ARIAN AIDINH TIKAH TRUMP HI THONG ATLA HRIMHRIM LAI

Trump hi ai din tikah thong a tla te lai lo, ka timi kha kailet, 60% tluk in thong hi a tla hrimhrim lai tiah kailet than: Zeiruang ah? Trump 2020 election a sunghnak a ruang bik cu COVID-19 ruang ah asi tiah ruah cio asi i The New York Times zong nih election ni i Trump duhlotu hna vote thlatu biahalnak a tuahmi ah Trump an duhlonak a ruang bik cu COVID-19 kong ah asi tiah an ti dih hna.

Asinain kap khat lein kei nih ka hmuh ve ning ahcun Trump a sunghnak a ruang bik cu a tuah lo dingmi a tuah tuk, a chim lo dingmi a chim tuk ruang ah asi tiin ka hmuh. Mah tein a um ko mi va hnur suan tuk, COVID-19 hi a tolrel khawh lo hmanh ah tih a nung lo, tlangrai sawhsawh asi ko hme cu, tiin mipi ralrin nak pek um loin a pawr ter lehlam hna i a donghnak ahcun a mah zong a tlunh i mipi tamtuk an lung a dongh hna.

Vawleicung ah tih a nung cem mi cu media an si, hmuhtheihnak a ngei bal lomi kan ti cu president ka si le an ka ti kho lai lo ti phun in ai ruah sual i “fake news” tiin a ti salam hna. Kum 2018 tiang ah Reuters, BBC, USA Today, AP News le WSJ nih an rak dirkamh tuk ko nain a hnu ah a bia holh le lungput that lo caah le a tuah lo ding tamtuk a tuah tik ah Fox News koko hmanh telh chih in an doh dih.

Minung le media cu kan i then khawh lo caah media dihlak nawn nih an vun phom ciammam ahcun a dom ai dom cawk lo. Kum 2016 election ah Russia bawmhnak kong i tazacuainak kha a palh lo caah a awn asi lo, senate ah majority GOP an si caah an hum zual caah asi deuh. Cun Ukraine bawmh halnak he, tax kong siseh, nu ningcangloin a tuahmi minung 26 nih tazacuaimi kong ah siseh, a chungkhar nih president a si ruang i cozah tangka ningcang loin an hman mi kong ah siseh,

Kum 2020 election i ningcang lo tukin teinak a hmuh than nak dingah hranhram loin states cozah a hnek mi le lih tawn cawp in buaibainak a siammi vialte siseh, US democracy muisam a chiatchuah ter viar cangmi zong hi president elected Joe Biden nih a ngeih thiam te ko lai mitha asi i ka ti ko kha kai let than. Aruang cu a cunglei in ka chim na cha in a tuah lo dingmi tamtuk a tuah cangmi lawng cu ai za ti lo i a caah zeihmanh santlaihnak a ngei lomi Biden fapa bak a taxes kongah a dothlat colh.

Biden fapa nih cun ka diklonak aum lo a ti i raltha tein ka dir ngam ati. Trump nih hin a tuah ding asi lo, rian ngeitu an um ko, Biden nih a ngeih thiam khawh lo nak ding a tuah lo dingmi sual palhnak faktuk in Biden nih ngeihthiam awk tha loin ai tuah, tiah ka hmuh caah thong a tla hrimhrim te lai ti hi ka zumh ko cang hi. Senate an control khawh le bang ahhin cun thil tampi kan ruah lo pipi in an hung pawt lulh te ko lai!

Kum 2022 chungah Trump hi thong a tla hrimhrim lai tiah ka zumh, a ruang cu a tuah lo dingmi tamtuk a tuahmi nih ngeihthiam khawh lo dingin amah le amah ai tuah. President hlun thongtlaknak ding ah le sual phawt nak dingah a biapi bikmi cu a vun chawngtu president thar ngeihthiamnak hi a si tawn, asinain Trump nih Biden sinah ngeihthiam khawh lo dingin sual nak a tuah tiah ka hmuh. Cuhlan ka bia chimmi cu a palh bal lo tuhi teh zeidah kan lawh lai kan zoh cio lai cu. Credit: Chelsea Bawi

Be the first to comment

Leave a Reply

Your email address will not be published.


*