THAWNGTTHA: A CAAH HMUN A UM LO. VAN RUAT TA HNA USIH

A Caah Hmun A Um Lo. Luke 2:7, Puan in an zual i caw rawleinak kuang chungah khan an thlim riahnak khualbuk ah khan an caah hmun a um lo.Hngalh lo cu a rak fak ko. Jesuh cu Pathian titsa ah ai cangmi asi. Sihmanhsehlaw niam tein toidornak he kanmah khamh awkah vawlei i a rak rat tikah khan an rak hngal lo i khualbuk ah riahnak an awnh hna lo.

Cucaah cawkuang chungtuah an thlim. A chuah lio lawngah asi lo,a hung upat tik i a Pa rian a tuan tik zongah a ram ciacia le ami ciacia sinah a van i phuang i rian a tuan nain an cohlang lo. Johan nih tihin a tial: ” Amah cu amah ram ciacia ah ara nain amah mi ciacia nih khan an rak cohlang lo,” (Johan 1:11). Bethlehem khua, apa David khua ah a chuak nain hmun an pee lo, cawinn ah a chuak i cawkuangah an thlim.

A caah hmun a umlo. Rak hngal hnasehlaw kha ti khan an tuah to hnga lo.Atutiang zongah a si rih ko. Nihin hi Khrih chuahni, Khrismas ni cu asi le vawlei khuazakip ah asi thiammi nih a bupi in, asi thiam lo nih mitlawmte he, asi lo le, mah inn cio ah puai kan tuah lai i kan i pum lai i rawl kan i hrawm hna lai. Van ruatta hmanh usih.

Jesuh hi kan lungthin ah hmun kan pee tak lai maw? Immanuel kan hei ti len tung bu ah kanchungah khua kan sakter lai maw? Alengah dah kan dir ter peng rih lai. Khrismas sullam taktak cu a puai tuah hi asi lo eh. Kan chung i umnak pek hi asi deuh. A chuah kan lawm kan timi zong Amah taktak hi uar lo le tlaihchan hleng lo in a puai memmen hi kan buaipi deuh sual la ti phan a um.

Asi taktakmi ka van tenh duak la. Thantlang kan um lio ah pati bawite chung nau an ngei. Nau zohah nuva hna pahnih an innah an va leng hna. Cawhnuk bu, cini, chiti, facang thaw phun le ar lian nawn an i put. Sau ial an va thut hnu ah an innah an tin. Lampi ah pakhat pa nih ,” Zeihme nan ti, nan nuva ten?” ati hna. Pati kan bawile chung nau an nge le an nau kan va zoh an ti.

An naute cu nute maw asi, pate hme?” ati than hna tikah a leh awk an hngal lo. Pa le nu asi dawh kan hal hna lo cuh an ti. Naute an va dawt le an va zoh taktak asi lo. Kha lio chan ahcun patilei bawi cu aana an ngei ngai. Khawnsil le tamahwazamah ah rian khanh kho an si.Kha hna nuva an va kal i nau an zoh kha, naute an buaipi ruangah asi lo, riantal an pa kha pee te seh ti ruahah asi deuh.

Cuve bang tuchun zong Jesuh chuah lawmhnak puai le pumh kan tuah tung la va si kaw, chuahni ngeitu Jesuh kan tlawlh sual la ti phan a um hi mu. Jesuh hi ahodah asi i zeitiahdah a rat ti hna kan hrelh sual la ti zong phan a um thiam.Keimah lung chung ah rung um ko tuah ti kan sak tawnmi hi kaa lawng in siloin kan thinlung hi cawkuangah ah cang in Jesuh nih hmun la ko seh tiah sawm le fawrh bu in ma rih ning.Careltu, sharetu le commenttu nan dihlak MERRY CHRISTMAS! By. Rev Dr G Zathio

Be the first to comment

Leave a Reply

Your email address will not be published.


*