DANEIL RUM HNIN NIH YLA PAWL BIAHALNAK PARUK ATUAH CANG HNA

YLA Sub-Headquartersrs Sangau Sin Daniel Rum Hnin Biahalnak:Sangau khua YLA nih kan Upa a damlo buin nan tukvelh, Tichung nan luhter hnu in a thihnak ruahah YLA Head quarter nih Ca nan rakthlak mi reltik ah Lung a tling lo i, zumh awk tlak zong a si lo, 1. Nan tlukvelh mi kan U pa hi a thih cang caah Biahal awk a tha tilo ti fiang tein nan theih caah nan mah YLA sualnak le palhnak umlo bantuk in ca nan tial.

Pahnihnak. Khua lei in hringtu a Nu nih Mithipa a ruak hi kan phunpiak rih hlah uh tiah thawngthanhnak an tuah ko hna nain, Mithi ruah cu a rannak in nan phum, Pathumnak. YLA Head – Quarter nan ca thlak mi chung ah Thihnak a tualtu Innchungkhar hna nan ngeihchiat pinak le nan Tukvelh nak ruang ah ngeihchiat pinak ca tlangkhat te hmanh nan telhlo mi hi khuaruah har ngaingai cu nan si.

Palinak. Mithiruak a rannak in nan phum mi hi Medical Check up an tuah tel sual hna lai ti maw nan phan ti hi ruah awk a um hrimhrim, Panganak. Nan mah YLA Nih nan i thawh i Kan Mithi pa hi ( Hearts- attack ) in a thi tiah nan mah duh in bia chak nak nan tuah !!! Siibawi pawl nih Mithi pa hi Lungthat lonak lei zawtnak ( Herzinsuffizient ) a ngei ti mi khuaika Advident ( Diagnose) dah nan ngeih?

Paruknak. Kum 5 te lawng a umnak Sangau Innchungkhar nih hin thihnak a tong mi Pa hi an mah innchungkhar khat bantuk in cun an dawtlo hrimhrim ti cu a fiang i, a thihnak kong ah hin biatak tein tan an la duh lai ti zumh a um hrimhrim lo. Credit: Daniel Rum Hnin. YLA nih cathanh an chuahmi cu atanglei bantuk in hin a si.

ZAPI SIN I THIL SINING FIANTERNAK. Young Lai Association, Sub-Headquarters:Sangau nih cun kan unau pa “Kalay-Myone Tayakone khuami Pu Kio Tum nau Dar Hei fapa Kyaw Kyaw, Myanmar le India ramri Sangau khua ah khua a sami cu Tiva i Bomb a puah ruang ah Sangau YLA (Young Lai Association) pawl nih an thah” tiah Social Media lei i an postmi kongkau ah hin a thimi umnak chungkhar, pacan ah aa ngeihmi Pu Vanlalfel te le Village Council Sangau-I le YLA Sangau-I Branch pawl i hmuhtonnak le hnatlakṭinak in siarem lonak le hnokhniarnak um lo te in vawlei cung hmunkip i a ummi kan unau le hna theih awk ah a hramthok te in thil sining le umtuning le canning fianternak kan vun tuah i, tang i kan ṭialmi hi ṭha te in nan rak rel cio naklai zaangfah kan in nawl fawn hna.

Pakhatnak.Kyaw Kyaw hi kum 2015 thok khan Sangau khua, Pu Vanlalfel te chungkhar sin ah khua a sa i, Pu Vanlalfel nih hin fapa can ah i ngeih in a zohkhenhmi a si. 2.Kum 2012 thok khan Young Lai Association, Sub-Headquarters:Sangau pengchung Tiva ah fakpi in Tizuu ngacel humhak a si i, Bomb, Ngakah bawh le ruh, Dynamo, Lenkhang zar, Nga tlaih/thahnak Sivai etc. hman sian a si lo. Hi nawlbia hi Young Lai Association, Sub-Headquarters:Sangau pengchung Branch YLA kip (Branch 13) nih anmah le Branch (khua) chung Tiva cio ah fakpi in an pehzulh peng fawn.

Pathumnak.Dt.26.12.2020 zanlei Sml 5:28 ah khan Sangau-I Branch YLA nih an ramchung Tipi ah Bomb puah thawng an theih i, an theih le cangka in ho dah Tipi kalmi a si ti hna an vun i dotthlat hnu ah a hmun ah an va fuhpanh colh i, Tipi (Bomb puahnak thawng an theihnak hmun) an va phanh tik ah cun Pu Vanlalfel te inn i khuasami Kyaw Kyaw cu a buk ah an va hmuh. 4.Tipi i an va hmuhmi Kyaw Kyaw cu Bomb puah a sinak kong hna an vun hal tik ah biafiang chim duh rih lo in aa phelh i, amah a si lo tiah a rak leh hna. YLA pawl nih an lunghrinh cemmi a si tik ah an vun hrocer deuh i, a tawṭawk le keng ah voihnih khat mauphek in an tuk. Amah hi kum le khua ah a Upa deuhmi a rak si tik ah le pumsa zong ah a ṭiaṭum lo deuhmi a si tik ah fak zong in an chimhring tuk lem lo.

Panganak.Cu hnu ah Bomb a puahnak kong le a Bomb a thuhnak hmunhma zong a chimh dih hna i, amah lila nih a chiahnak hmun, an umnak in Lehmah (metre) 100 hrawng i hla ah a hruai hna hna. Bomb an va lak hnu ah hin Tipi ah Bomb an cheh ti a fiannak ding ah Tipi i nga an thahmi cu amah an charter i, cuhnu cun an tluntak. An tluntak lai ah hin amah zong cu ‘rak tlung ve ko law’ an ti ko nain amah nih ‘Tulio cu zuu ka ding tuk i, ka caah ramriah hi a ṭha deuh rua, cupin ah ka zaw deuh pah fawn ṭung i rak ka tluntak ko u’ ti in a leh hna.

Paruknak. An tlun tak lai ah hin amah hi ihkhun (donhhlei) ah a it i, khuakik nih a khawn deuh ruang ah ‘Puan rak ka ai chap ko ulaw’ a ti hna i, an pawng i tlung ve ding in an sawm peng zong ah a duh lo i, an tlun tak. Amah Kyaw Kyaw umnak pa Vanlalfel zong nih hin YLA pawl an rak phanh hlan ah hin an sin i tlung ve ding in a rak sawm len cangnak bia kha amah Pu Vanlalfel nih khuatlang hruaitu sin ah a chim fawn.

Pasarihnak.Tlangkam bia chimceihmi hna a tam i, zawndamh in YLA chimhrinnak ruang ah a thimi a si an timi kong ah hin amah mithi chungkhar le YLA karlak zong ah bia suarhar tampi an zamh i, a poi taktak! YLA le a thimi chungkhar karlak ah i hmuhthiam lonak zeihmanh a um lo i, mithi chungkhar (a umnak dawng) le nih YLA sual an phawtnak le lainawng bang in an chim (chuah) nak bia hmurka zeihmanh a um fawn lo.

Pariatnak.YLA le a thimi chungkhar, an pahnih (kaphnih) hnatlak ṭinak te in a thihnak kong tialnak (tarnak) thingpheng (signboard) zong ah a thihchan hi Lungtur zawtnak – Lungtur lo (Heart-attack) a si tiah ṭial a si. 9.YLA nghaknu tlangval pawl nih hin anmah YLA chungtel member a simi ruak an rak fimṭawl tawn bantuk tein thlanpi an tuahpiak i ṭha te in a ruak hi an thlah fawn.10.Social Media lei ah hi kongkau bia dik lo, zawndamh bia kan thanhzamhmi vialte kha a rannak in rak hlo (delete) viar ding in kan in nawl hna.11.Hi thihnak kongkau ah hin thil umtuning fiang te in chimfian a si hnu zong i lunghnangam kho lomi le ai lungsak kho lomi kan um a si ahcun a ruak Post-mortem tuah zong kan i huam fawn.

Kanmah Laimi kan Media lei pawl nih thil sining lo bantuk in bialip an post zamhmi pawl hi zaangfahnak in biatling le bialip a si ti kha rak i fiang cio cang hna usih law, Laimi le Laimi u le nau kan karlak ah remdaihnak a hrawktu le i pehtlaihna hri a dor tertu kan si sual lo nakhnga atu thok cun chimceih dong hram cang seh tiah zaangfah kan in nawl hna.

Be the first to comment

Leave a Reply

Your email address will not be published.


*