A POITUK E, LAITLANG KIR MANH LOIN PU THAWNG CIN A NUNNAK ALIAM

Ngeihchiatnak Thawngpang, US ah a tlawngmi Pu Thawng Cin cu Laitlang in a va tlawnnak US ah a nunnak aliam. Lairam in US ah a rak tlawngta mi Pu Thawng Cin cu cancer zawt ruangah Eskenazi Hospital, Indianapolis ah hi vawlei nunnak in mual aa kan liam. Tutan ah hi bantukin mual aa kan liamtak mi,

Pu Thawng Cin hi Tin Tlem Pa tiah auhmi le theihmi asi. Amah Pu Thawng Cin hi Thantlang peng Vuangtu khuami asi i, Thantlang khuapi ah khua asami an si. Pu Thawng Cin cu tulio zawtnak a chuah hlan deuh te ah khan US a phanmi asi. Amah hi cancer zawtnak angeimi asi i, US zongah thlopbulnak aa tuahmi asi.

Laitlang lei ah a tlung cang dingmi asi ko nain tulio zawtnak coronavirus ruangah tlung kho loin a um. Culio cuahmah ah a zawtnak cancer ruangah tuchun December ni 14 zingka ah hi vawlei nunnak in mual aa kan liamtak hi asi. Tutan ngeihchiatnak atongmi konghe pehtlaiin an langhter mi cu a tanglei bangin a si.

Thantlang khua ah khua a sami Pu Thawng Cin( Tin Tlem Pa) nih nihin zanlei 14,12, 2020 ah US ah mual a kan liamtak ti thawng kan theih. Pu Thawng Cin hi cancer in a zawmi asi i, US zongah aa thlop peng. Tlung ding zong a si cang nain covid ruangah a tlung kho lo i a zawtnak cancer aa thlop cuahmah lio ah covid zawtnak nih aphak i, atubantuk in mual aa kan liamtak nak hi asi tiah chungkhar neihniam sin in theih asi.

Ngeihchiatnak a tongmi chungkhar vialte nan ngeihchiatnak kan in hrawmpi hna. Nan ngeihchiatnak le nan mitthli tlaknak vialte a nung kan Biak Pathian nih in hnem in, tuar in khawhnak in pe ko hna seh, Nan ngeihchiatnak kan in hrawmpi hna. Tantak chungkhar hna caah atuarzia le a inzia an thiam nak hnga thlacamnak in bawmcio hna usih.

Thawngpang Dang Relchih: Zeiruang ah dah 2020 US Election ah Trump a sungh? (Journalists, Columnists & amp; Commentators) By: Rev Dr. Van Thawng Lian (USA).2020 US election cu Vawlei pumpi nih lunglut ngai in cuanh cio a si. Hakha, Thantlang, Aizawl le Lawngtlai tiang in cuanh le ceih a si. Nain, zapi nih cun Thawngzamhtu (News) pipa BBC, VOA le CNN tibantuk te hna rel/ngai loin lamkam news, Facebook le YouTube tbk. tuktak lawng kan rel caah atu tiang hin Trump nih a tei khawh ko rih tiah kan ruah.

Asilo, Biden nih Cabinet Ministers hmanh a thim dih cang hna. Khrihfa, zumtu tampi zong nih Trump bak a tlin nakhnga tiah thla kan cam, a tling hrimhrim lai tiah prophet biaphuan hna kan chim nain kan hal ning in a tlinlo tik ah Pathian cung tiang in kan lung aa lawm lo. A taktak ahcun, Jesuh hmanh nih, “Ka Pa nangmah duhnak bang si ko seh,” tiah a ti bantuk in kan ti khawh ve ding khi a si.

2020 US election ah Trump a tlinlonak a ruang hna cu; 1. 2016 kum Election ah khan a rak tling sual: Businessman a si mi Trump, America Politics dawnhhlei cung ah ruahlopi in a hung kai ah khan mizapi nih President si ding ah duh/uar le duh/uarlo ding an thei lo. Nain vanthat ah a zuamcawhtu Pi Hillary Clinton kha mizapi nih an duhlo tuk ca ah Trump kha an rak vote mi a si (Keimah le Mirang Pastor ka hawile zong kan rak si). Mizapi nih duh ruang ah a rak tlin mi si loin Clinton an duhlo ruang ah a tling sual mi a si an ti.

Pahnihnak. Huatu Bu an um: Trump tanhtu pawl hi Mirang lawng, Mirang kan cungnung deuh (White Supremacists) an si (Mirang dihlak in an si lem lo) ca ah cu policy duhlo lawng si loin a huat bak in a huatu an tam tuk. Cu hna cu R (Republicans) he D (Democrats) i cawh in minbunh tung loin “Trump a si lo mi, mizeipoh kan vote lai tiah a ti mi BU an si.” Party form tunglo le lenglangh tung lo in a thawng ngai mi BU ah an cang.

Pathumnak. COVID-19 Dohnak ah Policy a ngei lo: Vawlei ah a lamkip in no. 1 a si mi USA cu COVID-19 thokka in Trump a daithlan ruang le policy thathi a ngeih lo ca ah kan mual a pho cikcek. Amah zong Siibawite bia ngai loin Mask aa hruk duh lo ca ah a zaw. Tuchun (December 13) tiang a zaw mi 1,300,000 le a thi mi 265,000 kan si. Mah bu ah hin zeitindah kan doh lai ti mi policy a ngeihlo hlei ah Doctors le Scientists pawl bia a ngai duh lo. Nunnak nakin tangka biapi deuh ah a chiah tiah an ti, hihi Trump a tlaknak bik zong a si.

Palinak. Lihchim/Biapheh a hmang: Tuchan ahcun kanmah thawngtha chim mi hmanh Internet ah chiah a si. President chim mi chinchin cu a Ni, Caan, le hmun he record a um dih, nain a chim mi, a chimning in a tlin lo tik i bia an hal than tik ah ka chim lo tiah aa pheh peng. News cheukhat nih cun ni khat ah lih voi 50 a chim ti hna in an tial.

Panganak. Abortion le Same Sex thit-umnak kong ah a fale bia aa kalh: Nauhrawh kong le Nu le Nu, Pa le Pa (Ngeihkhat) thit-umnak kong ah Trump fale a si mi Ivanka Trump le Tiffaney Trump nih an pa zumhnak an chim mi aa khat lo. Pakhat nih ka pa nih a duh bak lo a ti, pakhat nih ka pa nih a ruahthiam tuk, a soisel lo tiah an ti.

Paruknak. John McCain a soisel: 2008 ah Obama he President zong a rak i cuh i, Arizona State, R party in kum sau tuk Senator a tuan mi, R nih bochan taktak mi John McCain kha Trump nih fak tuk in a soisel i a thangchiat ca ah McCain ruakvuinak ah Trump cu an sawm lo. President hlun Obama le Bush tu an sawm hna. Arizona state hi a liamcia 20 chung cu R state ta ah ruah mi a si nain 2020 ahcun D lei ah an i mer i, D nih teinak an lak.

Pasarihnak. Trump le Biden lungput le ruahnak an i thlau tuk: Campaign chung vialte Trump nih Biden hi pumpak bak in a soisel. Tahchunhnak ah, na fapa zu a ding, a hrokhrawl tibantuk in a ti zungzal nain Biden nih mah hi cu chungkhar kong a si a ti ca ah, zudinnak in a thi mi Trump unaupa kong voi khat hmanh Biden nih a chim duh lo.

Pariatnak. Income Tax a pe lo: USA ahcun riantuan mi poh nih thlahlawh le chungkhar sining zoh in Ngunkhyai (Tax) pek dih a si. Zatuak in pek a si ca ah mirum nih tam deuh an pek. Mirum pakhat a si mi Trump nih kum khat i TAX a pek mi hi Laimi zapi pek mi nakin a tlawm deuh. Health Insurance kan sok tik ah TAX kan peknak le Tax return kan tuahnak an kan hal, cu lo ahcun tuah khawh a si lo ca ah Tax kan peknak kha hmuhsak khawh ding in kan i chiah zungzal.Trump nih cun ka pek ko tiah a kaa in a chim ko nain ca in hmuhsak khawk mi a ngei lo. Hi kongah hin President in aa dinh tik ah tazacuai ding in New York state Court nih an bawh ko. (Hi vial hin sisehlaw a fiang ko lai dah)

Be the first to comment

Leave a Reply

Your email address will not be published.


*