A BIAPI TUKMI ASI CAAH SHARE CIO HNA USIH, RALKAP NIH AN KAHMI PAFA HNA CU

SAC nih an Kahmi hna Kanpetlet Pafa ca ah Bawmh Halnak. Nizan (August 15) ah Kanpetlet peng, Kantharyone khuate ah SAC ralhrang nih meithal in an kahmi hna pafa lakhruak in bawmhnak pek an herh caah Kantharyone Baptist Khrihfabu Pastor Thang Hung nih Lai mipi sin ah bawmhnak a kan hal. Nizaan zinglei ah Kanpetlet SAC ralhrang kahmi meithal kuan nih innchung ah a itmi pafa a khen hna.

A pa Pu Thang Thung (kum 30) hi meithal kuan 3 nih a kee, a phei le a paw ah a khen i a zualhma deuh ngai. A fapa te hi Naing Thang (kum 2) tiah auhmi a si i, a hnawng ah meithal kuan nih a khen ve.Magwe sizung ah Kanpetlet Red Cross nih an kalpi hna i, an pafa in an thi tam tuk a chuah caah thisen zong an rawnh hna. Chungkhar khuasaknak lei ah lothlawh in a paw aa cawmmi an si i, khuapi sizung ah an chungkhar tein an panh tik ah azeilei paoh in an chambau.

COVID-19 pulrai le ral lak kan si bang in an khua khrihfabu zong nih umkalnak le lampi ei awk dahtilo an rawnh kho ve hna lo. SAC ralhrang kut tuar in Magwe sizung ah a phanmi a cunglei pafa bawmhnak ah kutsamh a duhmi nih a tanglei phone ah direct in chawnh khawh a si i, Wave Money zong in tangka kuat khawh a si. Pastor Thang Hung (Laiholh a thiam), Kantharyone Baptist Church. Phone: 09759224987, WaveMoney: 09759224987. Credit: The Chin Journal

No description available.

Thawngpang dang: Joe Biden nih ram mipi sinah bia a chimmi ka ngai i, a palhnak pakhat hmanh a chim lo. Afghan Cozah le ralkal santlaih lo lawng te ah a chiah. Ralkap lak ding in biachahnak ka tuahmi zong ka palh lo, kaa ngaichih naisai lo a ti. Kum 20 chung kan bawmmi hna si seh tangka in trillion in kan bawmhmi hna a siah hriamnam kan bawmh hna a siah santlai lo an canter a ti.

US cu kan rian aa lim, kan kut a thiang ti phun in a chim. Kan chuah takmi hna zong hi US caah miaknak a si cang a ti. Asinain Joe Biden aa palh ngai tiah ka ruah. Sept 11, 2001 ah Afghan hrambunh tapung nih US inn sang pipi pahnih an rak phomhpiak hna i minung zong 3000 leng an thi.US nih thinhun in a hawile NATO ralkap sawm in an luh hnawh hna. Tapung cu an doh hna.

US ralkap zong a thongthong in an thi; mipi zong a thongthong in an thi. Cozah an dirhpiak hna, ralkap an dirpiak hna, tangka he hriamnam he an bawmh hna. An i tinhmi cu tapung hrimhrim kha cawl kho loin tuah kha an hmuitinh si. Cu lo ahcun Afghan hi tapung khur le kua a si than sual lai i, US ram chung ca le ramleng mipi caah ral lian tuk an si lai ti an phang. Cuticun an um pi hna i kum 20 a tling. Hi chung vialte cu US a him khen ah a cang. Afghan ram Cozah zong a dir kho cang lai tiah an zumh. Asinain CIA nih Joe Biden sinah an chimmi cu: Ralkap na lakkhanh hna ahcun an dir kho lai lo. An tlu colh lai an ti. Joe nih an bia ngai lo ti a si.

Kan kaltak hna ahcun tapung khur le kua ah a cang tha lai i 2001 lio bantuk ah kan kir than kho timi a ruat lo i, mi dang tu kha a kutdong in a sawh hna. Tapung khur le kua ah a can than i US dohnak hmun le hma ah a can thsn ahcun US nih trillion dih in an bawmhmi hna; ralkap le hriamnam he an bawmhmi hna; kum 20 kan bawmhmi ah kan hmuitinh a tling ko a timi vialte cu a papalawng bak a si lai.

Be the first to comment

Leave a Reply

Your email address will not be published.


*