COZAH THAR AH AHODAH CHIEF MINISTER LE HLUTTAW SPEAKER ASI LAI? BY: SALAI KB THAWNG

Cozah thar ah ahodah Chief Minister le Hluttaw Speaker a si lai? By: Salai KB Thawng. Ka tlangtar hi biahalnak in ka thok bantuk in biachattu ka si lo. “Ruahdamh” sawhsawh a si i prophet zong ka si lo. Ramkheel thlihran ka bih khawh mual in ka hun thai mi a si. Cucaah, a dik lo sual tik ah ka tial mi aa palh tik ah, “Naa palh,” ti khawh a si lai lo.

Chief Minister ahodah a si kho? Chief Minister hi cu hlan ahcun Pyidaungsu in tuanvo ngeitu nih an thim tawn hna. Tutan belte, Ramkulh siseh, Ramthen siseh, Chief Minister pohpoh Daw Aung San Suu Kyi nih a thim hna lai, ti a si. Atulio Chief Minister Salai Lian Luai hi minchiatnak ngaingai a ngei lo. Cun, hmuhton a ngei cang mi a si tik ah cheukhat nih cun Chief Minister a si rih ko lai, tiah an zumh.

Asinain, kei nih cun atulio Chin Ramkulh Cozah Chimphuannak Nawlngeitu Sipin le Electric Minister Pu Soe Htet hi ka zumh bik i aa tlak bik, tiah ka ruah fawn. Zeicahtiah, ralbawi rank sang zong a rak tuan i NLD ah direct in a luut than mi a si. Kanmah media nih thim lebang usihlaw, “Soe Htet,” tiah voi tampi au in mee kan pek ko hnga.Minister dang nih an tluklonak cu, media he zalong tein aa pehtlai kho mi a si.

Cheukhat Hluttaw Palai le Ministers cu an riantuannak kan hal kho hna lo. Media cu Cozah le mizapi kar pehtlaihtertu hlei pakhat a si bantuk in media sin ah an riantuannak le an dirhmun a chim ngam lo mi Minister le riantuantu cu zumh an si lo. Zumh awktlak zong an si fawn lo. Kawl holh in, “Vuanci” kan ti mi cu thilrit taktak a phurtu kha chim duh mi a si. Cheukhat cu amah thilrit lawng an phurh i mizapi ca ah thilrit an phur tuk lo ti khawh a si.

Pu Soe Htet cu, a nunnem, ahopoh he bia aa ruah kho. Thilrit aa khinh mi tlam a tlinh. Biachim holhrel zong ah atulio kan Minister hna lak ah amak bik a si.Amah hi Salai Isaac Khen rian changtu a si i kum 2 le cheu lawng a tuan manh nain a rian a tlamtlinh i Chimphuannak Nawlngeitu sinak zong an pek mi a si. Daw Aung San Suu Kyi nih a thim lai, ti a si ca ah ahodah a thim lai cu kan fiang lo nain kei Chief Minister ca ah Pu Soe Htet ka zumh bik.

Ahodah Hluttaw Speaker a si kho? Atulio Hluttaw Speaker a tuan lio mi Pu Zo Bawi cu thimnak ah aa cuh ti lo i midang pakhatkhat nih an tlaih cang lai, ti cu a fiang. Cucaah, kei ka zumh ning ahcun atulio Chin Ramkulh Cozah Upadi lutlai (Advocate General) Pu Sonny Thang Cung hi ka zumh bik. Amah belte, atulio Chief Minister Salai Lian Luai tu hna hi Chief Minister pakhat dirhmun in Minister le Hluttaw sawhsawh cu an pe lo kho men ve.

Aruang cu Hluttaw Speaker cu Law (upadi) a thiam mi a si a hauh ca ah Salai Lian Luai zong cu law (upadi) lei minung a si ve. U Sonny Thang Cung zong cu thiamthiam a si. Chief Minister in direct pi in Hluttaw Palai le Minister sawhsawh ah rian pek hi an i harh kho men. Asinain, tlak ti ahcun Pu Sonny Thang Cung aa tlak bik mi a si. Amah belte, biahleichap ka duh.

Ahoho kan chuah le kan tlin zong ah, “Kei cu mizapi nih mee peknak thawng in hi dirhmun ah ka dir,” ti hi philh hna hlah usih! Kanmah ca nakin mizapi ca ah rian a tuan ding mi kan si ti hi kan philhlo a herh. Hluttaw Palai si, Minister si, Hluttaw Speaker le Chief Minister si bu in kan i rumnak sual ahcun cucu kan lih le hrokhrawl in rian kan tuan tinak a si lai.Zeicahtiah, kan thlahlawh (lahkhah) men in rum, ti mi cu a si kho lo tuk mi a si.

Ka bia ka fun lai. Cozah thar cu Hluttaw hi February ah fehter a si lai i Cozah thar zong March thla chung thiamthiam ah an kai ve lai. Tutan Cozah thar Chief Minister ding ah ka zumh bik mi cu Pu Soe Htet le Hluttaw Speaker le Deputy Speaker ah Pu Sonny Thang Cung le Salai Lian Luai ka zumh bik hna. Biatang kaa danh bantuk in hihi a dik hrimhrim lai, a si hrimhrim lai, tinak a si lo. Laknak: The Hakha Times

Be the first to comment

Leave a Reply

Your email address will not be published.


*