APOI TAKTAK, CDF MIN A CHIATTER, HAKHA AH THONG 90 MAN THIL A FIR

CDF minzuar in Hakha ah top-up Ks.90,000 man minung pakhat nih fir. Hakha ah CDF ka si tiin dawr thil caw bantuk in aa umter i ralrinlo karlakte ah MPT top-up Ks.90,000 man le MPT SimCard minung pakhat nih a fir, tiah kan theih. Hi dawr thil an firpiak mi hna hi Bik Bik Electronics dawr a si i Sii-inn lampial chak, CP Five Star hmai ah a um mi a si. CDF ka si a ti.

Saulak thil a zoh. Mask aa huh, amittlang-hmul aa tong deng mi, mitung sang, kum 16 hrawng minote a si. Thaizing lei hrawng cun kan i kap thluahmah cang lai a ti i zawnruahnak he dawrkhar kan duh cang ko nain thil cu kan zohter. Battery, Air-phone, tibantuk a zoh len. Zun-inn tawh a kan hal i kan pek. Sau ngai a rau i kan vun zoh tik ah a rak um ti lo.

Top-up Ks.3000 man pawl a dihlak ah Ks. 90,000 man le SimCard a kalpi diam. Hi bantuk hi dawr tuahtu dangdang zong nih kan i ralrin a herh,” tiah dawr ngeitu nih The Hakha Times ah a chim. Hi kong ah CDF-Hakha in tuanvo ngeitu upa pakhat nih, “CDF minzuar in miphun le bu leirawi le minzuar a tuahtu cu thihdan tiang pek khawh a si.

Mi dangdang zong nih cu bantuk minung cu i ralring u. Cun, kan tlaihpiak kho hna ulaw kan duh,” tiah The Hakha Times ah a chim. SAC nih nawlngeihnak a lak hnu le COVID-19 phihkharnak ruang ah Hakha khua theng lawng si loin Myanmar rampum ah mifir an karh. Credit: The Hakha Times.

Thawngpang dang: UN ah Myanmar palai aiawh ah NUG lei minung maw SAC lei minung nih dah hmunhma a hmuh lai? Aralai mi September 14 ah a voi 75nak United Nations tonpumhnak pi cu an tuah lai. Hi tonpumhnak ah NUG nih an thim mi minung nih maw palai sinak a hmuh lai, SAC nih an thim mi minung nih dah UN palai sinak a hmuh lai timi kong ah VOA nih George Washington University i International Relation Department ah Professor a si mi Christina Finks bia an hal mi cu a tanglei ah kan van langhter.

Myanmar ram mi a tam-u Democracy a duh mi hna nih cun UN ah Myanmar palai caah NUG nih an thim mi U Kyaw Moe Tun nih hmumhma hmu kho seh ti an duh, a si kho lai maw timi kong ah, NUG aiawh tu nih UN palai hmunhma a hmuh khawh timi ruahchannak cu a um, cun UN ah Myanmar palai hmunhma hi ahohmanh pe lo in lanhtak khawh zong a si thiam ve. Ramchung ah a um lo mi cozah hna kha UN ah hmunhma an rak pek mi hna tuanbia ah a um bal ko.

Aluancia 1990 kum ah Haiti le Sierra Leone ram ah hibantuk in ramleng phan cozah pawl UN ah hmunhma an rak pek bal hna. Cun Palai a thimtu committee nih Palai thimnak kong ah biakhiahnak tuah thai loin an rak lantak mi zong a um. Cambodia le Afghanistan ram hna ah zong an rak lanh tak bal.” tiah Christina Finks nih a chim.UN palai thimnak ning cang kong ah, “ Palai thim ding a zohfeltu Credential Committee an um i an mah nih biakhiahnak an tuah.

Cun hi committee nih bia a khiah mi kha cohlan ding le hnawn ding kong cu UN General Assembly ah biakhiahnak tuah than a si. Cucaah Palai thimnak ah hin dothnih in a um tiah chim khawh a si.” tiah a chimchap. Hi UN palai thimnak kong he pehtlai in International Law ah fianghlang tein langhter mi a um maw timi kong ah, “Fianghlang tein tial mi cu a um lo, asinain a tak ah an hman mi cu a um.

Cozah pakhat nih ram kha a uk khawh asiloah Khua pakhat kha a hmun ah um in a uk khawh ahcun Credential Committee le UN assembly zong ah UN palai ah cohlan a si tawn. Hi hi ca ah an tial lo nain tahfung pakhat a si. A ruang cu ramkip cozah hna nih vawleicung ram vialte remdaihnak um seh ti an duh caah a si. Asinain, ram le khua an uk khawh zong ah uknak hramhram in a lak hnu ah cozah a si mi cu UN nih an rak cohlan lo mi tuanbia ah a um ve.” tiah a chim.

Aralai mi UN tonpumhnak ah Myanmar aiawh tu thimnak hi phun thum in a phi a chuak kho. NUG thim mi kha an cohlan khawh, asiloah SAC thim mi kha an cohlan khawh, cun ahohmanh kha thim lo in lanhtak khawh zong a si thiam. A tambik a si kho mi cu ahohmanh thim loin lanhtak khawh a si,” tiah Christina Finks nih a hmuhning a chim. Credit: The Hakha Times.

Be the first to comment

Leave a Reply

Your email address will not be published.


*