PASTOR HRAM BIK LIAN: ASI AHCUN HO DAH A PALH KUN, PATHIAN MAW?

Asi ahcun ho dah a palh kun; Pathian maw? America president Donald Trump nih a donghnak ahcun, thlahnak biacah {farewell speech} a hun chim ruangmang cang. Fiang tein “Hi hmun {white house} hi lungnuam le hnangam tein ka chuah taak cang lai” tiah a chim i Donald Trump nih president a ttuan ko lai, timi ngol duh lo in chim pengtu prophet vialte an palhnak a hung fiang cang.Atu America rampi thimnak hi tluk in a buainak hi “prophet deu pawl nih tam tuk bia an phuanmi ruangah a si” tiah mi tampi nih an ruah.

Cucu ruah awktlak ngai a si. America ram chung khrihfa hna lakah siseh, ram dangdang khrihfa hna lak in siseh “tu kum US pressident thimnak ah Donald Trump cu teitu a si lai” tiah phuang chungtu prophet tampi an um.Pastor pakhat, Paula White-Cain hna nihcun “Africa le south America lei in Pathian nih Donald Trump bawmtu dingah vancungmi a rak thlah hna caah teinak a hmuh hrimhrim lai. Democrat pawl nih thimnak hi Trump kut phan loin ding in fir an timh” ti tiang in a rak phuan chung.

Pathian nih fiang tein a ka chimh; Donald Trump nih teinak a hmuh lai” tiah fiang pup in a rak phuang chungtu prophet minthang tam tuk an rak chuak. Hi hna leng ahhin, a phuang chung lem lo nain Donald Trump nih teinak a hmuh khawh nakhnga, fakpi in Pathian sinah thla a rak cam pengmi pastor le khrihfabu tampi kan um rih; keimah kong kaa tel. Pathian Trump teinak a peknak hnga fakpi in thla kan rak cam ve.

Sihmanhsehlaw atu ahcun prophet bantuk in fiang pup, ral ttha taktak in Donald Trump nih teinak a hmuh lai, tiah phuangtu vialte cu an palh dih cang tinak a si. Donald Trump nih teinak a hmuh khawh nakhnga thlacamtu vialte zong kan thlacamnak hlawh a tling lo tinak a si ve.Asi ahcun ho dah a palh kun? prophet bia phuangtu pawl maw? Thlacamtu pawl maw? Pathian dah?Si ee, a tawinak tein ka leh lai.

Hi kong ahhin Pathian a palh lo zeicatiah prophet bantuk an phuanmi vialte hi Pathian nih a phuanmi an si hrimhrim lo. Aa palh kho lomi Pathian bia phuanmi siloin kanmah bantuk a palh kho vemi minung nih an zumhning kha mipi theih in an phuan vemi sawh khi a si ko. Atu chan ah cu bantuk hmailei thil kong phuang khotu prophet cu ngei hna usihlaw thlacam hmanh a herh ttug lai lo; anmah cu pei kei hi zeitindah ka si lai? tiah kan hal ko hnga cu.

Cucaah Donald Trump president a tlin lomi khi Pathian palh siloin Pathian min i lak in bia phuangtu minung an palh tu a si deuh.A pahnihnak ah, thlacamtu hna palh zong a si fawn lo. Zeicatiah zumtu cu kan duhmi te Pathian sinah halnak nawl kan ngei. Kan duhmi te Pathian sin ah hal hi a thianghlim tukmi thil a si. A ttha lomi tu cu, kan halmi bak Pathian nih kan pe hrimhrim seh, timi lungput khi a si.

Cu bantuk lungput cu phun dang deuh in chim ahcun Pathian kha kanmah duhmi thil tuahter kan timh; kanmah tinhmi lam ah kal kan fial tinak a si. Cu bantuk cun Pathian cu tukforh khawh a si lo.Kanmah tinhmi le duhmi siloin a sunparnak langhtertu ding a simi deuhmi thil tu a tuah peng lai caah “nangmah duhnak bang si ko seh” titu hi zumtu kan thlacam tlangkawmnak a si awk a si. “Hihi ka duh, hihi rak kan pe ko, hihi ka caah a ttha bik tiah ka ruah ko, Bawipa.

Sihmanhsehlaw ka caah a ttha bik hngaltu Pathian na duhnak bang in si ko seh” tihi Bible nih a kan cawnpiakmi thlacamnak cu a si. Cu bantuk in thlacamtu hna caah i chuah sual a um kho lo; an hmuhmi lehnak poh an halning in a si lem lo zongah Bawipa remruat an ti khawh dih. Kan Pathian cu aa timh lomi thil tuah forh khawhmi Pathian a si lo caah amah duhnak le tinhmi cohlan khawh pengtu hi a hlawhtlingmi thlacamnak theipar cu a rak si deuh.Lawmhnak he,Hram Bik Lian

Be the first to comment

Leave a Reply

Your email address will not be published.


*