AMAK KO. TRUMP ASUNGH NAK ARUANG ACHIMMI CU ATURU KO

Pu Trump (A lai min cu “Pate Lul”) a sunghnak a ruang pakhat ah a tel ve tiah ka ruahmi cu, amah a ttanhtu, Mizoram lei in Dr. PC Biaksiama le Mizo cheukhat, Laimi (Chinmi) chung in zatuak 90 (Lai pastor le evangelists tampi telh) hrawng nih hruhttanh le palhttanh tuk in nan dirpi ruangah a si ve. Nan i thawh i Pu Trump cu Pathian nih a hmanmi a si, a umpi mi a si, a thimmi a si, Khrihfa a kan dawtu le a kan dirpi tu a si nan ti.

Amah a ttanhtu le a dirpi tu pawl zong a piangthar mi le Khrihfa ttha kan si nan i ti rih fawn. Asinan Lai Media le Facebook ah nan cattialmi pawl le biachimmi pawl cu lih le hrokhrawl a tamtuk. Biden a ttanhtu pawl cu nan kan huat, holh dawh lo le holh chiakha in hehtiah nan kan ti. Duk tawk in nan kan vawlhpamh fawn. Messenger in ca nan kan kuat thinhar bu in. Kan cattialmi tangah khawmenh (comment) fak emem in nan kan pek rih fawn.

Kan hmanthlak le kan min pawl zong nan i lak riangmang hna i kan si lo ning piin hehtiah nan kan ti rih fawn. Nan thin a har, thil ttha lo tamtuk nan tuah i nan ziaza hrim a chia tuk. Mah cu maw Khrihfa nundawh cu a si? Pu Trump nan ttanhnak ah nanmah tein nan nun nan i hrawk dih. Midang thluak zong nan hrawh dih hna thawngpang dik lo nan ttial ruangah. Mah bantuk lungput le ziaza chia a neimi thlacamnak cu zeitin dah Bawipa Pathian nih cun a ngaih duh lai.

Ziah an leh duh hna lai nan thlacamnak cu? Nan i tinhmi hrim pei a ttha lo cu.Bible nih a timi cu mittha le miding thlacamnak cu Bawipa nih a ngaih a ti.Phungthlukbia 15:29 chungah fiang tein a chim ko hi “Miṭha nih thla an cam tikah Bawipa nih a ngaihpiak hna, sihmanhsehlaw miṭhalo cu zei ah a rel hna lo.” Jeim 5:16 chungah a ti rihmi cu “Miṭha mi thlacamnak cu hmual a ngei.” Pu Trump nan ttanh ruangah Laimi tampi cu nan Khrihfa ziaza a rawk lawng si loin hmailei nan nunnak zongah Pathian thluachuah hmuhnak lam a tlawm deuh ngaingai cang ko lai.

Cucaah cun Pu Trump a ttanhtu tamdeuh, nithum chung bak rawl-ulh in thla rak cam uh. Bawipa Pathian sinah ngaihthiam hal uh. Trump nan ttanh ruang i thinhar in thil ttha lo nan tuahmi le biadawh lo nan chimmi vialte cungah Bawipa sinah ngaihthiam hal uh. Pathian nih an leh hrim2 hna lai. Nan palhnak le nan sualnak vialte an ngaihthiam ko hna lai. Laimi tamdeuh le Mizo cheukhat nih Pu Trump cu hruhttanh le palhttanh rumro in nan ttanh ruangah a sunghnak hi a si ve ti khawh a si hi. Credit: Van Tum

Salai Lairamthang:Democrats nih an control mi Pyithu Hluttaw, House ah House Speaker Nancy Pelosi hruainak in President Donald Trump cu a sual tiah impeach an tuah.House hluttaw palai nih vote an thlak i, Democrats an tam deuh hlei ah Republican minung 10 nih Democrats lei ttang in vote an thlak caah vote 232-197 in President Donald Trump cu a sual tiah impeach an tuah. Democrats lei ttang i vote a thlatu Republican palai hna cu Democrats an thawnnak state in a rami mi tam deuh an si.

Liz Cheney of Wyoming, Dan Newhouse of Washington, John Katko of New York, Fred Upton of Michigan, Jaime Herrera Beutler of Washington, Adam Kinzinger of Illinois, Anthony Gonzalez of Ohio, Peter Meijer of Michigan, Tim Rice of South Carolina le David Valadao of California hna an si.President Donald Trump cu a dirkamhtu hna nih Capitol Hill an luh hnawh ruangah sual an phawt i, President phuah khawhnak article of impeachment pakhat in sual an phawtmi a si. House nih President Donald Trump cu sual an phawt cang caah Senate ah tazacuai ding in an lanhpi lai.

Senate Majority leader Mitch McConnell nih cun Joe Biden President rian a thawk hnu lawngah President Trump tazacuainak cu thawk khawh dawh a si.Senate meeting cu January 19 lawngah meeting tuah a si lai caah President Trump a dinh tiangah tazacuainak dih khawh dawh a si lai lo. Januarty 21 ah President Trump cu a din lai i, Joe Biden nih President rian a thawk colh ve lai. Senate i taza an cuai zongah Democrats nih tei khawhnak lam a um lo. Senate i cheuthum cheu hnih vote lawng in President Trump cu phuah khawh a si.Senate ah Democrat le Republican cu vote 50 veve lawng an ngei. Senate i cheu thum cheu hnih vote lawng in Trump cu sual dantatnak pek khawh a si. Mah an tuah khawh lawngah Donald Trump cu President thimnak ah i cuh kho ti lo ding in an kham khawh lai. Republican nih cun Democrats pawl thil tuahmi cu sullam a ngei lomi a si, US caah thatnak nak in chiatnak a chuahpi lai. Credit: Salai Lairamthang

Be the first to comment

Leave a Reply

Your email address will not be published.


*