HODAH APALH TIMI CU AFIANG KO HIH, LAIPA THIHNAK KONG KAPHNIH CHIMMI

Tutan ah thihlonak atongmi Laipa Kyaw Kyaw kong he pehtlaiin thawngthanhnak an tuah vun zoh tikah lung a hring ngaingai. Kaphnih thil sining an langhtermi nih tampi afianter ngaingai. Laipa Kyaw Kyaw thihnak konghe pehtlaiin a hramthok thawngpang sining an langhter mi siseh ahnu bik YLA nih thanhnak an tuahmi zohcio tuah usih.

Hihi ahmasabik Kyaw Kyaw Thihnak Kong Cu Asi. Sangau-I YLA President Le A Hawi Minung 6 Hremnakin Pu Dar Hei Le Pi Ci Pen An Fapa Kyaw Kyaw (Kum-50) A Nunnak A Liam? Date: 29 December 2020, Pu Dar Hei le Pi Ci Pen an fapa tlangval Kyaw Kyaw (kum-50) Tayagone khua mi Kalamyo District, Sagaing Devission cu Sangau khua Mizoram, lo thlam a riah nak ah 28.12.2020 Monday zingah kum 5 tluk khua a sak nak Pu Fela a fapa le pa-2 nih a ruak in an hmuh.

Kyaw Kyaw a Pa hi Dawng Va, Hakha Peng a si i a Nu hi Cawngthia, Thantlang peng a si. Kawl ram lei ah a pemmi an si. Kyaw Kyaw hi Kuli tuan dingah India Mizoram leiah a kal mi a si. Kyaw Kyaw he aa naihniam taktak mi chungkhat le Mizoram a ummi Kyaw Kyaw a dawtu hna sinin a thih nak kongah hitihin an chim. Kyaw Kyaw le a tu a umnak inn ngeitu Pu Fela le a fapa le pahnih (an dih lak pa-4) tiin loah an kal i, 27.12.2020 zanlei ah tlun an i tim hna.

Kyaw Kyaw hi ka taksa a nuam pah lo tiah a ti caah, kei cu ka tlung lai lo, lo ahhin kaa nuam tuk ko kei cu lo riah hi a nuam ka ti phun a si tiah Pu Fela le a fapa le pahnih cu a ti hna i lo ahcun an tlun tak. Inn an tlunnak lampi ahcun Pu Fela te chung cu, Sangau-1 President Pu Ram Cung le a hawi minung pa-6 nih bom nan puak maw, bom thawng kan theih tiah an ti hna i, puah lo tiah Pu Fela te nih an leh hna.

Asiahcun, thil nan phurh mi kan zoh/check lai tiah an ti hna i an ckeck piak hna. Maihnah le Antam hnah lawng an hmuh (Mah hihi a mah YLA president hrimhrim nih a chim mi a si/ph record).Cun, Kyaw Kyaw tah tiah an hal than hna i, ka dam pah lo a ti i, lo ah ka rak riak ko lai tiah an kan ti tiah an President pa nih hin a chim. YLA President le a hawi le cu Kyaw Kyaw te an lo lei ahcun an lan.

An chim ning le ph record ningin lo an phan in Kyaw Kyaw cu, bom nan puah maw tiah an hal i kan puah lo tiah a kan leh tiah President pa nih hin a chim. Cun, President pa thiamthiam nih ‘Ngada’ (nga a thi cia mi) kan hmuh i kan lak piak tiah kan ti nain ka dam pah lo tiah a kan ti ko nain tlawngnai law kan lak piak ko tiah kan ti caah, angki le bongbi zawng phoih loin ti ahcun a lut i ‘Ngada’ cu a kan lak piak tiah a chim fawn.

Inn lei ah YLA president le a hawi le cu an rak tin i, Kyaw Kyaw a umnak Pu Fela cu an YLA President pa nih cun, “Kyaw Kyaw cu tlawmpal kan hrem, fung in voihnih cio kan tuk i na va zoh ah a tha lai” tiah zarhpi zanlei ah cun a chimh. Pu Fela nih cun a fale pahnih cu 28.12.2020 Monday zingah Kyaw Kyaw va hlam dingin a kal ter hna i, an lo thlam an va phanh ahcun Kyaw Kyaw cu a thi cia in an hmuh cang.

Kyaw Kyaw unau hi pa-7 an si i nu pa-3, pa -4 an si. Amah hi an unau lakah upa lei pathumnak a si. USA ah nu pa-2 le pa pa-1 an um i adang cu Tayagone khua ah an um. Salai PK, Note: An vuaknak hmanthlak le an hrem lio video YLA nih an thlah mi atang ah ka tel chih. Cun, a thihnak aruang cu nihin an vui nak ah “Lungphu Cawl” (Thaw dih/thaw chuah ti lo??) in a thi tiah an Vui tiah Dongva fb account nih alanghter.

Hi kongah YLA nih fianternak an tuahmi cu hihi asi. OFFICE OF THE YOUNG LAI ASSOCIATION SUB HEAD QUARTERS:SANGAU. No.A.103/2/2018-SYLA(SGU)/55, Dated Sangau, the 30th Dec, 2020. ZAPI SIN I THIL SINING FIANTERNAK. Young Lai Association, Sub-Headquarters:Sangau nih cun kan unau pa “Kalay-Myone Tayakone khuami Pu Kio Tum nau Dar Hei fapa Kyaw Kyaw, Myanmar le India ramri Sangau khua ah khua a sami cu Tiva i Bomb a puah ruang ah Sangau YLA (Young Lai Association) pawl nih an thah” tiah Social Media lei i an postmi kongkau ah hin a thimi umnak chungkhar,

Pacan ah aa ngeihmi Pu Vanlalfel te le Village Council Sangau-I le YLA Sangau-I Branch pawl i hmuhtonnak le hnatlakṭinak in siarem lonak le hnokhniarnak um lo te in vawlei cung hmunkip i a ummi kan unau le hna theih awk ah a hramthok te in thil sining le umtuning le canning fianternak kan vun tuah i, tang i kan ṭialmi hi ṭha te in nan rak rel cio naklai zaangfah kan in nawl fawn hna.

Pakhatnak. Kyaw Kyaw hi kum 2015 thok khan Sangau khua, Pu Vanlalfel te chungkhar sin ah khua a sa i, Pu Vanlalfel nih hin fapa can ah i ngeih in a zohkhenhmi a si. 2.Kum 2012 thok khan Young Lai Association, Sub-Headquarters:Sangau pengchung Tiva ah fakpi in Tizuu ngacel humhak a si i, Bomb, Ngakah bawh le ruh, Dynamo, Lenkhang zar, Nga tlaih/thahnak Sivai etc. hman sian a si lo.

Hi nawlbia hi Young Lai Association, Sub-Headquarters:Sangau pengchung Branch YLA kip (Branch 13) nih anmah le Branch (khua) chung Tiva cio ah fakpi in an pehzulh peng fawn. 3.Dt.26.12.2020 zanlei Sml 5:28 ah khan Sangau-I Branch YLA nih an ramchung Tipi ah Bomb puah thawng an theih i, an theih le cangka in ho dah Tipi kalmi a si ti hna an vun i dotthlat hnu ah a hmun ah an va fuhpanh colh i, Tipi (Bomb puahnak thawng an theihnak hmun) an va phanh tik ah cun Pu Vanlalfel te inn i khuasami Kyaw Kyaw cu a buk ah an va hmuh.

Palinak.Tipi i an va hmuhmi Kyaw Kyaw cu Bomb puah a sinak kong hna an vun hal tik ah biafiang chim duh rih lo in aa phelh i, amah a si lo tiah a rak leh hna. YLA pawl nih an lunghrinh cemmi a si tik ah an vun hrocer deuh i, a tawṭawk le keng ah voihnih khat mauphek in an tuk. Amah hi kum le khua ah a Upa deuhmi a rak si tik ah le pumsa zong ah a ṭiaṭum lo deuhmi a si tik ah fak zong in an chimhring tuk lem lo.

Panganak. Cu hnu ah Bomb a puahnak kong le a Bomb a thuhnak hmunhma zong a chimh dih hna i, amah lila nih a chiahnak hmun, an umnak in Lehmah (metre) 100 hrawng i hla ah a hruai hna hna. Bomb an va lak hnu ah hin Tipi ah Bomb an cheh ti a fiannak ding ah Tipi i nga an thahmi cu amah an charter i, cuhnu cun an tluntak. An tluntak lai ah hin amah zong cu ‘rak tlung ve ko law’ an ti ko nain amah nih ‘Tulio cu zuu ka ding tuk i, ka caah ramriah hi a ṭha deuh rua, cupin ah ka zaw deuh pah fawn ṭung i rak ka tluntak ko u’ ti in a leh hna.

Paruknak.An tlun tak lai ah hin amah hi ihkhun (donhhlei) ah a it i, khuakik nih a khawn deuh ruang ah ‘Puan rak ka ai chap ko ulaw’ a ti hna i, an pawng i tlung ve ding in an sawm peng zong ah a duh lo i, an tlun tak. Amah Kyaw Kyaw umnak pa Vanlalfel zong nih hin YLA pawl an rak phanh hlan ah hin an sin i tlung ve ding in a rak sawm len cangnak bia kha amah Pu Vanlalfel nih khuatlang hruaitu sin ah a chim fawn.

Pasarihnak. Tlangkam bia chimceihmi hna a tam i, zawndamh in YLA chimhrinnak ruang ah a thimi a si an timi kong ah hin amah mithi chungkhar le YLA karlak zong ah bia suarhar tampi an zamh i, a poi taktak! YLA le a thimi chungkhar karlak ah i hmuhthiam lonak zeihmanh a um lo i, mithi chungkhar (a umnak dawng) le nih YLA sual an phawtnak le lainawng bang in an chim (chuah) nak bia hmurka zeihmanh a um fawn lo.

Pariatnak. YLA le a thimi chungkhar, an pahnih (kaphnih) hnatlak ṭinak te in a thihnak kong tialnak (tarnak) thingpheng (signboard) zong ah a thihchan hi Lungtur zawtnak – Lungtur lo (Heart-attack) a si tiah ṭial a si.
9.YLA nghaknu tlangval pawl nih hin anmah YLA chungtel member a simi ruak an rak fimṭawl tawn bantuk tein thlanpi an tuahpiak i ṭha te in a ruak hi an thlah fawn.

Hleikhatnak.Social Media lei ah hi kongkau bia dik lo, zawndamh bia kan thanhzamhmi vialte kha a rannak in rak hlo (delete) viar ding in kan in nawl hna. Hleihnihnak.Hi thihnak kongkau ah hin thil umtuning fiang te in chimfian a si hnu zong i lunghnangam kho lomi le ai lungsak kho lomi kan um a si ahcun a ruak Post-mortem tuah zong kan i huam fawn.

Kanmah Laimi kan Media lei pawl nih thil sining lo bantuk in bia an post zamhmi pawl hi zaangfahnak in biatling lo le bialip a si ti kha rak i fiang cio cang hna usih law, Laimi le Laimi u le nau kan karlak ah remdaihnak a hrawktu le i pehtlaihna hri a dor tertu kan si sual lo nakhnga atu thok cun chimceih dong hram cang seh tiah zaangfah kan in nawl hna.(V.LALDUHTHIAM) President, (BIAKVUNG) Secretary.

Be the first to comment

Leave a Reply

Your email address will not be published.


*