CNLD NIH TEINAK NGANPI AN KAN HMUH PIAK KO KA TI, KA UPAT TUK HNA

CNLD nih teinak nganpi an kan hmuh piak ko ka ti, ka upat tuk hna.Tukum election boruak karlak te hmanh ah Chin mino tampi nih miphung ttanhnak thisa an ngeih tikah Chin miphun kan Hauhruang a fek chinchin cang ti khawh a si, hi hi teinak ngan taktak ah ka ruah.

CNLD timi Miphun ramkhel Party cu election teinak ca men lawng ah dirh mi a si lo, techin fapar ca tiang in timhtuah mi, Miphun Covo kong ah a au peng ding kan si tiah Upa lutlai lei nih an chim zungzal. Tutan zong ah Mino tampi miphun thisa thanghnak le dirkamhnak lei ah an hruai colh cang hna, an kan funtom colh.

Chin miphun kan Hauhruang a fek chinchin cang tiah tukum rampi thimnak boruak nih a langhter. Rampi thimnak boruak ah mino tam taktak nih Miphun an dirkamh mi ka hmuh, ramchung ramleng mino tampi nih CNLD an dirkamh. Chin ram cu Chin minung nih kan uk ve awk a si, Chin ram ahcun Chin Miphun Party kan tthawn a herh cang timi le Rampi thimnak hi Chin miphun kan caah identity khelnak lam kan ngeih chun a si timi ruahnak,

Miphun ttanhnak le dawtnak thinlung in mino tampi an cawlcangh mi ka hmuh tikah “Chin miphun mino tampi nih Miphun tthangh phawhnak an pemh” timi hi keimah hmuh ning a si. Chin mino tampi nih hi tluk in Miphun thisa tthanhnak an ngeih hi election i teinak va hmuh thlu zong zong ah a sunglawi taktak mi, a man a sungkhun mi a si.

Covid-19 boruak nih Miphun Party cawlcanghnak tampi a donh, NLD caan cun caantha ngai a si fawn, Cozah a tlai lio mi an si, duh paoh in khual an tlawn, an vak kho i Election tuah lai tiang ah khuakip an tlawng, bomhnak an pek hna, thanchonak le chawva in Chin mipi lem kan si rih (Cozah Budget in Campaign an tuah ti khawh a si).

CNLD cu tukum te lawng election ah a lut rih. Cu hmanh cu CNLD Party tiah an dirnak a kum te lawng a si rih tikah a no ngai rih. Hi tluk in a no rih mi a si ko nain tukum ah miphun thisa dawtnak lei ah mino tampi a hruai manh hna. Covid 19 boruak, kharkhumh lio caan hmanh ah hi tluk in an cawlcangh khawh hi cu ka thangthat tuk hna.

Pengtlang, chungkhar unau timi ah si loin Miphun timi ah mino tampi an cawlcang cang. Chawva le thanchonak men ah kan diriam hlah seh, kan Miphun covo, identity hi nikhat hnih ah a dih ding mi chawva men ah kan zuar awk a si lo tiah mino tampi an au. Mino tamtuk nih Miphun dawtnak le runvennak kong tlang au cu Chin miphun kan hmai lei caah ruahchannak a ngan tuk hringhran. Hi ruang ah hin CNLD nih teinak ngan taktak, a sunglawi khun mi an hmuh ka ti nak zong a si.

CNLD kan Miphun caah Pathian nih fek tein dirter chin hram seh. Tukum thimnak ah a cuh mi CNLD palai vialte le CNLD rianttuantu le dirkamhtu nan dihlak upatnak ka pek hna. God bless. Ka hawile cheukhat nan mawh lo, Mah miphun tthanh hmanh pei nan theih lo hi nan ka timi kha, hmailei Miphun thisa kan ngeih ve nak si hram seh. Credit: Salai Cung Dawt.

Be the first to comment

Leave a Reply

Your email address will not be published.


*