CNLD AN LUNGHRINH NAK HNA A RUANG 13. BY VICTOR PA

Mizapi Nih CNLD An Lunghrinhnak Aruang 13: Lai phungthluk ah, Ar nih hma lo a cu loh, mi nih bia lo an chim loh, an ti bang, mizapi nih CNLD le Kawl ralkap an i bawm te hmanh maw, tiah an lunghrinhmi hna hi a sawhsawh cu a si loh. A ruang tampi a um ve. Pakhatnak. CNLD President Pu Zo Zam ( a hlan CNDP hotu ) hi a hlan te in ralkap lei a hoih pengmi a si. 2015 election lai ah khan Dr.Sui Khar sinah, Kannih CNDP cu election khawh in USDP he kan ttangtti lai tiah a rak chim i mah bia cu Dr.Sui Khar nih German media sinah a rak chim.

Pahnihnak. CNLD President Pu No Than Kap ( a hlan CPP hotu ) zong hi a hlan te in ralkap lei a hoihmi a si ve. NLD a doh biktu le ralkap he naihniamte in a ummi U Khin Mg Swe he hmunkhat ah rian an rak ttuantti. CPP cu tlangcung party le Kawl party 9 fonhmi Federal Democratic Alliance (FDA) chungtel an rak si. FDA cu U Khin Mg Swe hruaimi phu asi.

Pathumnak. CNLD President Pu Ngai Sak: A nih hi a hlan CLD hotu a si i 2018 November 3 by-election lio ah Matupi Peng ah ralkap rocotu USDP nih CLD cu hmunhma an kianh hna pinah CLD Palai U Aung Lian a tlinnak dingah USDP le ralkap pawl nih vote an rak pek dih. Palinak. Tutan thimnak zong ah CNLD hotu cheukhat cu ralkap rocotu USDP nih hmunhma an kianh rih hna.

Panganak. State cheukhat ah tlangcung party cheukhat mi lemsoinak (campaign) tuahnak ah ralkap le USDP nih biatakten thazang an pek hna. Paruknak. Ralkap he aa naihniammi pawl (ralkap Muko ) U Ye Htut, U Kyaw Win, Ngun Cung Lian, Bo Bo Kyaw Nyein, Dr.Nay Zin Lat, Bado Man Nyein Mg,le Dr.Thet Thet Khine, te pawl,..nih tlangcungmi nih cun tlangcung party lawng vote pek ding tiah an aupi.

Pasarihnak. Matupi Peng Rezua CNLD Campaigner nih, Kannih CNLD cu ralkap he hawikom kan si tiah a chim timi bia a chuak. Pariatnak. Thantlang USDP ca chuahmi a leak out mi ah USDP le CNLD cu hawikom an sinak a lang. Thantlang cu Chin State USDP Chaiman Dr.Hmuh Thang a umnak khua a si caah mah bia hi ti sualmi a si kho hnga maw? ti ruah ding a um. Dr Hmuh Thang hi USDP Central Committee member zong a si caah USDP chungril a thei dihtu a si ve.

Pakuanak. CNLD le ralkap kalpimi tampi aa khat – Phukomh cozah an duh veve, Pohmah 261 te lawng remh an duh, PR system an duh veve, NLD dohnak ah an i khat, 2008 phunghram remh kong an chim lo veve, NLD cozah riantuannak kip ah hnahnawhnak an pek veve, Miphun le biaknak cu phaw ah an hman veve.

Pahranak. CNLD President Pu Ngai Sak le Pu No Than Kap hrimhrim nih media sinah, A herh ahcun NLD kan kop lai, a herh ahcun USDP kan kop lai an ti caah ralkap he riantuantti kha poi ah an chia loh ti hmuh khawh asi. Hleikhatnak CNLD hotu pawl nih voi tampi media sinah, NLD nakin cozah hmasa ( USDP ) a tha deuh tuk tiah an chim peng.

Hleihnihnak. CNLD hotu Pu Zo Zam hrimhrim kha Ralbawizik hruaimi phukomh meeting ah aa tel ve balmi a si. Hleithumnak. CNLD hotu pawl nih zeitikhmanh ah ralkap he hmunkhat ah rian kan ttuantti lai lo tiah mipi sinah an chim bal loh. Mah kan langhtermi hna ruangah hin CNLD Party cu mizapi nih an lunghrinh peng hnanak a si. A dik le dik lo tu cu tukum election khawh lawngah fiangte in kan hmuh te hna lai. Credit: Victor Pa.

Be the first to comment

Leave a Reply

Your email address will not be published.


*