DAWTMI UNAU HNA CELH DING A SI HRIMHRIM LO EE

A chuahka tein amit cawmi nu pakhat cu nungak ahung si ah a thinlung re athei ngaingai, lungdong ngai in a um.Mitcaw si cu kamkhat lei in a ningzak i, amah le amah zong mawh aphurh ngaingai. Zeiruangah dah ka rak chuah tiah a phunzai tawn.Voikhat cu Mitcaw nungak nu cu Tlangval pakhat nih nupi ca dingin a duh i sawmnak atuah.

Asinain mitcaw asi ruangah va ngeih ding cu a duh lo.Tlangvalpa sawmnak tuahmi cu Mitcaw nu nih cun voitampi acohlang kho lo.Asinain tlangvalpa nih aduhdawt tuk caah nungak nu cohlan lonak cu aa theihter lo. Nifatin a pawngah a um hnawh i, aharhmi vialte atuahpiak tawn.Nikhat cu nungak amitcaw mi nih Tlangvalpa sin ah a timi cu ka mit hi ttha sehlaw cu kan vaat ko hnga e tiah a chim.

Cu bia Tlangvalpa nih a theih cun damnak dingah khua aruat.Sizung ah a kalpi i,Tlangvalpa nih sibawi te hna cu amit hi operation ka tuahpiak ulaw adihmi vialte cu keimah nih ka pek dih ko lai, Cun mitthlen ahauh zongah mit ahlutu dingmi zong an um ko tiah a chimh.Sibawite hna nih cun operation an tuah i, a mit zong an thlenpiak.

Sizung in an chuah hnu ah a mit an tuamnak cu an vun phoih cun khuaceu a hmu kho cang i cu nungaknu cu lawmhnak in a khat cang.Atu ahcun minung hawi an hmuhmi vialte ka hmuh dih cang, ka hna in ka theihmi vialte hna kha ka mit in ka hmuh dih cang tiah lawmhnak in a khat cang.Damtein a um hnu ah Tlangvalpa cu an inn ah a va kal tthan.Tlangvalpa nih atimi cu na mit khua na hmuh khawhnak dingah ka sikhawh chungin ka zuam i, atu ahcun na mit zong attha cang.

Cun ka mit hi athat ahcun kan vaat ko lai na ti bangin thitumnak kan tuah cang lai tiah a chimh. Sihmanhsehlaw nungaknu nih cun Tlangvalpa cu a vun zoh tikah cun mitcaw arak si ve ai.Arak ruahning vialte he arak i kalh dih cang. Caan saupi mitcaw in ka um i, atu ka mit ahungtthat bak asi ve, mitcaw tthiamtthiam he thitumhnak tuah dingmi cu asi kho lo e tiah Tlangvalpa sawmnak tuahmi cu a hnawl cang.

Tlangvalpa cu thinlung kekkuai in an innlei panh in a ttin.Mah nungaknu te cu caan hmanh arauh hlan ah duhmi dang angei i, thitumhnak zong an tuah.Va angei tiah Tlangvalpa nih a theih tikah cakuat pakhat a ttial i, akuat. Dawtmi ka mit hi khua hmu sehlaw kan vaat ko lai tiah na rak ka ti ruangah ka ngeihmi vialte dihlak in na mit operation kan tuahpiak. Attha komi ka Mit zong kan pek.

Kei cu nangmah ruangah hi vawlei ka nungchung vialte mitcaw in ka um cang lai.Azei paoh sisehlaw ka hlutmi ka Mit kha thatein rak kilveng hraam mu, Kei zong nih na mit a rawkmi kha ka nunchung thatein ka rak kilven ve lai tiah nungaknu cu Tlangvalpa nih ca akuat.Cu cakuat nungak nu nih a rel i, thilsining a vun theih tikah ahcun lungkuai mitthli le thinlungfak in a um.Asinain zeihmanh san atlai ti lo.

Dawtmi ule nau hna hi vawlei ah tuarnak afak bikmi le ahar taktak mi thil cu kan dawtmi hna nih an kan hlawt hi asi. Aa kan dawtu Kan Bawipa Jesuh Khrih zong hi voitampi kan hlawt i, aa kan dawtnak asunglawituk mi hi lehrulh loin kan um tawn. Zungzal nunnak kan hmuhkhawhnak dingah Pathian Fapa cu fahnak phunkip le a taksa vialte hliamma tuar in kan caah atuar.

Nangmah le keimah zungzal nunnak kan hmuh khawhnak dingah kan Bawipa Jesuh Khrih cu zungzal alo kho lo dingmi hliamhma apu cang lai. Hitluk in aa kan dawtu Jesuh nih mit ttha nan ngeih khawhnak dingah ka mit ka pek i, ke ttha nan ngeih khawhnak dingah kake ka pek. Muisam tlamtling nan ngeih khawhnak dingah ka Lu ah hling luchin kaa chinh.

Taksa tlamtling nan ngeih khawhnak dingah ka taksa vialte ka pek dih, Keimah ta nan si, kan cawk cangmi hna nan si. Nan taksa vialte hna le nan nunnak vialte hna cu keimah ta asi, Cucaah thatein rak zohkhanh hna uh tiah kan Bawipa Jesuh Khrih nih aa kan ti ve.Na caah ka nunnak ka pek. Asunglawi mi ka thisen a luang. Nangmah tlanhnak dingah, Thihnak horkuang in na luat khawhnak dingah, Ka nunnak na caah ka pek.Zeidah na ka pek tawn? Cattialtu:PLTC