A DIRHMUN AH UM VE USIHLAW KAN I HERH TUK CIO KO LAI

Hakha Campaign For Justice(HCJ) nih biahrang ngai in Hakha GTI sianguk Sayakyi Tluang Za Thang cu ‘last warning’ an pek hoi. Zapi theih in an thangchiat hi a voi tam pah cang. Atu warning an pek ning lebang cu a nunnak ca hmanh ah tihnung ding phun khin a um. Amah lawng hiti warning an pek lengmangmi zoh tikah CDM a tuah lomi hi amah lawng maw a si hnga ti awk in a um.

CDM a tuah lomi an tampi ve ko buin zei ruang thengte ah dah amah lawng hi hitluk tiang in tihnung warning an pek lengmang hnga?A caan sunglawi kum caan tam taktak pek in ca a cawng i PhD tiang a ngah hnu ah a hmuhmi riansang kaltak ding cu a fawimi a si lo. A dirhmun ah um cio ve u sihlaw kan i harh tuk cio ko lai.Min Aung Hlaing le ralkap uknak cu kanmah tluk tein a huat ve ko lai.

Kanmah nakin a letza in miphun caah caan saupi rian a tuan i thahnemnak a tuah cangmi a si. CDM luh lo ruang ah hi tiang warning pek cu a dik tiah ka ruat lo. Sayakyi Tluang Za Thang le a dang cozah riantuantu hna hi Min Aung Hlaing nih rian a pekmi an si lo, an huat tuk ko buin thim awk an ngei lo caah an rian an kaltak ngam lo hi a si.

Pu Ngun San Aung, Ngun Cung Lian, Rungtlang ralkap le Hakha palek bantuk khi MAH nih rian a pekmi an si. MAH minung an sinak fiang taktak in an langhter lengmang ko. Kan ral a that taktak ko ahcun kan ral taktak a simi anmah pawl tu khi warning pek awk cu an si. Ka tei lai tiah ngamh deuhmi le thazaang der deuhmi lawng warning pek lengmang hi cu ralchia pawl rian a si, Ngol caan a cu cang. Kan khua cia ah kan ral taktak an lor, zei kan ti ngam hna lo. Mizoram kan zam dih manh. Nain, kan zamnak hmun in kan ral taktak a si lomi kanmah kan unau lila kha thah ding tiang warning kan pek lengmang hna, ngol cang u sih. Credit: Salai Lungthlitum

May be an image of 1 person and text that says "Hakha Campaign For Justice 1d・ ဟားခါးမြို့ GTI ကျောင်းအုပ် ဆရာကြီး တလွန်ဇာထန် ထံသို့ပို့စာ ...See more 391 77 comments Like 63 shares Comment Share"

Relchih:Mi soi i lei rawi hmang mi hna: CNF le CNA Zei an si lo na tii ma? A chung thil zei dah na theih? Ziah hi ti ko hin naa ceih? Kum sawm thum leeng an do mi, An raal kong an hngalh tuk si. KIA he raal do tti ah an i tel ve ko khi. Mui cawl zong in an thlah khi. Raal do zong an thiam an ti, U nau chung khat kal taak in Kan caah nun nak thaap ding khin, A sur a liin kar lak ah, Caang vat le fik fa lak ah, Ti lo rawl loin an tuar.

Nang tu cu mi phun na zuar, Heh tiah an thang na chiat hna. An ttuan mi cu Chin mi ca, An in hua hlei lo dah kaw. Nang cu mi soi in na zaw, An rian bia pi an i hngalh. Nang cu na rian pi naa palh, Raal tei in than taar tik ah, Hi hi cu rak philh te hlah. Kan dih lak za lon nak caa, Thlei dan an ngei lo ti kha, A nun nak le thi sen khin, Caawk mi Pathian bo chan in, An hlam mi nu hrin co vo,

A si ti ziah na hngalh lo, Soi bawh or khu mi tha thu, Kawl zer ah na nun a tlu, Na au na khuang nang mah lawng. Kawl zer nun tu na va caawng. Zei tal khi dah ram ca ah, Ka tuah khawh ve ti ruat pah, Na au na khuan leen lio ah, An nun thaap in raal ram ah, Na cah an do raal lian cu, Ti tal hi cu philh hlah mu. An do raal lian tei ni ah, Rak i phu hrung duh leem hlah,

Kan in sawm lai khi ni ah, Kan in philh bak lai lo khah. Da lan tu cu phun dang mu, An hmuh ding aa dang ve cu, Mi phun lei rawi hmang mi cu, An ci tiang in hmih hau cu, Kan mi phun zia si bal lo, Kawl zia naa laak kan hngalh ko, Ram ca na ttuan lo hmanh ah, Mi soi tu cu hmang ti hlah. Dai te khan rak um ziar ko. Mah lo cu na caah ttha lo, Mi soi in raal va do hlah.

Zei hmanh san a tlai lo khah, A kap kip in rian ttuan aawk, Za pi nih kan tii khawh taawk, Ram cah rian sung a tam pi, Cu tal cu na hngalh aawk si. Mi ttuan cia mi ei lawng bawh, An ttuan tu soi ding lawng bawh, Na ning a zak te lai e, Na nun ttha te in i thle, Ttha ten na hngalh lo ah cun, Mi soi bia chim tal i suum. Zei dah na ruah i na tuah? Na nun ttha ten i bih tuah. Ka chim leen duh ti lai lo,Dai te tu khan um cang ko. Kaan nawl ko hih va pual nih. Credit: Vapual Thawng

Be the first to comment

Leave a Reply

Your email address will not be published.


*