DR AUNG MYINT THANG NIH LUNG THLI TUM KONG APHUAN VE CANG

Salai Lung Thli Tum Campaign Ka Hmuhning: Pakhatnak. Saya Lung Thli Tum hi Laimi caah thil ttha a hmuhmi tuah khawh ai zuam ngaimi si selaw ka dawh ter. Pahnihnak. Anih hi party a ngeimi asi lo. Cucaah ai zuam ngaingai a hau. Zeicadah ai zuam ngai a herh ti ahcun party pakhat tang i a ummi MP ai cuhmi hna cu an party nih khan min an rak ngeih cio cia hna.

Cucaah an party min tthat cianak bak kha i bochan in cawlcangh a fawi. Asinain anih cu party ngeilomi, pumpaak in ai zuammi, dirkamhtu ngeilomi kan ti lai cu asi caah amah bak kha mipi nih an zumhmi asi a hau. Cucaah ai zuam khun a herhnak cu asi. Pathumnak. Anih nihcun CNLD le NLD i mifel lo deuh ah a ruahmi hi char awk um lo tiang in a den hna.

Zaapi nih chim ngam lo dingmi tiang zong khin a hei chim ngam. Hi zawn ahhin American lei presidential election campaign system a von tlai ngai. Asinain a denmi hna party pawl nih zeicadah an leh ve hnga lo timi nihhin khua tampi a ka ruah ter. A den ve awk an hngalh lo bia maw asi hnga? Jesuh min in an ngaihthiam bia dah asi hnga?

Palinak. Atu tiang kan Halkha/Thantlng peng election campaign ahcun amah hi pumpaak in a cawlcanmgmi asi ko nain a cawlcangh thawng a thang bik. Thathawhnak bia chim zia zong a thiam. Adang MP ai cuhmi hi nan cawlcangh thawng kan in theih tuk hna lo. Nan cunglei cawlcanghnak lawng maw na i rinh hnga ti awk in a um.

Panganak. “Dinlonak ka do tiah a ti. Kan Laitlang hi a dikmi tthanchonak le ihruainak kha biapi ah ka chiah caah mi huat hi a poi ah ka chia lo tiah a ti” ti in a duhnak a ttial tawnmi hi a tawinak in hei ttial piak usih law kan palh lai lo dah. Paruknak. MP hmanh va tling te sehlaw, anih cu party ngei lomi asi caah amah lawng nihcun pengtlang pakhat cu uk dih awk a ttha lai lo i party dang chung in a chuakmi hna he rian an ttuan tti a herh te lai caah party dang bawi pawl he ihawikomhnak le tluangtein rianttuan-ttikhawhnak harsatnak hi zeimawzat cu a um te ttheu lai ti ah keimah pumpaak nih ka purhdah. Amah zong nih ai theih ciami cu asi ko lai.

Pasarihnak. Asinain nan duhmi uktu ithimnak nawl cu mipi nih nan ngeih. Khuaruahnak caan zong nan ngei rih. Nan hruaitu dingmi kha nanmah nih nan duh bikmi i thim cio ko hna uh. Kan ram nihcun mifel le midik cu ti hal in a hal cu zaapi nih nan theih ciomi asi. Credit. Aung Myint Thang

Be the first to comment

Leave a Reply

Your email address will not be published.


*