PU HENRY VAN THIO (VICE PRESIDENT) NIH SAWMNAK ATUAH VE CANG

Laimi Kanpa Pu Henry Van Thio, Kawlram Vice president nih Thantlang peng mi vialte sin ah sawmnak atuahmi asi. Hi ca hi amah nih a chim bantukin Thantlang peng chungah a ummi khua vialte hna nih kanmah le kan khua biaruahnak vialte ah thawngthanhnak tuah cio hna usih tiah sawmchih kan duh hna. Atanglei bangin Pu Van Thio nih sawmnak atuahmi cu asi.

Dawtmi Chinmi nulepa unau dihlak Pu Van Thio Fans in nan kut kan in tlaih hna. Thaizing cun kan rampi thimnak a si cang lai. Campaign tuah a ngah ti lo caah hikaa hin thawngthanh kan in duh hna.A tang i hmanthlak hi nan khua biaruahnak cio ah nan ka share piak dingin zaangfah kan in nawl hna. Bawipa nih thluachuah in pe hna seh.

Pu Van Thio Mee Pek Sawmnak. A kan dawtu Thantlang Peng Nupa le mipi vialte hna, Keimah Pu Van Thio nih nan kut kan tlaih tthan hna. Keimah cu Thantlang Peng mipi nih na ka dawt i, nan ka thim caah 2015 ah MP ka tling i, NLD le Daw Aung San Suu Kyi dawtnak le Pathian lamhruainak thawngin Vice President 2 dirhmun tiang ka phan.

Dawtu Thantlang peng mipi, NLD le Pathian cungah kaa lawmtuk. NLD policy ningah VP a ttuan ciami cu an ttuan lio ah ningcang tein an ttuan khawh i an i cuhnak peng i, an hawi le NLD candidate vialte zong nih teinak an hmuh ahcun Vice President ttuanter tthan ding ti asi caah ka hawi le vialte teinak an hmuh ding hi a biapi tuk.

Cucaah kan miphun thanchonak ruat in keimah hmun te ah kan thut khawh tthan nak hnga ka hawi le asimi Pu C. Za Cung, Pi Ni Sui Lian le Pu Chan Ham hna zong mee nan pek hna nak lai toitornak he zaangfah kan nawl tthan hna. Bawipa nih kan Chinram le Miphun thluachuah ko seh, Lawmhnak he, Nan Dawtmi Pu Van Thio. Credit: Pu Van Thio Fan.

US Thawngpang: Tutan i Thimnak hi Kanmah nih kan Tei lai, Biden nih Chimchungnak a Tuah Cang. TV networks pawl nih buancotu, tiin an ka thanh rih lem lo nain, Trump hi ka lonh chin lengmang cang caah, US Presidency cu keimah ta a si ko cang lai, tiah Biden nih a chim. Vote a zat nih a kan fenh cang ko…a fiang cang, i hnangampi tlak tuanbia a si ko cang. Hi zuamnak hi kanmah nih kan tei hrimhrim lai. White House luut dingin keimah le ka hawinu Harris nih experts pawl zong kan ton cang hna, tiin Biden nih a chim.

2000 hnu ah a tutan tlukin buan a comi mizei a si, ti thei lo in American mipi nih dide an hngah a saubik a si lai. Election Day ah mipi ton a ngamh lo in Covid nih mitampi cu a chiatchuah dih fawn. Vote relding hi a thong a sang in a taan rih caah, faaktuk i president i cuhnak zeitik a dongh te lai ai hliah rih lo. Biden a tanhtu pawl cu Philadelphia lampi ah khuang an cawi hna lio ah, Trump a tanhtu pawl cu Phoenix le Detroit ah meithal i ken in an i, tette thitha an langhter kho lo nain, Tutan election hi fir a tong” ti bakin an au ve hna.

Saturday ah khin “Stop the Steal” (Firnak hi kham cang u) timi tlangtaar i ken in Trump tanhtu tampi vah an i tim. Biden cu a khua Delaware ah timhciamnaam tein teinak puai tuah i biachim ai tim cang ko nain, TV networks le a dang election thawngthanhtu pawl nih na tei cang tiin an thanhmi a um rih lo caah, duh ningin bia a chim than lo. Trump caah cun lam a har chinchin cang. Biachahnak a tuah kho tu state 4 (Pen., Geo., Ari., le Nevada) ah Biden nih a chawhkanh ciahmah cang caah, Trump cu Friday ah khan cun White House ah a muithlaam a leng ti lo. Vote 147 million chungin Trump hi 4.1 million tlukin ka lonhnak a ruang cu, kan mipi nih hin pulrai tawlrel dingin siseh, vava a tum cangmi kan economy chanhchuah dingin siseh, climate change le systemic racism (ciamnaamtein kalpimi miphunthleidannak) hi tawlrelter an ka duh caah a si, tiah Biden nih a chim.

Kan ram hi i funtom cang seh, pehzul in i thentheek ti sawhhlah seh, ti an duh caah a si, tiin Biden nih a chim. Saturday ah khin American mipi sinah biachimnak ngeih than khawh kai zuam lai, tiin a chim. Trump i a Republican a hawile pawl nih tutan i thimnak a phichuak kongah tazacuainak tuah dingin $60 million bak fund an chuahpi cang. Hrihhram um theng lo in lihpuhnak an tuahmi kalpi dingin Trump cu a lung a thawng peng ko rih. Asinain, tazacuainak tuah a timhmi hi thitha in tawlrel zong a si lo, tiin amah a minung lila nih an chim. Nihin tiangah cun zei biaceihzung hmanh ah an hlawh a tling ruam rih lo. Edison Research nih an chim ningah, vote an relnak ni 5 chung i Electoral College vote in Biden nih Trump hi 253 a lonh cang caah, hihi teinak a hmuh lainak biachattu a si ko cang, ti a si.

Electoral vote 20 ai ngeihmi Pennsylvania ah buan a co thai ah cun, President si khawhnak dingh a herhmi 270 electoral vote hi zangdam tein a hmuh cang lai i, Politics i kum 50 deng tiang a tlonlen hnu ah president dirhmun a phan kho lai. Cu ti a si lo zongah, a dang a taangmi state 3 ah buan a co ah cun, teinak a hmu thiamthiam ding khi a si. Pennsylvania bangin, a dang a tangmi state pawl nih Friday in cu vote rel an lim cio te lai. A tomtom in a phaan mi mail-in ballots cu officails pawl nih an vun rel i, Friday zingka ah khan cun Nevada le Arizona ah cun tlawmte lawngin Trump hi a lonh. Pennsylvania le Georgia tu ah cun Trump a lonh ning a faak ngai.

Arizona ah hin vote a lutmi hi 97% tiang a si cang i, Biden nih 29,861 tluk in Trump hi a hleih i, Nevada ah cun vote a lutmi hi 93% tiang a si cang i, Biden nih 22,657 tluk in Trump hi a hleih. Georgia ah cun vote a lutmi hi 99% tiang a si cang i, Biden nih 4,289 in Trump hi a hleih i, Pennsylvania ah cun vote a lutmi hi 96% a si cang i, Biden nih 27,130 in Trump hi a hleih.Vote rel mak dingin Trump nih a au len mi hi san a tlai hlei lai lo, tiah Biden nih a chim. Mipi pawl, nan vote hi rel a si ko lai. Aho pa nih khamh an timh zongah zeiah ka rel lo. Kham dingin ka onh hna lai lo,” tiin Biden nih a chim.

Trump a campaign tuahtu pawl nih tazacuainak a phunphun an chuahpi cang bangin, a tutiang ko rih ah cun Trump hi a sungh a khaan ruam rih lo.Asinain, cu ti tazacuainak nih cun tutan election a phichuak hi a thleng kho hlei lai kan zumh lo, tiah legal experts pawl nih an chim. Ningcanglo piin President office tinco hi Biden nih ai timh hrimhrim awk a si lo. Cu bantuk tuah cu kei zong ka thiam ve ko teh. Legal (upadi) ningtein cawlcanghnak kan thok cang,” tiah Twitter ah Trump nih a tial.Tazacuainak dingah, tiin Republican nih phaisa an chuahpimi hi $60 million hrawng a si.

Asinain, hnarcheu hi cu an campaign leiba chamhnak ah chiah piak dawhdang an si. Tazacuainak an kalpi ning hi a buaibaituk, thate zongin an tawlrel lo, tiah Trump adviser nih a chim. Hi tazacuainak nih hin Trump buan a coter lai, ti cu zumh awk a har ngai, tiah Republican official pakhat nih a chim.Tutan i thimnak hi a dih ko cang. A dih cang, tiin a hmu fiang kho lo tu cu amah Donald Trump lawnglawng hi a si cang,” tiah cu official nih cun a chim. Amin bel langhter a duh lo.Trump nih heh ti i tan a laak lio ah cun, White House chief of staff Mark Meadows cu Covid-19 nih a tlunh ve hoi. Anih zong hi mask hruk huaha lo in Trump pawng lawngah ai zel pengmi a si. (Biden nih Arizona i Trump a hleihmi hi a karh lei a panh lo, tiin langhter dingah paragraph 7 hi remh a si.).WILMINGTON, Del./WASHINGTON (Reuters). Catialtu: Chelsea Bawi

Be the first to comment

Leave a Reply

Your email address will not be published.


*