APOI TAKTAK, HRAMHRAM BAK IN AA NIH LAIMI AN TI CANG HNA

Paletwa khuami hna cu Rakhine hriamtlai phu AA nih hramhram in hriamtlai bu ah an luh ter hna. Rakhine AA nih ULA ti mi hriamtlai phu dirh an timh mi ah lut ding in Paletwa peng Pi Chaung khua ah a um mi khuami hna cu khua khat ah minung 3 pek ding in khuami hna cu hramhram in an hal hna tiah theih asi. A luan cia mi thla tein Paletwa a hnu lei le a hmai lei ah a um mi khuami hna cu AA nih an rak tlaih len cang hna tiah theih asi.

Kan hnu thla ah khan AA pawl cu khua chung ah an rak lut I ULA caah khuami rak kan pe uh a kan ti. Khuami kan tlawm tuk caah kan in pe kho hna lo kan ti hna I cu ah cun na kan pek duh lo ah cun Paletwa ah um hlah uh. Mah hi Lairam a si lo. Rakhine ram asi tiah a kan ti I hram hram in a kan ti tuk caah khuami 2 an kal pi hna tiah khuami pakhat nih a chim. AA nih cun hram hram in an tlaih mi khuami hna cu tintan an pek hna I tintan an dih cun khua chung ah hruainak lei ah rian pek an si lai ti mi thawng pang pawl zong a leng tiah khuami hna sin in theih asi.

Kan khua minung 3 zong an kal pi hna cun khua dang pawl zong ah minung an hal len hna I minung na kan pek lo ah cun nan khua a him la loh. Thil pakhat khat kan tuah la tiah a kan thih pheh len tiah Pi Chaung peng ah a um mi khuami pakhat nih a chim. Paletwa peng ah a um mi Pi Chaung peng ah hin khua 30 leng a um tiah theih asi. A tu lio ah AA cu Paletwa peng hmun tampi ah hmunhma an la len cang tiah khuami hna sin in theih asi.

May be an image of outdoors and text

Thawng pang dang relchih: Yangon ah a um mi Laimi engineer pa te cu SAC ralkap nih an tlaih. Yangon Thinkan Kyun township ah a um mi Laimi engineer rian a tuan mi Kawl Thang Vuta kum 33 cu July thla ni 1 zaan nazi 11 ah SAC ralkap hna nih a um nak inn ah an rak tlaih tiah theih asi. A mah cu a ngan a dam lo mi asi I sii a thlop cuahmah lio mi asi.

Zeiruang ah an tlaih ti theih a si rih lo. Cun khoika ah an chiah zong theih asi rih lo I a kong hlathlai piak tu ding ah bawmh kan herh tiah a unu nih a chim. A hlan ah cun a unu te sin ah a um nain a unu le te cu Kalay lei an rak tlung caah a mah te lawng a um lio asi tiah theih asi. Kawl Thang Vuta cu Kalay Technology sianginn ah a rak kai mi asi I sianginn a kai lio ah Mizo sianghngakchia hruaitu a rak si bal.

Be the first to comment

Leave a Reply

Your email address will not be published.


*