HI CABIA CU KEIMAH AI TIMI LAWNG NIH COMMENT TUAH DING MI ASI

Kawlram Budget Le Chinram Tthanchonak:Kawlram Phunghrampi section 11 a bantuk in ramkomh President nih Financial Commission (rampi phaisa tawlreltu bu) a ser i, upa 21 an si. Ramkomh President cu lutlai (chairman) a si i, Vice President pahnih hna cu Vice Chairman an si. Union Minister for Planning and Finance cu secretary (chungṭuan) a si. Union Attorney-General in minung pahnih, State le Reginal Division (14) in Chief Ministry hna le Chairman of Nay Pyi Taw Council hna hi member an si.

Rian an i phawt ning ah Vice President U Myint Swe hi Union Ministry budget tawlreltu a si i, Vice President Pu Henry Van Ṭhio hi State le Reginal Division – Ramkomh le Ramṭhen vialte budget tawlreltu a si. Ramkomh budget pinah Chinram ah a herh ngai in a ruahmi a um a si ahcun Union Ministry budget tawlreltu kha a chimhchawnh i a herh ning in budget an pek khawh ṭhiamṭhiam rih.

Chinram ṭhancho nakding ah ṭuan khawhnak le phaisa pek khawhnak cu a kut chungah a hung um. Vice President nih Chinram caah ṭuan a duhmi vialte cu kum 4 fai chungah tampi a ṭuanchuah. Chinram caah 2016 in 2021 tiang budget- phaisa a pekmi cu MKK 864 billion a si. 2011 in 2016 tiangah Chinram caah pekmi budget cu MMK 350 billion lawng a rak si. Pu Henry Van Ṭhio Vice President a ṭuan ruangah Chinram budget 146% a kai (146% rori).

Chinram budget cu ramkomh le ramṭhen dang hna nakin percent (%) in a kai tam bik a hung si.Chinram caah a biapi ngai in aa hmaithlakmi pakhat cu fimcawnnak hi a si. Fimcawnnak (Education)  Pu Henry Van Thio a ramkhel tlangau panga lakah fimcawnnak (education) hi biapi ngai in ai telmi a si. Hi kong he pehtlai in a chim pengmi cu Nelson Mandela bia hi a si; “Vawleipi thlen nakding caah na hman khawhmi a ṭha bik le a hriam bikmi hriamnam cu fimnak a si,” ti a si.

Chinmi nih hin fimnak ṭanh hna usih. Fimnak cacawn hi biapi ah chia hna usih law thazaang pe hna usih. Kan ram ahhin kan mino hna fimnak an cawn khawh nakding ah sianghleirun (university) tiang um khawhnak kan zuam lai, ti hi a bia meilah bantuk in a chim, ai seh chih zungzal. Cucaah fimcawnak he pehtlai in zei hna dah a ṭuanchuah kan zoh tuah lai:

Pakhatnak ah Hakha University: Hakha College an rak thawk ah College he ai tlakmi innlo zong a rak um lo. Amah Pu Henry Van Ṭhio tawlrelpinak thawng in University tiang pek a si. Education Ministry an phung ning ah cun College in Degree College ah, cun University ah, tiin a dotdot in kaiter ding a si. A dotdot in hngah ahcun University pek ding cu caan sau a rau rih ding a si. Asinain, Chinram caah a herh tuk a ti caah University an pek colhnak hi a si.

Hakha University hi University sawhsawh si loin Comprehensive University ah sermi a si. University of Technology, University of Computer ti bantuk kha hi Hakha University ahhin hmun khatpi ah an um i University ropui taktak ah an ser liomi a si. Hmailei ah Agricultural University (cinthlaknak lei), Veterinarian University (saram lei cawnnak) ti bantuk tiang in a kau i a ngan dingmi ah timhtuah cuahmah a si.

Hi University ahhin Library zong nganpi um seh ti a si i cauk zong a phan thluahmah cang. E-Library tiang in a um lai. University dang compound chungah a um bal rih lomi UCF chapel (Khrihfa pumhnak hmun) zong Hakha University compound chungah sak cuahmah a si. Pahnihnak ah Mindat College. Thlanglei Chinram nih an herh tukmi Mindat College zong sak thawk a si cang. Caan rau loin University pek ding zong a timhtuah.

Pathumnak ah Hakha Education College: Pu Henry Van Ṭhio tawlrelnak thawng in Hakha Education College hi thawk le hman khawh a hung si. August 12, 2016 ah Myanmar Times nih a ṭial ning ah cun U Thein Sein term lio ah rak timhtuahmi a si ko nain tlamtlinh nakding budget an rak pe kho lo, a ti. Palinak ah Government Technical High School ( GTHS): (GTHS, Thantlang cu innlo (building) an sak liopi a si. 2020-21 cacawn kum in cawn hram an thawk lai. GTHS caah tlamtling in budget pek a si cang. Panganak ah Hakha Sport And Physical Science Training School: Hi sianginn zong hi sak dih a si cang. Kawlram chung ah hi bantuk sianginn hi panga-ruk te lawng a um rih. A cheukhat ram ah cun Education Ministry tangah a um i, a cheukhat ram ah cun Health department tangah a um.

Paruknak ah Chinram Khuakip Siangin Le Saya/sayamah Te: Chinram khua tampi ah sianginn saknak budget (phaisa) tampi pek a si. Saya/ Sayamah te zong tampi chap le pek a si. Hi pinah, Chin State khuapi kip ah Education Institution, College le a dangdang ṭhanchonak sianginn ti bantuk chiah dih ding zong a timhtuah cuahmah. Chinram ah College le University cu a min lawng in kan rak theih tawn. Atu ah cun College le University tiang in kan hun ngei kho cang, mithmuh kuttawngh a si. Fimnak nih kan chinram cu a ceuter lai i, a tthawnter lai i, angan a damter lai ti cu Chinmi zapi nih cohlanmi a si. Fimnak a duhmi kan chinmi kan dihlak caah lawmhnak a tam hringhran. Credit: CCNC

Be the first to comment

Leave a Reply

Your email address will not be published.


*