BIG QUESTION KAN NGEI RIH, AN CHIM FAWN, KA FIANG KHO TI LO

Big Question Kan Ngei Rih.Ralhrang nih zohchia in mipi an kah hna, an tuk an den hna, an thah hna, an hrem hna, thong an thlak hna.CRPH nih ralhrang ralchanh in dohnak le thlaknak phunphun rian an tuan i cozah thar ser ding tiang in kar a hlaang cang. Ralhrang cu an sining dihlak in dotla lo ah a ser dih cang. Thah dih ding lawng te an si cang.

Dr. Lian Hmung Sakhong zong nih 2008 le NCA cu ralhrang lila nih an tuarsernak in an thah cang tiah a chim. Cucaah zeiruangah dah NCA hi an hngihnganh peng rih timi hi ka thei kho lo. Ral kan tho cang ti phuan zong an duh lo. KNU le KIA dah ti lo!Ralhrang thlak ding in timhnak an ngeih lo caah maw si ti zong ka fiang kho rih lo. CDM cu thazaang an pek ngai fawn i CDM lawng nih cun tlang a kan phak pi lai lo ti zong an theih ko.

Atu tiang CRPH karhlaan ning zoh tikah zong Federal lam cu an ser i telhmi zong an um hna i telh lomi zong an um hna. Kan kal aa rual fawn lo. Question biapi hal ding an um len. Atu ahcun a biapi deuhmi question cu ngeih caan a si lem ti lai.Kan ngeih dingmi tu cu zeitin dah mipi leiin thazaang kan chuah cio hna lai timi zuam caan ding ah ka ruah cang. Khatlei in Taluk nih kan ram mipi thisen le nunnak naak in a zinaan le gas pipe kongah a zai peng hoi.

Huat a tlai i thin a hung. A ngaingai ti ah cun Taluk ruangah Asian miphun dang tiang in huat le thleidan kan tong cang. A zinaan le gas pipe khi puahpiak lawlaw hna seh law a tha tuk hnga. Mipi a kan thattu ah aa tel bakmi an si. Cun ralhrang nih kahngolnak kan tuah lai tiah a thanh than. Mipi a thah rih hna. A duhning poah in a kan tuah i thui a kan timh peng. Lungawtawm caan si lo. Ralhrang thlak caan a si cang. Decision tuah palh caan si lo. Credit: Luther Tin Hre

Relchih:Atu bantuk Harsatnak le Vanchiatnak ton lio ah Mifim,Politicians le Pastorte nih Daite in um or Chim/Cawl? Atu lio kan vawleipi, kan ram, kan miphun, khrihfabu le zatlangnun tiluanning kan zoh ahcun a dikmi, a taktak asi mi, nak in a dik lomi, a deumi nih a haup dih i, nawl zong a ngeih deuh; minung zong nih a deumi tu kha kan duh deuh, kan uar deuh, kan i bochan deuh i, kan hman chin lengmang cang.Tuanbia deu, democracy deu, phunghram deu, ralkap deu, politicians deu, biaknak deu, khrihfabu deu, pastor deu, fimnak or degree deu, nunzia deu, tbk hna nih hmunhma an lak dih i, a lam kip in an kan hruai thluahmah cang.A dikmi le a taktak pawl cu kan thuh kan nawh thluahmah cang hna.

A dikmi, a thami le biatak kha kan cawn, kan theih, kan hngalh ko, nain kan hmang ngam lo i, kan aupi in kan chim ngam fawn lo.Acheu miding le mifel hna nih an chim an aupi zongah mi tamdeuh nih cun kan cohlang duh hlei lo, kan doh lehlam hna i a huat tiang kan huat phah hna. A sullam cu a deu le a dik lomi ah khan kan rak i nuam deuh, kan tui deuh i, kan rak i ziak deuh diam cang tinak asi. Thil tha lo kan doh kan ti lio ah, kanmah lila kha mah thil tha lo chungah khan kan rak um tawn i, a rak hmangtu le a thawntertu tu kan rak si diam tawn.

Atu ka umnak India rampi hi tahchunnak ah hun la ta ning law, 1947, Indepenence khawh cangka khan vawlei cungah Democracy tha hmangmi ram ngancem, Secular State, kan si an ti; zapi caah tlukrualnak le nuhrin covo vengtu phunghram (constitution) tha tuk kan ngei an ti, nain an zul hna lo, a deu tuin an i hruai. Hramhram in nawlngeihnak lak cu an hmang ve lo nain Kawlralkap tbk an si ve ko.Miphun, miniam le misang theidannak a san cemnak ram, biaknak namnehnak a san cemnak ram, le sifak an tam cemnak ram asi. Technology lei ah kan sang cem an ti, nain ID deu, certificate deu le phaisaa deu, a deu pawl a hmang tam cem an si; chim ding a tam tuk.Atu lio ah a laar ngaimi mifim bia pakhat cu,ram le miphun rawhtertu cu mipuarhrang le mitha lo hna tuahsernak ruang ah si loin, mi fimthiam, thilti kho le rianngeitu hna daite in an um ruangah le an hmur an cip, an cimrel duh lo, an doh lo ruang tu ah asi deuh, ti asi.

Kan ram, kan miphun zatlangnunnak le khrihfabu ah ruru-hranghrang le mahduhning in uk hruainak, dinfel lonak, phung lo le ningcang loin nun le khuasaknak a hun karh-sang ngai cang. Cu chungah doh lo, chim lo, ttial lo, le au loin daite in um, hmur i cip ko cu mah vialte that lonak kha tthanpi he aa khat. Thazaang a petu kan rak si. Cu caah a dikmi, biatak le a thami theih ko buin daite in um, chim lo, phuan lo, ttial lo, le tuah-zulh duh lo cu kan Bible cawnpiakning in siseh, kan nunphung le kan zatlangnunnak in siseh a cohlang lo; mawh tu a phorhter deuh.A herh lio ah biatak chim le dirpi hi luatnak asi. (Amos. 5:24; Eph.4:15; 2 Tim.2:15; John 8:32). Credit:Vancung

Be the first to comment

Leave a Reply

Your email address will not be published.


*