DONALD TRUMP NIH TEINAK A CO TTHAN LAI, ATIMI PAOH ZUAMCAWH KHAWH KA SI

US Presidential Result Update Ka FB hawikom chungin US President thimnak (2020) ah teitu an fiang rih lo ti bantukin a chimrelmi kan hmuh ngai rih hna. President Trump nih teinak a co t’han lai titiang in a chimmi nan um ngai rih.Tutan thimnak hi kum 2000 lio i Bush le Al Gore cu Florida state ah votes 2000 hrawng lawngin an i thlau caah teitu fiang kho loin caan zeimawzat an rak ummi he hna a tahchunhtu kan tam ngai tikah mirangca a rel kho ve lomi mi cheukhat caah lung awtawmnak a chuahter ngai rua dah ka ti.

US President thimnak result cu January 20 ah uknak nawl an i thlen hnu lawngin tlamtling in fehtermi asi zungzal ko nain States cio nih votes an relmi result in teitu thanh cia an si camcin ko. President Trump le a dirpitu mizeimaw nih thimnak result cu States cheukhat ah an dohkalh (challenge) len ko nain an thlen khawhmi zeihmanh a um rih lo caah teinak cotu cu Mr Biden asi ko.

Cucaah US President thimnak ah teitu an fiang rih lo asiloah Trump nih teinak a co t’han ko lai tiin a zumtu le a chimreltu poah nih phaisa thap (betting) in zuamcawh khawh ka si. Kan miphun chungin Mirangca aa rel kho lomi pawl caah lungbuainak nan chuahter ngai tiin ka hmuh caah biatak tein ka van chimmi asi. Credit: Biak Hnin Sang.

Relchih aduhmi caah. Donald Trump hi alungdong pah ko cang rua, Joe Biden nih teinak ahmuh tiah langhter lulh asi cuahmah lio ah Trump nih atimi cu a ralaimi kum 2024 thimnak zongah i zuam tthan khawh asi ko tiah a chim. Theihcio bangin US president thimnak ah ningcang loin thil aum tiah an ti ruangah Trump lei hna nih lawsuit an tuah cuahmah liopi asi. Culawng siloin martial law hman maw asiloah thimnak tuahtthan dingin kar an hlang.

Thimnak konghe pehtlaiin Donald Trump cu minute 46 tluk asaumi video alanghter. Cu ah a chimmi cu thimnak ah teinak ka hmuh komi cu lih le hrokhrawl in an ka chuh tthan tiah a chim. Tutan zuamcawhnak ah hin teinak ahmu lo khomi asi ko. Sihmanhsehlaw president termkhat lawng ttuan hi cu kai tim lo tiah White House Christmas party an tuahnak ah a chim. Kumpi kum li cu caan kan hmang i, kumli dang hmantthan kan duh, kumli hnu ah kan hmuh tthan hna lai tiah a chim.

Tutan ah Donald Trump nih mah bia a chimmi hi thimnak result kongah thlapa thlakhat chung an buai hnu ah teinak ka hmu lo timi bantukin bia a chim avoikhatnak bik asi tiah an ruah. Vote a buainak hmun le hma vote an reltthan mi zongah Biden nih teinak ahmuh tthan hna.Hi konghe pehtlaiin Attorney General Bill Barr zong nih atimi cu Justice department zong nih thimnak ah hlennak maw vote ningcang loin a um timi hi tehte zeihmanh an hmuh lonak kong an chim tiah a ti. Hi an buailio caan ah Joe Biden cu president si dingin rian attuan cuahmah lio asi i, New York Times nih biaruahnak an ngeihlio ah rampi sipuazi tharchuah ka timh, America ah investment tuah hmasa dingin asikhawh chungin ka ttuan lai tiah a chim.

Donald Trump cu thimnak tuah hnu cun mipi hmuh ah alangtuk tilo, Minung tlawmte hna he meeting an tuahnak lawngah amui ailangh cang ti asi. A um hmun thimnak kongah alungtlin lonak tete tu a vun langhter lengmang i, teinak ka hmu lo tiah asung akhan kho rih lo. Thimnak hi ningcang lo bak asi ko timi hi hopaoh nih an theih dih mi asi ko. Statistics in tuak ahcun teinak ahmu lo dingmi ka si lo tehte tampi kan ngei tiah a chim.

Trump dirkamhtu hna nih cun atuhi rian an ttuan cuahmah lio asi rih i, Michigan State legislature sin ah Trump lawyer Giuliani zong nih vote ningcang loin a umnak kong zong a chim. Cun Georgia zongah Trump campaign he pehtlaihnak angeimi Sidney Powell zong nih rally atuahpi hna nih kan vote hi rel a si ve lo tiah achim ve rih. Asinain US Attorney General Bill Barr nih atimi cu tutiang ah hin hlennak maw ningcang lo aum timi hi theih asi lo tiah a chim.

Tutan thimnak konghi abuainak a sau chin lengmang caah buainak pakhat pakhat tel cu a chuak te ko lai tiah an chim. January thla hramthok ah tuah dingmi US Senate seat pahnih thimnak cu Georgia ah hin Trump biachimmi pawl cu thinphan ngaingai asi ko cang tiah an chim, Election officials hna caah thaazaang chuahnak zong a chuak khomi asi tiah an chimcaih len.Voting System manager Gabriel Sterling nih a timi cu pakhat khat cu atuar lai i, pakhat khat cu kah asi lai i, pakhat khat thah asi lai tiah a chim. Hi konghe pehtlaiin Three-star general minthang pahnih hna nih an timi cu Martial Law thanh law ralkap i hruaining tangah thimnak tuah tthan dingin Trump cu an chim cang, Hi chungah hin National security adviser tthing Michael Flynn zong ai tel ti asi.

Be the first to comment

Leave a Reply

Your email address will not be published.


*