BREAKING NEWS: THANTLANG THAWNGPANG CU APOI KO

Breaking News:Thantlang ah COVID-19 mizaw pakhat hmuhchap a si. Chin Ramkulh Thantlang khua ah 2021 January 11 ah COVID-19 mizaw pakhat an hmuhchap tiah, January 11 ah kan theih. Atu COVID-19 zawtnak A ngei thar mi hi Kawl miphun a si. Kalaymyo lei in riantuan ah Thantlang a ra mi a si. Anih hi a tlun le cangka in facility quarantine chiah colh mi a si.

Tuzing ah minung 35 quarintine chiah mi kha kan check hna i cu chung ah atu I zawtnak hmuh mi lawng hi positive a si, a dang kha cu negative an si dih ko. Atu hi RDT ti mi rianrang tein a phichuak aa thei colh mi in kan chek hna. Mah hnu ah a taang mi 34 hi PCR in kan chek than hna lai,” tiah Thantlang COVID-19 kong tawlrelnak ah tuanvo ngei mi Salai Sang Bawi nih The Hakha Times ah a chim.Thantlang khua ah COVID-19 zawtnak a ngei mi minung 3 an si cang i an dihlak in Thantlang sii-inn ah thlop an si tiah kan theih. Credit: The Hakha Times

Van Tum Cabia: Trump le Twitter. Pu Trump nih Capitol innpi ah buainak le thilttha lo tuah ding in a minung pawl cu a forh hna ruangah Twitter nih a account cu a zungzal in an phihpiak/an kharpiak. Bawi Jesuh nih cun zeitik hmanh ah midang kha thil ttha lo tuah ding in a forh bel hna lo/a cawnpiak bel hna lo. Mi ngaihthiam, dawtnak neih ding, remnak le daihnak ser ding, mi cungah zaangfahnak neih ding, mitoi i dor ding, mibawmh ding,

Dinnak tuah ding, tehte ttha si ding, le kan ral dawt ding lawng a kan cawnpiak i a nun in a kan hmuhsak fawn.Trump nih twitter cu sualnak tuahnak caah le midang zong thil ttha lo tuah ding in forhfialnak caah a hman ruangah a kumkhua in a twitter account cu phihpiak le kharpiak a si.Twitter hi kum 2006, March thla 21 ah Jack Dorsey le a hawi le pathum nih an rak thokmi, social networking service a si. Tu ni tiangah a hmangmi zate hi million 321 an si i rianttuantu 4,600 an um.

An Headquarter cu San Francisco, California, USA ah a um. A neitu bik le a tuahtu, Jack Dorsey hi a rum tuk cang. Amah hi Twitter CEO zong a si/a ttuan. A neihmi zate cu $13billion a si. Donald Trump khi a rum ngai ve nan a neihmi zate $3.1 billion hrawng lawng a si. Trump nak in Dorsey cu a letthum hrawng in a rum deuh kan ti lai cu. Dorsey hi kum 44, mi note a si rih.Trump nih twitter hi biatak tein a hmang. Laimi cu twitter a hmangmi kan um lai ka zum set lo. Kan umsual hmanh le 100 hmanh kan tling men lai lo ka ti.

Keizong hlasak thiam, Britney Spears ka rak uar lioah amah pehtlaihnak ah tiah a luancia kum 10 lio hrawng ah twitter account cu ka ong ve nan ka hmang ti lo. A tuah cu a fawite ko.Capitol innpi luhhnawh hnu in cun Twitter nih Trump lawng siloin midang zong tamngai an account a phihpiak hna. Mah kongah buainak tam ngai a chuak. Social Media i thil a ti khawh ning le rian a ttuan khawh ning cu Laimi cathiam lo tampi zong nih kan i fiang ngai cang hna. Ka bialak ah, Trump a min thar cu “Pate Lul” a si.

Atu tan Trump nih thil ttha lo a tuah ruangah a dang tthat lonak tampi zong a chuahpi. Minung pa 6 an thi.Tamtuk an tlaih hna lai i bia an ceih hna lai. Social Media dang karlak ah siseh, R-D party karlak zongah buainak a um, second impeachment kong zongah. Big Tech dang zong Trump kongah an buai dih. Amah Trump a ttanhtu minung tampi zong nih an kaltak cang.

Laimi lak zongah a piangthar i Trump a kal takmi an tam ngai cang ti si.Hmailei zongah an kaltak len rih ko lai, mifim deuh le piangthar deuh pawl nih cun. US politics ah Trump muithlam a leng ti lai lo.Amah belte thil ttha lo a tuahmi le a nun ziaza chiakha cu US tuanbia ah kumkhua in chim le rel a si lai. Ningzak ngaingai a si ko. Mah hnu i a dirpi rihmi cu nan chungah thlarau ttha lo a um peng rih ko tinak asi ko lai. Credit: Van Tum

Be the first to comment

Leave a Reply

Your email address will not be published.


*