CNLD CANDIDATE PU VAN CHAN CEU NIH NLD LE USDP CU APHOMH CANG HNA HIH

CNLD Kheelmi Federal Hi Vuipi Tia Asi Cun NLD Le USDP Cu Langak Tia Hmanh An Si Lo. Federal hi phun tampi a um. Nga phun in kan chim ahcun CNLD (Chin miphun) telh in Tlangcung miphun hna nih kan duhmi le kan khelmi federal hi Laitlang Ngapum phun khi a si ahcun NLD federal cu ei awk a tha lomi Bombuluk nga a si.

Cu ve bantuk in USDP federal cu Bombuluk in “Uitlak” ah aa cangka mi te phun khi a si. Nem deuh in kan chim rih a si ahcun CNLD kan khelmi federal hi Vuipi tia a si ahcun NLD federal cu Thlaiberh tia lawng a si lai. USDP nih an khelmi federal chinchin cu Pithlung tia lawng a si lai. Phundang in cun NLD le USDP federal cu Lai Langak tia hmanh an si lo(Langak nih arpi a tia lo).

Zeitindah kan tah khawh? 2015 le 2020 thimnak cathanh manifesto ah fiangte in a lang. CNLD khelmi federal phunglam cu 2020 thimnak CNLD manifesto ah fianghlang te in langhter le thanhchuah dih a si cang. Hlangkaro in kan chim ahcun USDP nih an khelmi cu Burmanization policy kalpi pah in lam le sul, inn, tibantuk infrastructure Thanchonak tlikpi khi a si.

Cu ve bantukin NLD nihcun Burmanization policy kalpi pah in “Ralkap uknak thlak i zaukphung uknak lenter” ceo tiang lawng khi a si ve. CNLD le tlangcug miphun party hna nih cun ralkap uknak thlak i zaukphung uknak lenter tiang vial lawng le infrastructure lei thanchoter vial lawng khi a si lo. Kan sungh ciami kan miphun covo khuakhirh than le kanmahte in khuakhan lairelnak ngeih i kan miphun nih a duhmi le a herhmi ningte in thanchoter le sersiamnak rian tuanchuah khi a si.

Phundang in kan chim ahcun miphun dang le midang nih Chinram hi anmah duhningte in thanchoter khi si loin “Chinmi nih kan duhmi ningte in” sersiam le thanchoter khi a si. USDP le NLD nihcun federal hi an duhmi le an khelmi taktak zong a si lo. Hmaikhah lo ah an i kheltermi le velhle sawhsawh in an hei chim menmi khi a si.

Kan miphun covo khuakhirh thannak ding cu Chin mizapi kutcung ah a um. Cucaah, Chinram le Chin miphun caah CNLD Vote Hna Usih. Pu Van Chan Ceu, State Hluttaw No.1 CNLD Party, Hakha Township. Media Team. Credit: Van Chan Ceu

Be the first to comment

Leave a Reply

Your email address will not be published.


*