CHUNGKHAR NIH RAK THLOH KO UH, APAM TUK LAI HIH

Mipi dohtu tapung, Min Aung Hlaing nih a sermi “State Administration Council (SAC)” ah itel dingin a sawmmi hna a cohlangtu paoh cu Min Aung Hlaing tuahsernak thape tu le dirhkamhtu an si hna. An sawm hmasami cu ni 8 a ttuan ah a nunnak a dih. Atu Pu Ngun San Aung an von sawm tthan i a cohlang hna tiah thawng theih a si. Chungkhar naihniamh le hawikom hna nih biatak tein rak thloh ulaw a ttha tuk lai.

Ralkap nih 1962 in an kan uk cang i, kan vuai cikcik. Kan ram cu vawlei cung sifakbik ram ah an caanter. Atu Min Aung Hlaing nih a von chap hawi rih. Feb 2, 2021 ah a von sermi, State Administration Council (SAC) hi a nung thai sual lai timi phan a um tuk. A sernak in ni 9 a kal cang i, Civil Disobedience Movement ruang ah a kal kho huaha ti lo. Hitluk in Kawlram mizapi nih SAC nung kal kho lo dingin CDM an tuah hnawh lio ah ralkap lei ttang in ralkap tha pek cu a si thiam hrim lo.

Ziah amah duhthimnak pei a si cu, a ti tawk nan um men lai. Asinain miphun le ram, society hi minung pakhat duhthimnak lawng in a kal thiammi a si lo.Minung pakhat-hnih nih an palh ruang ah miphun ningpi in harnak ton khawh a si. Pu Ngun San Aung le hawidang zeimaw nih ralkap tha an pek ruang ah, an miphun hawi dang vialte, Civil Disobedience Movement an tuahmi santlai lo a si ding hi a pam tuk. Cucaah, rak thloh sawh ko u. Credit: Zasang Cinzah

Relchih:CNF/A Leiin Mipi Dirkamhnak Statement A Herh Ngai Cang. Ralkap uknak duh lonak an langhternak sandahpiahtu an tam chin lengmang lei a panh. Caan tawite chungah Min Aung Hliang zong voihnih bakte biachimnak a ngei cang.CDM a siah mipi lam zawhnak a siah daih lei panh loin a zual lei a panh ko ahcun police lawng si ti loin ralkap hrut deuh pawl zong a thlah len te hna lai.

Chin state hrawng ahcun an si tawn bantukin a cianh zong an cian khun te men lai. Cucaah a herh ngai tiah ka ruahmi cu Sandahpiahtu lungrual taktak a hau. Tlaih ding dirhmun a phanmi an um hmanh ah zapi in dirti; funtom ti; zulhdawi ti a herh ngai. Ralkap an siah police an siah hrocernak le tukvelhnak zam tak loin tuar ahcun zapi in tuar ti, ttan ti le lungrual taktak in funtom ti hi a herh tuk.

Thin a phanmi cu an thazaang a der bik lio caan a si lai tiah zan tbk ah innn ah luhhnawh in tlaih le khih a um thluahmah te kho men. Ralkap pawl hi mifir fah in zan ah an vakmen te lai. Ralrin ding an um ngai kho men. Cucaah CNA/F leiin mipi runvennak caah kan mipi nan tlai kho hna lo; nan hrocer kho hna lo; harnak nan pe kho hna lo tiah Statement fiang ko le raltha taktak in an chuah zohzok a hau tiah ka ruah. An chuah cang hnga dek maw? Credit: Luther Tinhre

Be the first to comment

Leave a Reply

Your email address will not be published.


*