AN CHIMMI VIALTE HI ZOHCIO HMANH UH A HMANTUK HRINGHRAN

Atu Lio Chinmi Ramkhel Umtuning (Chin Realpolitik 2).Chinmi chung atu lio ramkhel umtuning hi, CNF nih a khel liomi ramkhel kong telh lo ahcun, a tlangpi in, phu pahnih in a um tiah ti khawh a si men hnga. Phu khat cu, Kawl party a si tiah Chinmi zeimawzat nih an ruahmi NLD le USDP tibantuk ah a ummi hna le anmah hna a ttanpimi khi an si hnga.

A dang phu khat cu, Chin min telh in le Chinmi nih hruaimi an si caah Chin aiawhtu kan si tiah a ruatmi le Chinmi a pu mi party lawng ah um a duhmi le anmah hna a ttanpimi khi an si hnga. Kawl nih hruaimi party chung ah a ummi hna nih a tlangpi in an chim tawnmi: Pakhatnak. Kawl party an kan ti ko nain, MP aa cuh dingmi le Chinram aiawh in MP a simi hnga dingmi cu Chinmi thotho kan si ko. Kawl an si lo.

Pahnihnak. Ramkomh cozah a tlai kho ding mi hna sinah kan um lawng ah, Chinram tthanchonak kan tuah khawh lai. Chinram caah phaisa tam deuh kan hal khawh lai. Pathumnak. Kawl party an ti ko nain, kan party chung ah tlangcung mi zong tampi kan um. Cucaah, Kawlram huap party tu kan si deuh. Palinak. Kawlram ah kan um ahcun, Kawl he kan i fonh lawng ah, kan hlawh a tling deuh lai. Kan duhmi le kan herhmi an kan tuahpiak khawh deuh lai.

Panganak. Chin party lawng hi Chin miphun a dawmi an si lo. Chinmi cu Chin party hna tluk tein kan dawt ve ko. Chinram tthanchonak lebang ahcun Chinram ka daw tuk tiah aa timi Chin party nak hna hmanh in kan tuah khawh deuh lai. Paruknak. Chin party thimfung nan pek hna ahcun tuah khawh taktak mi an ngei lai lo. Pasarihnak. Chin timi min an put thawng in Chin aiawhtu theng an si lo.

Chin Party Chungah Aummi Nih A Tlangpi In Anchim Tawnmi: Pakhatnak. Chin miphun kan si caah, kan miphun sinak a aiawh khotu taktak cu Chin party (kanmah hi) kan si. Pahnihnak. Kawl nih an hruaimi party nih Chin miphun a kan aiawh kho taktak lo. Pathumnak. Chin miphun a dawmi na si le, Chinmi na si ahcun Chin party ah thimfung na pek ding a si. (Aho paoh MP an i cuh zongah).

Palinak: Chin miphun kong cu Chin party lawng nih biatak tein an chim khawh lai, an aiawh khawh lai. Panganak. Kawl party cu a cunglei nih nawl an ngeihmi hna an si caah, Hluttaw ah an duhmi paoh an chim kho taktak lo. Paruknak. Kawl party cu a cunglei Party upa nih tuah u an timi hna a tuahtu lawng an si. Chin party cu kanmah tein aa hruaimi kan si caah a cunglei nawlngeih a hau lo, kanmah hi nawlngeitu cu kan si. Pasarihnak. Chin party lawng nih Kawlram ah Federal ramkomh a um khawh nakding ah kan chimrel khawh bik lai.

A dang zong tampi a um liangluang rih lai (rak chap cio te ko ulaw). Ramkhelrian (politics) cu dirhmun i thim a hauh tawn caah, a cunglei phu hnih ah khin, khoika dirhmun ah dah kan um cio hnga? Kawl hruaimi party tiah an ti mi ah maw? Chinmi hruaimi party tiah an timi ah dek? Kawlram ah Federal ramkomh a um khawh nakding ah a chimrel tu ding an si ahcun, Chinram tthanchonak a tuah kho ding an si paoh ahcun, zei party an si zong ah a poi lo. Kan bawmh/ttanpi hna ding a si ko timi, a laifang le tthanchonak a biapi bik ah chiahmi dirhmun ah dek kan um cio hna hnga?

Kawl nih an hruai tiah ruah a si mi NLD le USDP party hruaitu hna nih an chim tawnmi:Kawlram Federal ramkomh ser nakding ah kanmah nih kan tuah khawh bik lai an ti tawnmi le; Chin party hruaitu hna nih an chim tawnmi: Chin Party lawng nih Kawlram ah Federal ramkomh a um khawh nakding ah kan chimrel khawh bik lai an ti tawnmi tu cu;

Zapi thinlung laknak ah an chim sawh tawnmi a si ko.Atu lio Kawlram sining ahcun Ralkap le Tlangcung hriamtlai phu hna hnatlaknak an ngeih hlan chung paoh cu Tlangcungmi hna saduhthahmi Federal ramkomh cu Kawlram ah ser khawh dawh a si lo. Catialtu: Nathan Pa LD Hmung.