A FIANG KHOTUK NLD CU HNU KAN CHIT HRIMHRIM A HAU KO CANG

Chinmi tampi nih NLD kan dirkamh mi le kan ttanhmi hi cu khuaruahhar taktak cu a rak si ko cang. NLD kan dirkamhnak hi thatein ruah taktak a hau cang. Culawng siloin USDP zong hi Chinmi nih cun kan dirkamh dingmi thil asi ti lo. NLD le USDP dirkamh ti lo ding tiah ka tinak a ruang bik cu Chinmi hna nih party kan ngeih ve ko caah miphun dang party dirkamh lengmang hi aharhnak aum ti lo.

Kanmah Chinmi nih CNLD party hi ngei hlah usihlaw miphun dang party NLD le USDP party kan ttanh zongah apoinak a um hnga lo. Sihmanhsehlaw atu ahcun Chinmi nih CNLD kan ngeih ko cang caah kanmah Chin party hi dirkamh bak dingmi cu kan si ko. Hiti vun tikah hin kanmah Chinram huap chungah cun ka tinak khi a si. Kawlrawn anmah kawl miphun dirhmun ahcun NLD or USDP hi kan dirkamh zongah a poinak a um lo.

Kanmah Chinram chung koko ahcun a zei cudah NLD le USDP cu kan va dirkamh lai? Thatein tuak cang in lungfim cang hna usih. Kanmah Chinram chungah NLD le USDP party a ummi hna hi kawl miphun nih hriamnam pakhat bantukin a rak kan hmanmi asi timi zong hi fian ahau cang. NLD le USDP kan dirkamh thawngin zeidah Chinram caah hlawknak a um?

Miphun dang Party nih kan ram Chinram aa kan hruai hi maw kan duh ko rih lai? Miphun dang party nih hruaimi le ukmi khuakhan lairelnak nak cun kanmah Chin Party CNLD nih aa kan hruai ding hi kan duh deuh awk a si cang lo maw? Hi konghe pehtlaiin CNLD candidate asimi Cheery Zahau cabia hi a fiantuk caah ka vun thil.

Tutan thimnak dingah CNLD candidate a simi Cheery Zahau nih fiang ngai in a chimmi cu NLD hi Kawl party asi lo tiah a ti lengmang tu pawl ruahnak hi ka thei thiam hrimhrim lo. NLD cu kawl hruaitu pawl hna nih an dirh mi party asi i, Polical Power le Legitimacy ngeih duh ah Chinmi pawl an rak telter mi te khi asi tiah a chim. Credit: Cungbawi