A SUNGLAWITUK CNLD LAWMHPI CIO HNA USIH, THAWNGTTHA TAKTAK ASI

Miphun Party CNLD caah cun thawngpang ttha taktak a chuak cang. Kalay peng UDP Party pawl nih cun CNLD ah mee an pek lai tiah theih asi. Hi konghe pehtlaiin UDP Party pawl cu UEC nih thimnak nan lut lai tiah a kham hna. Curuangah UDP party chungtel hna nih cun CNLD ah vote kan pek lai tiah an chim ti asi.

UDP Party chungtel hna hi Kalay peng ahcun minung thong sawmli le thongriat an um hna. Cun Tamu Myone ah hin minung thongkul le thonghnih hrawnghrang chungtel an um rih ti asi. Kalay peng he Tamu he UDP party chungtel vun fonh tik ah hin an dih lak in minung thong sawmsarih hrawnghrang an si hna ti asi.

UDP party pawl nih CNLD ah vote an pek lai ti asi i, CNLD ah vote a pe dingmi hi a cunglei vun langhter cang bangin minung thong sawmsarih hrawnghrang an si lai tinak asi. Culawng siloin hi konghe pehtlaiin Kalay peng UDP Party lutlai Pu Hung Thanh nih a chimmi cu kannih cu CNLD ah mee kan ko lai. CNLD ah vote kan thlak lai ruangah CNLD chungtel kan sinak cu asi lo.

Sihmanhsehlaw Kalay peng UDP Party chungtel vialte kan i ceihmai hnu ah kannih cu CNLD kan bawmh hna lai tiin lungtlin hnatlaknak kan ngei tiah a chim. Hi kong tthiamtthiam he pehtlaiin a ralaimi thaizing ah hin CNLD upa hna le Kalay peng UDP upa hna cu rawldumnak zong an ngei lai tiah theih asi.

Hi konghe pehtlaiin Kalay peng CNLD party lutlai Pu Lian Nawn nih hitihin a chim. Kalay peng UDP Party lutlai Pu Hung Thanh nih hin CNLD hi thaazaang akan pek ngaingai mi asi. Tutan thimnak ah UDP Party chungtel asimi kawl pawl hna nih cun USDP ah vote an pek men ko lai. Asinain kanmah Chinmi nih cun CNLD ah vote aa kan pek lai tiah a chim.

Relchih hmanh: Tihnung tukmi USDP party le CNLD party. Ralkap nih 1962 in nihin tiang a kan uk. Amah ralkap bomhtu ding caah political party hi a dirh peng ve. 1990 thimnak tuah lioah ralkap bomhtu caah National Unity Party (NUP) a dirh. Thimnak ah a tling kho lo, NLD nih teinak a hmuh. 2010 ah Union Solidarity and Development Party (USDP) min in thimnak a tuah. NLD a tel lo caah amah nih kum (5) chung rampi cu a kalpi. 2015 ah rampi thimnak a um tikah NLD a lut ve cang i NLD nih teinak a hmuh i kum (5) a kan kalpi ve. Tukum 2020 November 8 ah rampi thimnak tuah ding a si cang. Kum dang i USDP lungput le dirhmun zong mipi dihlak nih hngalh cio a si caah ka langhter ti lai lo. Tukum 2020 thimnak ah NLD nih teinak a hmuh lo dingah ‘Tactics’ (lam) an kawlning cu ka tial cang ve.

Mifim, mihngalh deuh le zumh awktlak upa pawl nih tukum hi NLD lawng nih Cozah a tling kho lai lo caah tlangcung party pawl a sawm lai. Cucaah tlangcung party pawl caah anmah miphun party ah teinak an hmuh ding a herh tuk kum a si tiah mipi le tlangcung party le minung hlenter dingah USDP lutlai ralbawizik Min Aung Hlaing nih a fial hna. NLD nih teinak a hmuh ahcun thil tampi a tuah khawh lai caah ralkap ca zong, ralkap tanhtu pawl ca zong tihnung a si kho men tiah an phang tuk caah NLD tei lo ding le a rawkralnak lam an kawl cang. Mipi hi mihrut an si lo, ralkap le usdp minung lawng mifim le mithiam an si lo i NLD ah mifim, mithiam tampi an um ve lawng si loin NLD tanhtu mipi hrimhrim an tam tuk cang. 2015 nakin tukum hi NLD tanhtu an tam deuh ning khuaruahhar bak a si cang.

Party dang tanhtu 1000 an chuak lioah NLD tanhtu 10000 an chuak.Party dang tanhtu thawng 10 an chuak lioah NLD tanhtu Ting 1 an chuak cang. Tukum chinchin cu NLD nih teinak a hmuh ding a fiang tuk cang caah USDP tanhtu pawl nih buainak lawng an kawl cang. 2015 lioah NLD sunghnak tlangcung hmun tampi zong tukum cu NLD nih a teinak hmun tampi a um cang lai. Nikum i USDP teinak hmun tehna kha tukum cu USDP caah teinak a um ti lo, tlangcung party le NLD ta lawng an si dih cang lai.Kanbalu Myone, Kabu khua i party thazang an chuak lioah USDP tanhtu pawl nih NLD tanhtu Myo Min Soe (30) cu October 22 ah an vuak ruangah October 24, Mandalay Sizungpi ah a nunnak a liam timi kha ca a relmi vialte hmuh cio a si. Lainawng ding tiang party tanh cu thil mak ngaingai a si.

A taktak ah cun USDP lei kapin sandahpiah a si zong, party thazang langhter lio a si zong, usdp minung taktak an si lo. Mino vialte cu tangka 5000 or 6000 le Rawl kan dangh lai tiah khuate lei an lak tawnmi an si. Tangka hi tling tein an pek tawn lo caah zanlei sangah an sining a lang lengmang ve. An buai peng. Thawng 6 kan pek kai an ti thswng 2 lawng an ka pek tiin hnahnawkmi an tam peng. Tukum thimnak ah sung lawng si loin party tanhtu an um ti lai lo. Mipi nih usdp hi ralkap party an si timi an hngalh fiang chin lengmang lawng si loin usdp party hi misual party a si timi zong an hngalh tuk cang. Kumvawi lei cu usdp hi a tlau cang lai. A chan cu ralkap bomhtu caah dirhmi ‘NUP’ nih minung a rak thah lo nain zeihmanh a si ti lo caah tlaunak lei a panh thluahmah cang. A min te lawng a nung rihmi a si.

CNLD hi miphun party a si caah Chin minung vialte nih an tanh ding a si tiah a chimmi tampi an um. Miphun party kan dirh lai tiin Chin miphun vialte meeting auh in biakhiahnak tuah hnuah CNLD party hi dirhmi a si lo. NLD cozah riantuannak ah a hrawm kho lomi upa 2,3 ruahnak in CNLD hi dirhmi a si. Chin miphun vialte aiawhtu zong a si lo bantkin Chin State myone (9) vialte aiawhtu zong a si lo. Lungfim lomi cheukhat lawng nih CNLD cu miphun aiawhtu a si caah tanh hrimhrim a herh an ti. October 29, 2020 ah Ni Hnem Sung nih Global Rawn Chin Media in a vun langhtermi kha ca a relmi vialte nan hmuh cio ve lai. Matupi CNLD Vice Chairman U Lawng Han nih Daw Tin Cuai sinah a kal i CNLD ah Vote na pek lai, na pek lo ahcun kan thah lai tiah a hro chih timi kan hmuh. Daw Tin Cuai pumpak in Vedio in a chimmi zong hmuh cio a si.

Vote pakhat te ruangah minung nunnak lak a ngammi CNLD party lungthin cu tih a nung taktak ko. USDP nih amah teinak caah biachim loin NLD sunghnak caah bia a chim lawng si loin buainak le thihnak tiang a chuakter. CNLD hruaitu pawl le tanhtu pawl nih CNLD cu miphun party a si nan tanh hrimhrim a herh an ti i lainawng ding tiang ngamh in tanh an duh. USDP cu hmaikum in cun a tlau te men lai.Tukum zong USDP a tanhmi Chin minung kan um rihmi kan zoh tikah hrutnak sii an dintermi an tam rih timi a lang tuk. USDP nih minung nunnak a lak cangmi hmuh dih a si. CNLD zong USDP keneh zulh a timh ve cang. Daw Tin Cuai nunnak a dih hlanah mipi nih khamh khawh izuam u.Mah ning a si ahcunparty dang tanhtu caah USDP tanhtu pawl le CNLD tanhtu pawl pawngah um ding le khuasa ding hmanh tihnung a si cang lai.

Kan ram le kan miphun damnak le hnangamnak si loin tihnung tukmi party le lungput an ngei chung cu hmailei ca zong tihnung a si caah iralring a hau cang lai. Atu chinchin cu USDP he Alliance ‘Kawi’ an si cang i 2008 phunghrampi a dirkamtu a si ve cang lai. 1990 lioah NLD he Kawi a simi CNLD cu 2010 in zumh awktlak a si ti lo caah Kawi an si kho ti lo.Atu cu ralkap tanhtu a si ve cang i NLD he an lungput a hlat tuk cang. Ram le miphun caah bochanmi party si loin tihnungmi party lei a panh ve cang. A poi tuk. Credit: Laiki Chozah

Be the first to comment

Leave a Reply

Your email address will not be published.


*