A BIAPI TAKTAK, A ZAMMI KAN CHUNGKHAT CHIM DIH HNA USIH

Mizoram Ah Refugee In Arak Zaamimi Hna Theih Ding:Myanmar rambuai ruangah Mizoram lei ah mi tampi nan hung zaam. A hleice in ramri khuate deuh ah khua nan sa hna i, cozah leiin milu relnak cu a um lo nain kannih khua lawng hmanh ah minung 300 leng an um cang. Ram lengin a rami nan si tikah thutto umtuning le khuasaknak ah harnak tampi nan tawng lai.

Cu bantukin khuachungmi zong nih nanmah ruang harnak tampi an ton ve ruangah kan theih cio ding ah a herh tukmi tlawmpal ka vun tial ve.1. India cozah nih Myanmar mi refugee in luh a sianh lo nabuin Mizoram state cozah nih unau dawtnak lungputin, phungning loin luhtermi nan si. India Central cozah nih a theih ahcun kirter ding nan si. Nan luhning hi refugee siloin khualtlawng bantuk nan si(Refugee cu nan si ko nain).

Pahnihnak. Mizoram a rak lutmi lakah mifel le mitha tampi nan um, cheukhat belte cu mifel lo deuh zong nan um. Zu dingmi le mi mit-au a zaoh lomi, mah khua bantuk i mah duh paoh in a ummi pawl khi khuachung tlangval le khuatlang hruaitu mit nan kem tuk hringhran. Nanmah mi tlawmte pawl ruangah hin a’n zaangfaktu hna nih an in huat than te hna lai, ti ka phaang. Mifel lo pahnih khat ruangah chin refugee nih harnak nan ton khawh caah i ralrin a hau.

Pathumnak. Myanmar lei motor bike(kenbo/125) aa luhpimi zong tampi nan um. India cozah nih Myanmar lei motor bike hi a cohlang lo. Sinain, ramri kam a si caah palik le ralkap nih an in tlai hna lo. An in tlaih hna lo ruangah Hakha/Thantlang i cycle nan mawngh bantukin mawng hlah uh. India ahcun kehlei ah minung kianh ding a si. Kan traffic phunglam nan zulh lo ruang le rang tukin nan mawngh tawn ruang ah Chin refugee min a chia kho.

Palinak. Mizoram ahcun khuatlang le biaknak hi a biapi ngaimi ah chiah a si. Mithi an um tikah thlaan cawh le mithi in thutpi, tlangrian an auh tikah i thawh ve, Biaknak lei ah kan phaak tawk cio in i tel ve hna hi minung/mifim nunning ah ruah a si. Hi bantuk ah naa ve lo ahcun mi ah an in ruat lai lo. A caan ahcun, ‘Rome ah na um ahcun Rome mi bantukin um.

Panganak. NGO(YLA, LSA) hna nih nan har tuk lai phaan ah, nanmah bawmhnak dingah an rian kaltakin heh tiah bawm an dawnh. Nan rak luh khawh nakding zong khua an khaang. Hilio ah cheukhat zu din awk kawl in le phungning loin khua a sami hmuh ding nan um ahcun an bawmtu hna thin a hung sual lai. Mizoram cu NGO ram a si kha philh lo ding. Khuachung zong ah tlangval fello deuh le hrut deuh an tampi ve caah refugee tlangval le khuachung tlangval buai sual hna sehlaw Chin refugee dangdang zong nih an tuar khawh fawn.

Khualtlawng cu khual kan si bantukin mi mit-au zoh butein khuasak i zuam ding asi.Hihi ka chimmi hi huatnak ruangah a si lo, ka miphun hawi, u le nau hna nih harnak nan ton sual nakhnga lo, ralrin bia ah ka chimmi a si.Mizoram chungah nan chungkhat/cingla a zaammi an um ahcun an rel khawh ve nak hnga rak share ve. Credit: Tluangaa Zathang

Be the first to comment

Leave a Reply

Your email address will not be published.


*