A KA ZUAMCAWHTU AN UM AHCUN TIMHCIA BAK KA SI KO HIH

Tial Thang Zathang nih Laipaih a ka zuamcawhtu an um ahcun timhcia ka si tiah a chim. 2021 August 21 ah USA ram i tuah ding mi Vaurawng CDF Laipaih ah One Championship MMA Vuak zuamnak ah aa tel mi Tial Thang Zathang nih, A ka zuamcawh tu ding an um a si cun cohlan ding in ready ka si ko, tiah a chim. Tial Thang Zathang nih, Ram le miphun khuatlang ca ah an ti tik ah kaa pai ve lai ka ti ko hih.

Hi paih bual ah zuamcawhtu ka ngeih a si cun a ka zuamcawhtu he kaa pai ko lai. Zuamcawhtu ka ngeih lo zong ah Palai vuang paih (Middle Weight, Papi paih (Heavy Weight) le Pate paih (Light Weight) ah kaa pai thiamthiam ko lai. Zatlang paih zong ah kaa pai thiamthiam ko lai,” tiah The Hakha Post ah a chim.

Tial Thang Zathang hi vawleipi theih in One Championship MMA Vuak Zuamnak ah voi thum tiang teinak a hmu cang mi a si. August thla chung ah voi khat aa phomh than lai tiah theih a si. Cun, “A ka zuamcawhtu an um a si cun Dollar tam deuh a hau lai. Kei cu kaa ready ko,” tiah a chimchap. Credit: The Hakha Post.

Cabia dang relchih A kong: Surkhua RC Father le Pastor tlaihnak kong fianternak: Surkhua Myo RC Father le Pastor pakhat CDF nih 26.7.2021 ni ah an tlaih hna tiah cheukhat social media nih ca an thlah mi chungin (1). Father hi amah pumpak herhbaunak ruang i Hakha lei a kalnak ah an tlaih. (2). Ralkap nih ton ding in an auh i Hakha a kalnak ah an tlaih.Pathumnak. Father pa le Ralkap pehtlaihnak an ngei. Mipi ramtang an rak zam lio ah khuachung ah atang I ralkap he pehtlaihnak a ngei.

A cunglei kong he pehtlaih in a tanglei ah fianternak kan langhter. Pakhatnak. Surkhua Myo humhimnak caah Khrihfa bukip fonh in chiatnak/tthatnak le Covid runvennak caah caan karlak committee dirh a si. Mah Committee nih a tinh mi cu 1. Ngandamnak lei zohkhenhnak 2. Biaknak lei zohkhenhnak 3. Chiat/tthat lei zohkhenhnak tiin tinh mi ngeih a si i hi committee ah RC Father pa hi hruaitu lutlai ah riankhinh a si bantukin Covid runvennak sii le a dang sii cawk dingah Surkhua chiat/tthat committee aiawh in Hakha lei a kal lio ah an tlaih hi a si.

Pahnihnak. Ralkap nih ton ding in an auh i Hakha a kalnak ah an tlaih ti mi kongah a cunglei kan langhter cia bantuk in Hakha lei in Sii lak dingah an rak cah hna i Surkhua Chiat/tthat committee le mino meeting biachahnak in an thlah i Hakha lei a kal lio ah an tlaih mi a si. Pathumnak. Surkhua RC Father pa le ralkap an i pehtlaih, Mipi an zam lio ah khua chung ah atang i ralkap he pehtlainak a ngei ti mi kongah Surkhua pawng I kahnak a chuak lio ah RC quarter ah Fr pa nih tarnu tarpa a tli zam kho lo mi a zohkhen hna i cu lio ah ralkap nih meithal in an rak kah caah zantim ah a rak zam ve. A voihnihnak ralkap an rat lio ah biaknak lei hruaitu le khua upa hna cu,

Surkhua humhim ding in inn an umnak ah ralkap nih an auh hna i amah Father telh in biahalnak an tuah hna hnu ah Hakha ralkap lutlai nih rak ka tong u, nan rak ka ton lo ahcun nan khua mei in kan khangh lai i ral ah kan in zoh hna lai tiah a rak ti hna caah mipi he tonnak an ngeih hnu ah khua humhimnnak le mipi zawnruahnak in biaknak lei Pastor le khua upa cu Hakha ralkap lutlai an va ton hi a si.

Palinak. Surkhua Father le Pastor pa tiah an langhter mi i Pastor pa ti mi hi Surkhua ah a um mi si loin Dumva ah Pathian riantuan mi tu a si. Surkhua i ralkap an phak lio le Covid runvennak caah sii le ai cawk dingin Surkhua Chiat/tthat committee meeting an ngeih lio zongah a tel ve lo mi a si. Panganak. Cucaah Social media i ca nan thlah tik ah a chung thil sining nan theih hnu le ralrin tein nan tialnak lai kan in duhpiak hna. Surkhua Chiat/tthat Committee. Global Surkhua

Be the first to comment

Leave a Reply

Your email address will not be published.


*