Chinram Cu Zei Party Nih Dah A Hruai Khawh Cem Ti Cu Fiang Tein Rel

Khah tutan thim nak cu a vun ngai kho tak cang mipi hna zong kan i ngaih cio kan tanh mi party nih tei nak a hmu lo sual la maw tiah kha za za cu kan ruat hna ,USDP cozah nih NLD cozah sin in aa-na an pek lai ah NLD cozah nih ram an hruai kho lai lo, thla 4 hmanh cozah an tlai kho lai lo tiah an rak ruah. Aung San Suu Kyi nih vuanci rian a pekmi hna cheukhat hmanh nih vuanci rian an rak cohlang duh lo, mah ruangah Aung San Suu Kyi nih vuanci phun 4 tiang a rak kemh chung.

NLD cozah cu cozah a tuan bal lomi an si caah experience an ngei lo, asinain mithiamsang an sawm hna hi NLD vuanci pawl le MP vialte training le workshop an kaiter hna. Kum khat chung cu rian cawn in an caan a liam. Ralkap cozah nih NLD cozah riantuan kho lo ding in hna hnawhnak le dohkalhnak an tuah peng hna. Rule of law um lo ding in buaibainak a phunphun an chuahter. Biaknak in siseh, miphun in siseh, buainak chuahpi an timh lengmang nain mipi ni an dirkamh caah biaknak le miphun in buainak an chuahpi kho lo.

A donghnak ah Rakhine ram ah phung loin a ummi Bangali, Rohingya pawl cu uile ar thawl in an thawl an dawi hna caah NLD cozah cu ralkap nih vawlei pumpi hmai ah belnaang an neh dih hna.Ramdang in sipuazi a lut dingmi FDA tampi an i ngol hlei ah Aung San Suu Kyi minthatnak an pekmi zeimawzet zong an chuh than. Ralkap bawi hlun pawl nih cozah rian department lutlai vialte an tlaih dih caah NLD cozah nih an duhning in thlennak an kalpi kho lo. A phunphun in cozah an dohkalh lawng si loin NLD cozah riantuan kho lo ding in a phunphun in lente an celh hnawh hna. Mah vialte harnak le buainak a phunphun lak ah NLD cozah nih kum 5 chung an tuanchuah mi zoh tik ah ralkap cozah nih kum 30 tluk an tuanchuah mi nak in a tam deuh.

USDP cozah nih kum 5 chungah rampi caah phaisa an hmanmi nak in NLD cozah nih a hmanmi tam deuh. Chin State NLD cozah nih Hakha cu khualipi a si caah khua kan kauh lai, inn hmun kan samh lai an ti i, mi cheukhat nih pupa ram a si, kanmah vawlei a si tiah phungning loin thlam an sak, deu an thlemh i an i kulh phungning loin innhmun an khuar.A ngaingai tiah cun Chinram le chin vawlei poah cu Chin miphun kan ta a si dih.

Kan pupa hna nih an kan rohmi ram a si caah aho pumpak ta hlei a um lo. Phungning tein registered a tuahmi dah ti lo. Vawleicung khoika ram poah ah vawlei cu phungning tein hman a si. Paletwa ah Vuanci Soe Htet nih Paletwa khua sernak caah anmah pumpak hmun ekah 100 a hlut. Mandalay zongah lam le sul an kauh i mi tampi nih an innhmun le an dum hmun tampi an hlutnak kong Mandalay khuabawi U Ye Lwin nih FB ah a tial. Asinain Laimi cheukhat cu miphun ka daw, ram ka daw a timi ko hi miphun le ram caah zeidah kan pek khawh ve lai timi nak in kan khua le kan ram in zeidah ka hmuh lai, zeidah ka ngah lai timi lawng kan tuak.

Mah nih kan thanchonak a donh ngaingai. World Bank nih Kalaymyo in Hakha tiang lam an cawh i, kan dum le kan hau an hrawh ti in buaibainak a tam tuk caah caan zeimawzet ngolter a si. Asinain ka dang ramkulh le ramthen ahcun mah bantuk buaibainak hi a um tuk lo ti a si. Ralkap chan ah Zopeng Pu Ni Kung nih Nawi Dam kan tuah lai tiah tlang a rak au i, zohfeltu zong nih a rak zoh i, zeimawzet an tuan nain cozah lei in phaisa thazang tlamtlin lo ruangah tuah khawh rak si lo.

Aho nih atu bantuk in soiselnak le dohkalhnak a rak um lo.Pathian nih thlua a kan chuah i, Pu Henry Van Thio cu Vice President a si caah a nawlngeihnak hmang in Nawi Dam tuah kho ding dirhmun kan hung phan.  Asinain Nawi dam kan tuah ahcun Hakha a rawk lai ee, a tolh lai ee, a thur lai ee tiah biasi kan phai i dohkalhnak lawngte kan chim. Dam he a pehtlai in mithiamsang hna nih tha tein an zohfel hnu ah tuah dingmi a si. Atu cu technology a san tuk cang caah tithur kongah buai ding a um lo. Siangapore ahcun ti an thletmi lila kha tithianhnak hmun ah an thianh than i zapi din dingah an ser than.

Lee Kuan Yew nih amah pumpak hrimhrim in mizapi hmai ah hmuhsak nak in a din piak hna. Tikir nih dam an tuah i, Pu Henry Van Thio lehlam soisel le mawhchiat a tong. A ngaingai tiah cun Pu Henry Van Thio ramkhelrian i a luh hlanpi in Tikir dam cu rak thawk diam cangmi a si. Pu Van Thio nih a tuanchuah mi lawng a si. Chinram khoika hmun poah ah thanchonak a tuah ahcun ilawm ko usih. Pu Henry Van Thio nih Hakha, Thantlang ca lawngah si loin Chinram pumpi caah a tuah lomi a um lo ti tluk a si.Chinram lawng hmanh a si rih lo, Kawlram pumpi ca tiang in a tuan cuahmah mi a si.

CNF nih Thantlang ah National political dialogue tuah rak timh a si i mah lio ah tuah kho lo dingin a phunphun in khamnak a rak um, asinain a donghnak taktak ahcun Pu Henry Van Thio thawng in tlawmtling tein tuah khawh a si. Falam Surbung airport, Hakha University, GTI, Hakha Sport Science School, Hakha hluttaw zung, Pyitawda market, Hakha Midwifery School, Hakha Education College, GTHS (Thantlang), GTHS [Midat], Mindat college, GTHS (Paletwa) GTI (Falam) Electric-Maha datline le Nylon kattaya vialte le a dang zogn tampi chim ding a um rih.

Surkhua le Hnaring khuapi a pek tu zong anmah thiamthiam an si ko. Cu party zong nih a chim ko, cu phu zong nih an chiam ve ko” nan ti lai. A ngaingai tiah mi zei poah nih chunmang cu manh cio a si ko nain tuanchuahtu taktak cu Pu Henry Van Thio le NLD cozah an si ko. NLD cozah le Pu Henry Van Thio soiselnak a tuah lengmang hi ka ngiat lengmang hna tik ah ram le miphun caah theih phu le hngalh phu in an tuahmi a um rih lomi tu an si deuh.

Mi cheukhat nih thancho kan herh lo tiah a chimmi zong kan um. Laimi hi Kawlram chungah mi sifak bik kan si caah thanchonak hi federal le self-determination tluk tein kan herhmi a si ve. Kan peh than te lai.

Crd Lrt

Be the first to comment

Leave a Reply

Your email address will not be published.


*