CUTLUK CABIA HEI THAT KHAWH CU HIHI CNLD POLICY AH ABIAPI TAKTAK AH AI TEL

Eihmuarnak ziknawhnak hi a hram in bongh, dinnak in kan miphun tthanchonak lamsial usih. Hihi CNLD policy i biapi bik pakhat ah chiah mi zong a si. Eihmuarnak hi kan khuatlang ah cancer zawtnak bantuk in ai benh lo ding hi a biapi tuk. Innhmun samhnak, khuate lei ah company pawl rianttuannak le cozah rian soknak ah eihmuar le ziknawhnak a tam tuk mi hi ralttha taktak in kan doh i kan thianh a herh cang.

Kan biaknak covo (biaknak zalonnak) hi biatak tein khel cang usih Kan biakinn/biaknak hmun vialte cozah theihpi mi license ngah dingin kan thazaang um-ek in i zuam a herh cang. Thantlang biakinn (hmun) a dihlak ti awk in cozah license ngei lo in an um. Hihi atu tein luhhnawh a hau.Cun Laitlang ah biaknak budget tthenhphawt tikah 13% lawng a si mi biaknak dang nih tam deuh an co mi hi biaknak zalonnak he ai kalh caah kan doh fawn lai. Khrihfa 85% kan si caah biaknak caah chiah mi budget zong tam deuh kan ngah ding a si.

Cun, Thingyan titoih puai vial Chin cozah nih tuahpiak i Christmas le Thawhtthan tuahpiak ve lo hei ti pawl le Zarhpini zei an kan relpiak lo mi pawl zong ralttha tein dohtti usih.Chinram tthanchonak caah sifahnak dohtti usih. Chinram hi Kawlram i ramtthen 14 lakah sifak cem kan si. Kawlram dihlak sifahnak buaktlak in 24% a si lioah Laitlang cu 58% a si. Lung a fak tuk. Zoh ngam hmanh a si lo. Kan Laitlang cozah nih cu dohnak caah kum 10 chungah master plan zong an chuahpi kho lo.

Vawleicung ramkomh bupi UN i tthanchonak hmuitinh (SDG-2030) bang kum 2030 dih hlan ah Laitlang hi sifak bik sinak in luat usih.Cu ah cun Chin nu le ngakchia mino nuncawi hi a biapi bik pakhat a si. Chin nu nih rian tampi an ngah ding le an covo a hman zia an thiam nakding le hmai i an fon deuh nakding ah rambua pahtu pakhat si ning ti ka duh. Upadi le project tampi tuah ka duh.

Chinchin Pekthang @ Mai Sing Chin Thang Konglam Tawi. Party: Chin National League for Democracy (CNLD), A pa: Pu Pek Thang(Hlawnching, Vanzang). A nu: Pi Biak Vel (Hlawnching, Hriangkhan) Atu lio rianttuannak: Tlangcung mi party 22 funtomnak Nationalities Brotherhoods Federation (NBF) ah director; Kawlram remdaihnak bu Union Peace Dialogue Joint Committee (UPDJC) le Union Peace Conference 21st Panglong ah facilitator.

Falam BEHS 1 ah siangcachim le Shalom (Nyein) Foundation ah remdaihnak committee chungtel le trauma healing (ral le adangdang zatlak puicimhnak ruangah har a tong mi hna hnemh le bawmhchanhnak) program ah coordinator zong a rak ttuan bal.Kum 2002 te khan CNF le cozah remhdaihnak kong ah siseh, ram pumpi huap remdaihnak rian ah siseh biatak tein i tel hram a thawk.

Chin Peace and Tranquility Committee chungtel, Gender and Development Initiative (Kawlram chung nu tthanchonak rian a ttuan mi bu) ah board member, Chin National Conference (Hakha 2013) biachahnak a ttuantu ding committee ah chairperson, Women Can Do It (ramchung ramleng nu tthanchonak bupi) ah chungtel, Chin Women Organizations Network ah chungtel tibantuk in a si khawh tawk a cawlcang.

Kawlram chung remdaihnak le zatlang tthanchonak bu tampi he rian a ttuantti bal i hmuhton le theihngalh tampi a ngei. Cu pinah remdaihnak ser ning kong, ramuknak ramrian kong, nu le zatlang tthanchonak kong cawn le ruah ah Japan, Australia, South Korea, Cambodia, Indonesia, Malaysia, Thailand, Switzerland tibantuk ram tampi a phan bal.

University of Yangon in BA a dih. Hlasak le zaanglek phunphun zongah a ngakchiat tein pahrang a ngei mi a si. Falam ah a chuak i a tthang mi a si nain Hakha, Thantlang ah a tlongleng peng mi, chuahkehnak khua le tlang zong a fuh camcin mi a si. Siangcachim, mino upa, nu upa, remhdaihnak le zatlang tthanchonak rian a ttuannak i a cawnnak,

A hmuhton le a theihhngalh vialte fonh in a chuahkehnak a hrampi a si mi peng le tlang khua le ram caah pum i pek ve ding in, tutan kum 2020 rampi thimnak ah a lut. “I funtom caan a cu cang” tiah tlangau in a ttuanhawi CNLD palai hna he “miphun covo laak tthannak ding” mizapi a kan rianhtu ding kan nusalttha a si. ChinchinPekthang, CNLD, Thantlang Peng Pyine Hluttaw 1 caah. Credit: ChinChin PekThang

Be the first to comment

Leave a Reply

Your email address will not be published.


*