A POI TAKTAK KHO TE DING, KAN I NGAI CHIH TAKTAK TE LAI HIH

Apoi Taktak Kho Te Ding: Kan theih cio bang Myanmar ram cu Party tampi a tel mi ( multiparty) democracy a si bantuk in parties 90 hlei in a ra lai mi zerh(Nov. 8) ah thimnak tuah a si cang lai. Tlaam a tlin khawhnak hnga ca zong ramchung, ramleng um kan za te thla cam cio hna u sih. Party a tam bantuk in ttanh hlei le uar hlei deuh mi party zong cu kan ngei cio hna.

A si hrim2 awk zong a si ko. Amah belte, a poi tuk kan ti te sual nakhnga lo party nih kan mit kan pheng( kan thinlung mit cawt ter) hrim2 hlah seh.Ttanh hlei party kan ngeih ruang ah mittha kan hmuh khawh sual ti hna lo ahcun a poi tuk hringhren te lai. Kan mah nih a thim kan i thiam lawng lawng ah rian ttuantu ttha( uktu ttha) kan ngei kho ve lai. Cinthlak( lo ) ei a hmang mi VOM kha, a rim nam ka cinthlak a ka ei piak hrim2 tiah CHAI le TTOLHTTANG( tthaittholh) lawng in dawi phung a si lo.

Cu ve bantukin kan covo a kan chuttu le kan hmun( kan Vawlei) a kan dettu kha mi zei paoh in dawi le nam awk an ttha ve lo. Cu ruang ah ttanhhlei mi party nih kan mit kan pheng sual in maw, a ttha mi, aa tlak mi le midingfel hmu kho lo in um sual citcet lai u sih.A chim in cun Nika( Sun) a diarter kho ding le Thlapa tlai kho an lo cio ko lai. An si tak ding le si tak khawh lo ding hi thil hin fawi tein theih khawh an si ko.

Thimnak hlan ah zeitluk in dah khua le ram le sang le veng ah a nun ah a rak i pek? ( a rum ngai ko nain khua le ram, sang le veng nih hman khawh lo mi an tampi) a luan cia a tuanbia ah zeibantuk minung dah a rak si? ( micheu khat rank sang pi an rak ttuan ko nain kan rak ton ngam lo mi le ton khawh lo mi an tampi ko khah). A tampi rih hi vial lawng ka langhter rih lai( nan i fian ko lai caah).

Ram le miphun a daw tak tak mi cu Joseph, Daneil le Nehemiah hna bantuk khan zei diarhmun an phanh zong ah an lungput an i thleng lo. A miphun zawn a ruah i, hmeinu/ hmeipa, siafak santlai lo zawn an kan ruah. Mah hlawknak ca men ah miphun hnu an chit lai lo i a zuar zong an zuar lai lo. Cu ruang ah, Pu H. Van Tthio, Dr. Hmuh Thang, Pu Siang Mang le Pu Ttial Ling tibantuk minung pawl hi teinak kan hmuhter hna lo ahcun a poi tuk kan ti tak tak te ko lai( teinak hmuhter ding ah nan ruah cia cio mi minung an si lai ti zumhnak ka ngei).

A cung i ka langhter mi minung4 hi khoika hmun, zeibantuk minung hmai zong ah hmaitonh in a diar ngam ding le a diar kho ding lawng te an si. Hmuh-theih( experiences), fimthiamnak ( qualification/ knowledge), huham( aura/ stately/ charismatic) , hmaizah awk tlak mi(dignitaries)an si hlei ah ziaza ttha/ nun zia dawh( wellbred/ a good behavior) a ngei mi an si. Cu hlei ah a ral a ttha mi zong an si caah kan cawisan hna ahcun miphun nih hlawknak tampi kan hmuh lai tiah ka zumh.

Midingfel cu zeitik hmanh ah an ral a ttha peng. Thlithup rian ttuan( thil tuah) hmang pawl tu hi i phuhrunnak nih a nenh hna caah an ral a chia tawn.“The best way to predict your future is to create it” tiah Abraham Lincolns nih a ti. A ra lai mi caan ah rian tuantu ttha( uktu ttha)kan ngeih hrim2 a herh ko ti na ruah ve ko a si ahcun, a mingnung in zoh hmasat philh bak te hlah.A minung in na zoh hmasat i na ttanh mi party chung in an si ahcun lawmh a um tuk hnga i, an si lo sual zong a si le thilttha tanh duhnak lungput he lung awttawm lo tein midingfe kha rak thim ve te ko hna. Catialtu Roland Thang.

Be the first to comment

Leave a Reply

Your email address will not be published.


*