CNLD PAWL RAK I NGAI CHIH TE HLAH UH, SALAI LUNGTHLI TUM

Salai Lungthlitum:CNLD nih teinak hmuh sual hna sehlaw an chairman Nothankap khi Chief Minister caah an party nih an chuahpi te kho, cubantuk caan ah CNLD MP poah nih an party zulhphung ning in an hotu Nothankap vote an thlak te lai. Cutik lawng ah CNLD vote ka pekmi kha indirect in Nothankap pei vote ka pek ko kha’ timi nai fiang te lai, i chir man a ngei ti lai lo.

Bahu cozah sernak ah CNLD le USDP an tanti sual ahcun CNLD mee ka pekmi kha indirect in ralkap party USDP vote ka pek pei si hoi ne hi tiah na zai len te lai, i chir man ngei hoi te lai lo tiah Thantlang peng Independent in tutan zuamnak luh aa timmi Salai Lung Thli Tum nih a chim tthan.

Relchih:Zei Caah Dah Chin Miphun Nih NLD Hi Vote Pek Aharh Pakua:Chin miphun nih NLD Party vote pek a herhnak a ruang tampi kan chim cang. Kan chim hrelhmi zong tampi a um ko lai.Chim cawk ding zong a si pek lai lo. Zeicaah tiah kha hlan a liam cia kum 60 chung vialte nakin atu NLD cozah term khat chungah hin Chinram hi tampi aa thleng i NLD nehnang hi hmuh ding a tam deuh tuk. Tutan cu Vice President ( 2 ) dirhmun kong lawng kan chim lai, nain kan bia a sau deuh men lai caah lungsau in a dongh tiang rak rel cio dingin kan sawm hna.

Vice President ( 2 ) dirhmun kong ah biatak phozarnak ( Apologetics ).Chin miphun nih cuti men in Vice President kan hmuh khawh lai timi cu kan zanmang hmanh ah kan rak i ruahchih ngam lomi khi a si. Asinain, Pathian le NLD thawngin kan i ruah ngam lomi thil cu kan hmuh tikah Chin miphun caah cun i lawmh lo awk hrimhrim a tha loh. Asinain hi tluk thil lianngan a kan tuahpiaktu NLD cungah i lawmhnak cang a thei ve lomi minung zong cu an rak um ve hoi. A dawh dang ngaimi bia hmangin VP kongah Chin miphun a kan hlen cuahmah caah mizapi fian khawhnak ah biatak phozarnak tuah ka duh.

Zei bia dah an chim? Pakhatnak. Pu Henry Van Thio nih VP a tuanmi cu NLD nih a kan dawt caah a si lo, Thantlang Peng nih vote an pek caah a si an ti. Thantlang Peng nih cun Pu Henry Van Thio hi VP caah si loin MP ca tu ah vote an pekmi a si. VP tuan kho lakin mipi nih vote pek khawh a si loh. Thantlang Peng nih an dawt caah vote an pekmi cu a si ko. Kawlram pumpi ah midang zong mipi vote pek ruangah MP a tlingmi hi an um ve liangluang ko nain VP an tuan kho hlei loh. President le Vice President si dingah hin mipi thimmi ( elected ) kher kher a hau loh.A lengmi zong tuanter khawh an si.Cucaah kan pu Henry Van Thio VP caah a thimtu cu Pathian le NLD Party bak hi an si ko.

Pahnihnak. Vice President ( 2 ) cu tlangcungmi savo hrim hrim a si an ti.2008 phunghram ah VP hi tlangcungmi savo a sinak kong hmuh ding pakhat hmanh a um loh. 2008 phunghram ah aa tialmi cu Pyithawngsuh hluttaw nih President an thim tikah Pyithu hluttaw nih VP caah pakhat, Amyothar hluttaw nih pakhat, ralkap pawl nih pakhat an chuahpi hna lai i vote pek tikah vote tam bik a hmumi kha President a si lai. A changtu khat VP ( 1 ), vote hmu tlawm bik kha VP ( 2 ) a si lai ti tiang lawng a um.

President le Vice President hna hi mizei savo hmanh a si lo, ruling party nih a duhmi paoh a pekmi savo tu a si deuh. Zei miphun paoh nih tuan khawh dih a si. Tlangcungmi savo zong cu va si bia hmanh ah Kawlram ah miphun 135 a ummi lakah zei ruangah dah Chin miphun kher kher a kan thim hnga? Mah cu pei NLD nih Chin miphun a kan dawtnak cu a si fam hnga cu, si lo maw?

Pathumnak. Term khatte ten chawntermi ( Rotation ) a si an ti. Rotation timi zong hi 2008 phunghrampi ah hmuh ding a um bak lomi a si. Zei party policy hmanh ah a um fawn loh. VP ( 2 ) hi rotation in an rak kalter cangnak tuanbia zong hmuh ding a um hlei loh. 2008 phunghram an fehter hnu in USDP nih 2010-2015 karah anmah duhmi te Shan pa Dr.Sai Moh Kham kha VP ( 2 ) cu an tuanter ko i NLD nih 2016-2020 karah anmah duhmi te Chin pa Dr.Henry Van Thio cu VP ( 2 ) an tuanter ve ko. Hihi rotation ti awk a tha loh.

Party dang dang, policy hrim hrim zong aa lo lomi an si. USDP nih Shan pa an tuanter cang caah kannih NLD tu nih cun Chinpa seh kan tuanter ti phun khi a si loh. A sullam cu VP ( 2 ) hi ruling party paoh nih an duhmi minung kha a tuanter ko. Rotation a si hrimhrim loh. BIATAK CU MAH HI A SI. USDP & Dr. Sai Moh Kham. USDP cu ralkap nih hruaimi party an si i 2010 election ah khan Advance Vote ( Cu- Tin- Mee ) in a tlingmi an si i mipi zong an rak i lawm lo ngai caah USDP caah cun mipi lunglomhter kha a rak biapi tuk. Election hlan in teinak an hmuh te ding kha an rak tuaktan cia dihmi a si. USDP cozah chungah mizeidah hruaitu si te lai timi cu an putar pa nih a tawlrel dih cia.

Vice President ( 2 ) caah hin mikip nih cohlan khawh dingmi minthang Dr.Sai Kham Leik, ( hlasak thiam Sai Htay Saing hla phuahtu pa kha a si ) hi VP 2 caah an rak timhlamh chungmi cu a si. Amah hi midingfel a si i USDP member zong a si loh. Election zongah aa cuh loh. Ralkap a remlo ngaimi a si. An lemsoi lengmang ko nain a duh bak loh. Amah pumpak hlawknak caah ralkap he riantuantti cu a ruat kho loh.( Kan Chinmi hruaitu cheukhat nih cun Vanthat an ti ko hnga ). Sai Kham Leik an hnek khawh lo caah vansan ah Lashio ah private Sii- khan a hongmi anmah member cia Dr.Sai Moh Kham tu an tuanter thanmi a si.

B. NLD & Dr.Henry Van Thio. NLD Party zong nih 2015 election hlan in teinak an hmuh si ahcun president le Union Minister cheukhat ca le Chief Minister ca tiangin an rak tuaktan ciami a um ve. Nain Vice President ca le Union Minister cheukhat caah a herhningin tuaktan te dingah chiahmi zong cu a um ve. Kan pi Daw Aung San Suu Kyi nih hin Chin miphun zawn cu a kan ruah hrimhrim ko ti a langhnak bik cu Election hlan te in Chin miphun chungin pakhat khat Union Minister pek te dingin a rak tuaktan ciami a um.2015 Election aa lim tikah NLD nih landslides bakin teinak cu an hmuh.

A rauh hlan ah Chin MP cheukhat nih Chief Minister kongah ca an tialmi cu NLD CEC sinah an rak pek. Tlawmpal ah Pu Henry Van Thio cu CEC Office ah a va kal i U Win Htein a va ton. Mah lio ah U Win Htein hi NLD Party chungah kan pi nih a zumh bikmi a rak si. Pu Henry Van Thio biachimmi nih U Win Htein lung cu a rak ton tuk hringhran. U Win Htein nih kan pi sinah, ” Chinmi chungin Union Minister caah aa tlak ding minung ka hmuh cang.

Amah cu Major Henry Van Thio a si. Mitha taktak a si i Union Minister caah si loin Vice President ah thim ding a si ko lo maw? ” tiah a ti i kan pi zong cu a hnatlak ve caah an thimmi a si. Savo phun in tuaktanmi a si loh.( U Win Htein tialmi cauk chung bia. C. Kan pu Dr.Henry Van Thio nih VP hi a peh rih hnga maw? Mah hihi bia halnak tha tak takmi a si. Theih kan duh cio men lai. Ca tialtu hmuhning ahcun a peh rih te ko lai. Amah ah tlin lonak le sual palhnak zei hmanh a um loh. Chin State ah NLD Cozah luban a rak tlungmi paoh nih ” Pu Van Thio cu a teima tak tak si ” an ti pengmi a si.

Mi ding bak a si fawn. Rotation phun in a kal lonak kan langhter hmanh lai. 2015 ah khan USDP nih teinak rak hmu hna sehlaw VP ( 2 ) caah Dr.Sai Moh Kham thiam thiam kha tuanter an rak timh ko. Rotation in kalter an tim loh. Zeitindah kan chim khawh ti ahcun 2016 Pyithawngsuh hluttaw ah President an rak thim lio ah khan NLD nih Pyithu hluttaw in U Htin Kyaw,

Amyotha hluttaw in Pu Henry Van Thio an rak chuahpi lio ah khan USDP nih Amyotha hluttaw in Dr.Sai Moh Kham thiam thiam an rak chuahpi ve caah tutan thimnak ah NLD nih teinak a hmuh ahcun VP ( 2 ) cu kan Chinmi chungin Dr.Henry Van Thio nih a kan tuanpiak ko rih lai.Cucaah hi tlukin Chin.miphun a kan daw i a kan duhsaktu NLD Party hi vote kan pek hna lo ah zei bantuk party cu dah kan va pek hlei ti hna hnga? Lungfim caan a cu, Chin miphun nih kan covo hmuh than awkah NLD hi vote pe cio hna usih. By Victorpa

Be the first to comment

Leave a Reply

Your email address will not be published.


*