FIANGPUP IN BIAHALNAK VIALTE LEHNAK ATUAH KO HIH, NLD SINING AFIANG DIH

Chin Nunphung Upadi Sermi Kong Biahalnak Le Bialehnak. Biahalnak. Chin ramkulh hluttaw nih Chin nunphung le caholh he aa pehtlaimi upadi an fehtermi le a nungmi a um maw? Bialehnak: NLD hruaimi Chin ramkulh hluttaw nih Chin nunphung le caholh he aa pehtlaimi upadi an fehtermi pakhat hmanh a um lo. Biahalnak, Pyidaungsuh hluttaw nih tah an fehtermi a um maw? Bialehnak: NLD hruaimi Pyidaungsuh hluttaw zong nih Chin nunphung le caholh kong ah upadi an sermi le an fehtermi a um lo.

Biahalnak. Ziah NLD MP nih hi kong hi biatung chuahpi in an ceihmai lo? Bialehnak: NLD hruaimi Pyidaungsuh hluttaw ah Chin nunphung kong an ceih ka hngal lo. Chin ramkulh hluttaw belte nih hluttaw ah Chin Nunphung kong voikhat te an rak ceih bal. USDP hruaimi hluttaw chan ah Chin miphun party nih Chin nunphung (Chin act) kong an chuahpimi le an fehtermi kha remh le tharchuah than te ding tiah bia an rak chah.

Cu bia an rak chah ciami kha NLD hruaimi Chin ramkulh hluttaw nih hluttaw an kai ka te ah an rak ceih. Zeitindah an rak ceih ti ahcun, “Hi biatung cu ceihmai lo ding” tiin biakhiahnak an rak tuah. Cu te cu an ceihmi a si. Ceihmai lo ding tiah bia an khiahmi le Chin nunphung kong upadi pakhat te zong an tharchuah lomi hi ngaihchia taktak khi a si. Hi ruang ah kan miphun nunphung le caholh a kilvengtu ding Chin party hi hluttaw ah i telh a herh hrimhrim nak cu a si.

Biahalnak. Ziah, Chin ramkulh hluttaw nih nunphung kong upadi an ceihmai lonak le an fehter lonak hi a si hnga? Bialehnak: A ruang taktak cu anmah nih an hngalh bik lai. Amahbelte, annih cu Chin cu an si ve ko nain Kawl miphun hruaimi party asiloah Kawl miphun tanbo le chakrengh chommi an si caah an ceihmai lonak le rak ceihmai ciami hmanh pehzulh lo in “thirkuang tawhhrenh” ah an chiah lehnak cu a si.

Biahalnak. Nangtah MLA (MP) tling law Chin nunphung le caholh kong hi hluttaw ah na chuahpi kho ve lai maw? Bialehnak: MP ka tlin ahcun, ka chuahpi hrimhrim lai. Kan party CNLD hrimhrim nih kan i hmaithlakmi zong a si caah Chin nunphung le caholh kilvennak le thanchoternak kongkau hi hluttaw ah fakpi in chuahpi le chimrel kaa tim. USDP lio i Chin nunphung (Chin act) an rak fehtermi upadi zong a herh ning in remh, tharchuah le “NLD nih Thirkuang tawhhrenh i an chiahmi Chin Act upadi” zong a thawchuahter le nunter kaa zuam lai.

Miphun pakhat a nunnak le a himnak hrampi cu nunphung le caholh hi a si. Nunphung le caholh a tlau ahcun miphun zong a tlau ve lai. Cucaah, kan Chinram le miphun himdamnak le i kilvennak ding Chin nunphung le caholh (Chin Act) upadi pawl felfaite in a sertu le a nuntertu ding ah Chin mizapi nih CNLD palai mee pek kan herh. Chin Lungput, Chin Thinlung, Chin Ruahnak he kan miphun a ngandam nakding caah CNLD vote hna usih. Pu Van Chan Ceu, State Hluttaw No.1 CNLD Party, Hakha Township. Media Team. Credit: Vanchanceu.

Be the first to comment

Leave a Reply

Your email address will not be published.


*