DALAN TAMNAK AH PU NGUN SAN AUNG KHUA AI TEL HOI CANG

Pu Ngun San Aung khua tel in Matupi Peng ah Dalaan an phul. SAC phu nih Matupi ah ralkap thazaang an chap rualrual in Chin Ramkulh SAC Chairman Pu Ngun San Aung khua Ngaleng tel in Matupi Peng ah Dalaan a phul, an cawlcanghnak nih a thawng chin lengmang, tiah kan theih. Matupi khuachung, Phaneng khua le Pu Ngun San Aung khua Ngaleng hrawng ah SAC ralkap hnukham Dalaan pawl an cawlcangh ning a thawng chin lengmang tiah, min langhter lo mi khuami pakhat sin in kan theih.

Matupi Peng ah hin Dalaan zat hi adik cun kan thei kholo. An tam ngaingai lai. Dalaan hi a bik in USDP party chungtel deuh an si. Cu hlan bantuk in duhpoh biachim le capo biatak zong kan chim ngam ti lo. A bik in Ngaleng khua hrawng ah hin pakhat le pakhat i chawnhbiak tik ah ralrin a herh khun,” tiah min langhter lo mi pakhat nih The Hakha Times ah a chim.

Tedim Peng ahcun khuami cawlcanghnak siseh, CDM a tuah mi hna min cazin tibantuk SAC phu sin ah a thli in a petu Dalaan hna cu fakpi in dantat nan si lai, tiah May 19 ah social media cahmai ah ralrin peknak thawng an thanh. Matupi khuapi le Phaneng khuate ah hin Kha-ma-ya 304, Kha-la-ya 140 Battalion le Strategy Office tiin hmun thum ah hmun an khuar i SAC ralkap thazaang an chap rualrual in Dalaan pawl cawlcangh ning a thawng chin lengmang ve, tiah kan theih. Credit: The Hakha Times.

May be an image of tree and mountain

Relchih:Ralrang an thil tuahmi nih kan Chin miphun dihlak liang cungah doh dingin rian a kan khinh.Hi dohnak ahhin mifim hlei an um lo. Riansang hlei zong a herh lo.Mirum hlei zong an um lo.Nuhmei pahmei tiang kan zapi tein ralkap kan si dih. Israel prime minister a tuan hmasa bik David Ben-Gurion nih “kan ram bite hmanh sehlaw kan ral a ngiatu (spy) a si mi “Mossad” a thawn ahcun zei ram hmanh kan tih hna lo” tiah a rak chim.

Kan Chin miphun zong mi tlawmte si hmanh uhsih law “Mossad” bantuk lungput kan ngeih dih ahcun zei bantuk ralhrang hmanh kan tih ve lo ee.Cun miphun dang nih chinhmi nithawng tangah um caan zong a si lo.C-Cawnbik paral tha,Chin phun kan si.Cubelte cu kan lungrual caan a si.Chin National Day (CND) a hringtu kan pu le kha nangmah Falam, Hakha, Teddim etc an i ti lo. Anmah le anmah kha “ U nau, nang zeitin dah na ruah,vun chim ve tuah,na hna tla maw?” tiah u nau lungput he lungrual tein khua an rak khang ti.

Kan holh aa dan ruangah unau kan sinak a pelte hmanh kan don ti hlah seh!Chin ram chung ummi vate hna hmanh an holh aa dang cio ve ko nain pakhat le pakhat an i hua hna lo.U nau hmanh dawt loin huatnak lungthin he zeitindah Dawtnak a si mi Pathian hi kan naih ngam hnga ka ti?Thangthar mino hna nih CND a hringtu kan pu le nih an rak ngeihmi “U nau” lungput hi nunter in tharchuah i kan lungrual caan a si.

Kan Chin miphun chungin “Thawngtha” a chimtu saya vialte zong nih miphun ah unau kan sinak le dawt a herh zia nan chim caan a si.Peng khat le pengkhat zong i tlawng uh law miphun ah unau kan si. Kan i daw hna lai timi Thawngtha lawng hi tulio ahcun kan chim tuah uh! Paul le Abraham le Mosses kong nan chim cu a tam ngai ko cang caah Sunday dah ti lo cu unau karlak dawtnak Thawngtha hi Chin ram cul diklak in phuang ve cang tuah uh!

No excuse! Unau kan i dawt ahcun a theipar cu lungrualnak a si ko. Kan miphun lungrualnak caah na liang cungah rian khinh ve nan si hi kan philh piak sawh hlah uh! Ral doh tikah mah karlak ah aa tenh ve mi ral hi hmuh lo mi ral a si caah tih a nung tak mi a si.Tulio hmanh a lar manh cang i a min ah”Dalan” an ti.Dalan lungput a ngei sualmi vialte zong thisen tam a luan hlan ah atu hi ngaih chihnak caan tha a si.

Dalan kan um lo ahcun ralhrang thazaang 50% a zor i teinak cu kanmah kutah a um.Zeicatiah ral tuk tik ahhin ral thawngpang theih hmasa le ral dohnak hmun fing le tlang theih hi a biapi taktak mi an si.Tu lio ah ralhrang nih hriamnam thazaang ah a kan tei rih ko nain fing le tlang theih hngalhnak ah kan tei hna.Ralkap lawngte kan si timi lungput kan ngeih i kan lung aa rual ahcun anmah tlukin hriamnam zong kan zalh kho ve ko lai.

Cun ralhrang cu an duh lo bu fial chawmmi an si.Kan nih cu Miphun dawtnak he ral do mi kan si.Lungput ah 100% kan tei cang hna. Chin miphun vialte unau kan si hi mu.Kaa lawng si ti hlah seh! Falam ah pakhat thisen dor khat kawl ralhrang nih an chuah ahcun keimah thisen ai tel ve, Paletwa nu pakhat ralhrang nih an tlaihhrem tikah keimah farnu a si, mindat ah ralhrang nih an thah hna tikah ka unau an si timi unau lungput kan ngeih caan a si.

Ral doh ahcun thlachiat ruah a um lo.Kan unau hna nih an pekmi thisen caah lungrual tein teirul cham caan a si.Atulio bak hi Miphun caah kan zapi tein rian kan tuan khawh lio caan tha bik a si. Kan doh mi ral ai khat.Kan duhmi le kan i timhmi zong ai khat.Hi ralhrang a tak in kan dohnak nih kan Chin miphun karlakah unau lungput hi karh ter seh law double in teinak kan ngah ko hnga mu! Credit: Salai Tin Maung Win

Be the first to comment

Leave a Reply

Your email address will not be published.


*