KAN LAI PASTOR REV BAK NIH BIDEN CAAH VOI TAMTUK BAWMHNAK ATHAWH

USA ah pastor a ttuan mi Rev. Zammang Mual Cin nih Joe Biden Campaign tuahnak caah phaisa voi 12 bak a rak pek ve nak le Joe Biden President a tlin ruang ah aa lawmhnak cu a pumpak social media cahmai in a langhter ve.USA ah Miphun thleidannak, minak Mirang, Asia ti bantuk titvun le sinak ruang ah tleidannak um ti hlah seh timi a saduhthah te zong a langhter chih i,

USA ah a chuak mi, USA ah khua a sa mi Chin miphun dihlak zong Secondary Citizen menmen an si ti lo ding mi a saduhthah zong a langhter mi hmuh khawh asi. Hi ka zawn a chim mi te hi cu ruah a phu ngai ngai. Rev. Za Mang Mualcin nih “Kan chaw a umnak ah kan thinlung zong a um i kan thinlung a umnak ah kan chaw zong a um. Biden Campaign caah voi 12 bak ka chaw ka pek ve.

Takvun le Miphun thleidannak ram ah US can ter ding cu ka ruat kho lo. Ka fale le ka tule hna secondary citizen an rong si ding cu ka celh lo. Ka thlacamnak Pathian nih a tlinter ti ka zumh. Freedom of Choice is the core value of Democracy. Nihin thokin Biden cu legally and officially US President t’uan dingah American mipi nih an thim cang.

Pathian nih VP elect Kamala Harris he vawleipi remdaihnak ca tiangin hmang ko hna seh” tiah a langhter hi asi.Laimi chung in USA election Campaign caah phaisa a thawh mi kan um len ve ko lai, a si nain Rev. Za Mang Mualcin nih a catial mi te hi kan duh tuk ruang ah kan rak langhter chin mi a si.

Relchih:AA hriamtlai nih an tlaih mi Salai Aung Soe cu thla 4 hnu ah an thlah than cang. AA hriamtlai nih an tlaih mi Chin pa Salai Aung Soe cu thla 4 le ni 16 hnu ah an thlah than i, dam tein Paletwa a phan, tiah kan theih.Salai Aung Soe hi 2020 July 29 ah AA hriamtlai nih an tlaih i, 2020 December 15 zaanlei suimilaam 1:00 hrawng ah an thlah than hi a si.Salai Aung Soe an tlaih hi thla 4 leng a rau cang. An tlaihka le an hren chung vialte AA hriamtlai upa hna nih kan tlai lo tiah an i pheh peng.

Zei si poh ah, KACC nih Salai Aung Soe a luat than mi kong ah chungkhar ai-awh in kan i lawm i, a luat nakding ca ah a kan bawmtu vialte cung zong ah lunglawmhnak kan langhter,” tiah KACC nih 2020 December 16 ah cathanh an chuah.Chin Ramkulh Paletwa Peng le Rakhine Ramkulh chung ah ralkap le AA hriamtlai hna buaibainak chirhchan in a ruang um lo le sualnak a ngei lo mi khuami tlaih mi hna Myanmar ralkap nan si zong ah, AA hriamtlai nan si zong ah a ran khawh chung in kan thlahpiak hna u, kan in nawl,” tiah cathanh ah an tialchih.

Hi kong ah KACC le RRCCI in Chimphuannak Nawlngeitu Mai Nang Wai nih, “December 12 lio ah khan AA lei nih Salai Aung Soe chungkhar a thli in an rak chawnh hna i, kan rak thlah lai an ti. Cu tik ah chungkhar nih aa naihniamnak bik tiang an va don i, December 15 chun suimilaam 1:00 ah Paletwa a phanh hi a si. Atu tiang ahcun hliamhma a ngeih le ngeih lo zong kan thei rih lo. Kan theih ning ahcun a dam ko an ti.

Amah he bia kan i ruah kho rih lo i, zeihmanh tling tein kan thei kho rih lo,” tiah The Hakha Times ah a chim.Salai Aung Soe le a hawile minung 3 cu AA hriamtlai nih July 28 ah an rak tlaih hna i, a hawile cu tuan ah an thlah than hna nain, Salai Aung Soe cu thla 4 hnu lawng ah an thlah hi a si, tiah kan theih. Credit: The Hakha Times.

Be the first to comment

Leave a Reply

Your email address will not be published.


*