chief Ministers thim a si ca ah President a ngah mi Party nih Cozah an ser khawh lai ticu zapi hngalh cia a si. Hika zawn i President a tlin khawhnak lam zoh hmasa tuah usi. President thimnak tuah a si hlan ah Vice President pathum thim hmasa a si.

Amyota Hlutdaw inVice President pakhat an thim lai. (ralkap palai an i tel lai lo) Cun Pyituh Hlutdaw in Vice President pakhat an i thim ve lai. (ralkap palai an i tel lai lo) Amyota le Pyituh Hlutdaw fonh ralkap palai nih Vice President pakhat an i thim ve lai. Mahti Vice President pathum an thimmi cu President t’uan an i tlak maw, tlak lo tikha President thimnak committee nih an zoh hna lai i an tlin ahcun Pyidaungsuh Hlutdaw ah Vice President pathum cu an chuahpi hna lai.

Amyota hlutdaw palai 168 (ralkap tel lo) chung ah tlangmi palai 84 an i tel. Tikah hika Amyota Hlutdaw ah NLD nih buaktlak in palai 100 tling kho selaw Vice President kha a duhmi a thim khawh. Amahbel NLD nih palai 100 ngah kho loin 80 lawng ngah sual selaw Vice President a thim kho ti lai lo. Midang Party palai 5 aa sawm khawh lo ahcun Vice President a sung cang lai.

Midang party an dihlak fonh in an hnatlak mi Vice President pakhat an thim khawh lai caah NLD nih Vice President a sung hnga. Cu caah Amyota hlutdaw ah NLD nih Vice President thik khawhnak ding ca a tlawm bik palai 85 teinak a hmuh hau lai. Cun Pyituh Hlutdaw palai 330 (ralkap tel lo) chung ah tlangcung palai 123 an i tel. Tikah hika Pyituh Hlutdaw ah NLD nih buaktlak in palai 200 tling kho selaw Vice President kha a duhmi a thim khawh. Amahbel NLD nih palai 200 ngah kho loin 160 lawng ngah sual selaw Vice President a thim kho ti lai lo.

Midang Party palai 6 aa sawm khawh lo ahcun Vice President a sung cang lai. Midang party an dihlak fonh in an hnatlak mi Vice President pakhat an thim khawh lai caah NLD nih Vice President a sung t’han hnga. Cu caah Vice President thim khawh ding cun Pyituh zong ah NLD nih a tlawm bik palai 170 cu a ngah a herh.

Hika Amyota Hlutdaw le Pyituh Hlutdaw ah NLD nih Vice President an thim khawh hei ti ko usi. Ralkap nih an rak i thim ve mi Vice President he Pyidaungsuh Hlutdaw ah chuahpi cio i President thimnak tuah a si lai. Pyidawngsuh hlutdaw ah palai 664 an um i cu chung ah ralkap palai 166 an i tel. Ralkap an dihlak in anmah nih an thimmi Vice President kha thimfung an pek lai a fiang.

Zapi nih kan thimmi palai 498 nih an duhmi Vice President kha thimfung an pek ve lai. NLD nih an thimmi Vice President pahnih kha thimfung pek ding a si hnga. NLD nih Pyidaungsuh Hlutdaw ah palai 300 an tling hei ti ko usi. Party dang (independent zong) 198 an taang rih. (fonh 498) Anmah NLD an dihlak palai 300 ning in Vice President pahnih an thim mi chung khan an duh deuh mi kha President ca dingah thimfung an burh viar hnga. Ralkap nih 166 an ngeih ve kan ti cang.

Adang Party 198 nih NLD thimmi kha President ca thimfung an pek ve ahcun NLD nih President a co lai i Cozah a ser kho hnga. (NLD nih ho party kai sawm lai lo a ti tikah palai 333 hmuh aa zum pah si dawh si) Asiloah palai 198 nih NLD thimmi pe ti loin ralkap 166 nih an thimmi Vice President kha thimfung pe hna selaw Ralkap nih President a ngah hnga. Ralkap nih cozah a ser khawh lai. (fonh ah 364 a si lai caah NLD a tei hnga. Hihi Maths kanaan tuak ning tein hei ruahdamh sawh bia)

NLD nih Vice President ca an thim mi pakhat a taang rih cu mu. Mah zong cu Thimfung a pe an um khawh ko ca ah a cunglei buaktlak ning a va si kho lai lo. (Vice President Henry Van T’hio zong kha thimfung a ngahmi zei a um theng lo kha mu..). Cu caah NLD palai 300 ngah men in President a thim kho lai lo a fiang. Ho party hmanh kaa ruaih (sawm) lai lo a ti nain Pyidaungsuh Hlutdaw ah palai 333 a tlin lo ahcun i ruaih loin President a tling kho ti lai lo. President a tlin lo ahcun Cozah a ser kho lai lo.

Cozah ser a duhmi nih Pyidaungsuh Hlutdaw ah palai 333 a ngeih hrimhrim a herh. (Dr. Ngun Cung Lan bia bang in Ralkap le Tlangcung mi kan i kop lai i President kan t’uan khawh a timi kha mahka zawn cu si dawh a si), Ralkap palai 166 le a taangmi 198 ka fonhmi khi thil umtu ning zohchunhnak men a si. NLD party a si lo mi poh ralkap he an i kop lai tinak a si lo. Fonhkomh cozah a um kho timi langhternak ca men tuaktanmi a si.

Biakilh: NLD nih Amyota le Pyituh ah Vice President aa thim khawh lo sual ahcun party dang aa ruaih (sawm) hrimhrim a hau hnga. Ho party kaa ruaih lai lo a timi hi Tlangcung Miphun pawl nih kanmah NLD hi a kan UAR tuk i tlangcung zong ah kan tling t’han lai ti an i ruah ca zong a si kho.Credit: Salai Thawngpi/Ramthlo

Be the first to comment

Leave a Reply

Your email address will not be published.


*